Walking away from the sun :: SoulTalk

[Daniaa.]

لمن يكون الواحد زعلان, مبسوط, ولا متضايق من حاجة..سبحان الله لمن تشوفو يبان في وجهو على طول..
بس انا السنة اللي فاتت اكتشفت انو اقدر اعرف نفسية الواحد من كلامو.. مو قصدي لمن اكلمو فيس تو فيس.. لا لمن اكلمو عالمسن.
مدري هيا قفت ولا اغلبية الناس تقدر تفرق برضو ..



حقول اسم كم عضو واللي لاحظتو من طريقة كلامو.. واللي يشوف اسمو يرسلي ويقولي ازا توقعي كان صح ولا لأ

عموريAHLI : لمن يجي يكتب يكون مكشر.. واحيانا احسو يرد من طرف خشمو ..
حتى لمن يجي ينكت ولا يتريق.. مافي اي تعابير او حتى ابتسامة صغيرة على وجهو.
بيوكيميائية ^_^ : من كلامها يبان عليها انها وحدة طيوبة وقلبها ابيض . بس انها جدية شوية..ولمن تجي تمزح وتنكت..احس برضو ما في اي تعابير على وجهها .
سكووت: دمها خفيف.. صح انو اغلب ردودها اللي قريتها فيها ترقيه و مزح ..بس جواتها كدا احس دمها محروق.. وفي حاجات مضايقها .
lady-fano-bird: لزيزه يناسو عليها ..احسها مهويه شوية..
ǁ غــلأآإ ، رٍوٍحــي ǁ : البت دي مدري كيف...احسها مع ناس وناس...يعني ناس تمزح وتنكت معاهم, ناس ترد عليهم من طرف خشمها , وناس تكون معاهم عادي
Life as Game : لزيز ومره احب اقرا مشاركاتو .. بس احسو لمن يجي يكتب يكون منفعل بزيادة واحيانا معصب ..اليي يخلي فيها شوية وقاحة
Butterfly Hope: مره يا ناسو.. دايمنها مبتسمة و مبسوطة.
miss you : كان يكتب اسألتو وهوا طفشااان ونفسو يلطش احد .

بس هادا اللي افتكرو... ولحد يزعل . وعلى كلمة من طرف خشمو معليش بس ما اعرف اي تعبير تاني بنفس المعنى


" امكن اللي كتبتو يكون تحليل شخصية على نفسية مدري ..مشو حالكم بس "

[Daniaa.]

ماروكو الحلقة الاولى Part 1

ماروكو الحلقة الاولى Part 2

مشاهدة ممتعة

[Daniaa.]

كتبت تعليق بسيط على ماروكو.. وزبطو ونسقتو ..
.. قعدت متنحه شويه..قريت الكلام اللي كتبتو كزا مره و بعدها قررت اني ما اعتمد المشاركة
والسبب .. ما ادري

[Daniaa.]

أحب الرسم ..اعشقو بمعنى اصح...
واتمنى اتمنى اني اتقنو... انا عندي القدرة على الرسم لكني لسا مبتدئه..
وعشان اسير متقنة له..لازم ارسم وارسم وارسم .. وادرب يدي كتييييير...
بس في مشكلة...انو الرسم مرتبط بحالتي المزاجية..
يعني مو في اي وقت اجي امسك المرسام وابدأ ارسم تزبوط معايا الرسمه
و نادرا ما اكون في المزاج المناسب للرسم ..

في بداية الصيف دخلت دورة الوان زيتية .. عملت لوحتيين بس لسا محتاجة لبعض التعديلات ..اللي ما ادري متى حسويها.. -_-
احتاج اللون الابيض عشان اسوي التعديلات دي بس مافيا انزل المكتبة اجيبو ..او حتى اطلب من احد يجيبو ليا على طريقو.. اخ بس فيا كسل مو طبيعي

قريب ضربت غرفتي بويا .. وطلبت تكون البويا ساده "لون بس" على اساس اني ارسم عالجدار ..
مر لين دحين تلاته شهور وداخلين في الرابع وانا ... و السبب يعود الى ...



متعبٌ انت يا مزاجي ..

[Daniaa.]

يــاانها لزيزة هادي الشروق

[Daniaa.]

القراءة شي ممتع .. و ممتع جدا .. بس لمن تكون من هواتها
احسد اللي عندهم حب للقراءة و الاطلاع .. السبيل الوحيد للارتقاء و التعلم في نظري
حتى لمن تشوف احد ماسك كتاب وقاعد يقرأ.. تحس له هيبة كدا ما ادري كيف

بس من الحاجات المملة في القراءة .. انو لازم ترجع تقرا الكتب اللي خلصتها عشان ترسخ المعلومات اللي قريتها و تستفيد منها في حياتك.
في طريقة تانية قالها واحد بس برضها تطفش ..انو اكتب الحاجات اللي ابغاها في ستيكي نوتس والصقها في اي مكان امر من عندو دايما.. واسير اقراها كل ما شوفتها الين احفظها .



ابى اعود نفسي اني اقرأ .. بس ما اعرف كيف...امل واطفش سواء اللي كنت بقراه كتاب او رواية .
قبل فتره جاني حماس مو طبيعي للقراءة
كنت اخد كتاب اشوف من كم فصل وكم صفحة يعني زي احللو :d وعلى اساسو احطلي مده معينة لازم اخلصو فيها .
خلصت بالطريقة دي كتابين على ما اظن.. بس دحين الحماس دا اتبخر .. ذهب ولم يعد

صار دحين من الحاجات الاساسية اللي لازم تكون في شنطتي ..كتاب. عشان لو خرجت اي مكان وكنت طفشانة اخرج الكتاب دا و اقعد اقرا فيه

[Daniaa.]

اشعر بتخمه.. احس بطني بتنفجر ..
من الاكل اللي اكلتيه << اي اكل دا الله يخليكي



هوا اللي ياكل بدون نفس كدا يسيرلو d: