طريقه ابداعيه لحفظ القران كاملا في اقصر وقت!!!!!

[بحر الحرية]

أهلين أختي..

موضوعك جدا رائع، والله يكتبلك الأجر يارب عليه..

والله يسهل عليكي الحفظ يارب، ويكتبلك حفظه في قلبك إنشاا الله..

أعيد حاجة عليكي..

لا تحفظي قبل ما تقري الآيات بصورة صحيحة، خصوصا القرآن ما يقبل أي خطأ أبدا ولو كان بسيط،
ومشكلة التعديل شوية صعبة لو حفظتيه على غلط، وزي ما تعرفي القرآن يُؤخذ بالتلقي.

بس عندي رأي حاب أقوله لكي ولكل اللي يبغوا يحفظوا، ممكن يكون مقبول أو مردود بحسب الفايدة اللي تشوفيها لنفسك، بس ما حبيت أقفل الموضوع بدون ما أكتبه كرأي:

لا يكون في بالك أهم شي إنك تحفظي وتخلصي عشان تكوني حافظة، يعني بصورة أوضح:
لا يكون هدفك إنك تخلصيه حفظ في مدة شهر مثلا، أو ثلاثة شهور أو 6 شهور، بقدر ما تهتمي إنك ترسخي الحفظ،
وتحفظيه بتأني، على أي فترة تجي معاكي حتى لو طالت ووصلت لسنتين أو ثلاث أو أربع سنوات، المهم إنك تكوني في تواصل مع الحفظ والمراجعة بشكل دائم،
لأني أنا ضد فكرة الاستعجال في فترة الحفظ، وحتى كنت بعض الأحيان أسمع عن بعض البرامج
وتكون عن حفظ القرآن في شهر أو شهرين، لكن ما أأيد فكرتها، لأنها هدفها الحفظ فقط، ولو كان فيه لهم مراجعات، لكن برأيي ما أأيدها.

رأي تاني:
لا تبدئي من بداية القرآن، لكن ابدئي من النهاية، صعودا لبداية القرآن، أي من سورة الناس، ثم الفلق، ثم الإخلاص ثم..... الغاشية، ثم الأعلى ثم الطارق...... وزي كداا حتى توصلي بإذن الله لسورة البقرة وتختمي القرآن كامل يارب حفظا.

دي الطريقة راح تزيد من حماسك أكتر في مواصلة الحفظ، لأنك تبدئي من قصار السور وأسهلها في الحفظ، وراح تحمسك في الاستمرار لأنك بعد فترة راح تشوفي نفسك عديتي جزء كبير من عدد الأجزاء والسور والآيات في وقت قياسي، وما راح تشعري بصعوبة في الحفظ، في نفس الوقت راح تسهل عليكي الحفظ في الأجزاء اللي بعدها وانتي طالعة..

الله يسهل علينا الحفظ يارب والمراجعة، ونسمع عنك إنك حافظة له إنشاا الله..

أرجع أشكرك على الموضوع أختي، سواء هذا الموضوع، أو الموجود في الساحة العامة، والله يكتبلك الأجر على نيتك يارب ويسعدك ويرزقك كل خير انشاا الله؛؛