لذوي الخبرة

[toofey]

السلام عليكم
اخواتي العزيزات ام حمدان- ونور العمر
ياليت نعرف تجربتكم الشخصية في تقديم البريزنتشين
يعني كيف كان الموضوع وطريقة تقديمك له وطريقة تقييم الاستاذة وعن ايش يتكلم ويعني لمى تلقي الموضوع اتخيل نفسي اني في الاذاعة المدرسية مثلا او كاني اشرح درس او اقدم في التلفزيون والا بالغت شوي
واهم شي طريقة الاختيار للموضوع
يعني تنصحونا بالمواضيع اللي في المنتدى(موسوعة في البريزنتشين)والا لازم يكون الموضوع من اجتهادي يعني انا ابحث عنه وارتبه عشان اكون متمكنة من الموضوع اكثر
ومشكورت حبيباتي عن جد انتوا احسن ناس في المنتدى وماتبخلوا على الكل الله يوفقكم

[ام حمدان]

وعليكم السلام ورحمة الله وبركاته

عزيزتي موضوع البرزنتيشن الافضل تكوني انتي كاتبته لكن اذا خايفه انه تكون عندك اخطاء فيه وخايفه تنقصي عليها خذي موضوع جاهز وحاولي تحطي لمستك فيه او اعيدي كتابته بأسلوبك

يعني موضوع البرزنتيشنات حاطينه للزنقات --وكمان ممكن تآخذي منه افكار تساعدك في كتابه برزنتيشن من انشائك

انا افتكر
عملت موضوع من انشائي وتصفحت كم موضوع خاص بنفس موضوعي عشان اخذ افكار زياده واشوف الافضل واكتبه وكمان عشان اتأكد من تراكيب الجمل عندي كيف

وعشان لو سئلتي الاستاذه عن شي يخص موضوعي من اي ناحيه اكون مستعده

لمن رحت القيتها عليها حاولت ماارتبك لكن ارتبكت شويه ونقصت على ارتباكي ولا كل شي قالت لي اوكي
لانه تقولي موضوعك كويس من ناحيه القرامر ونطقك وكل شي بس ارتبكتي شوي وعشان كذا نقصتني شي بسيط

عموما انا مابينت لها اني حافظه لاني اصلا وانا اتكلم عن موضوعي زودت كم معلومه من عندي عن الي كتبته تلقائيا لاني كنت فاهمه ايش قاعده اقول مو بس حافظه وطبعا اكيد هي تلاحظ هالشي تعرف تميز الي تسرد كلام حافظته من الي تكون فاهمه ايش بتقول ومو معتمده على الحفظ
ولمن كانت تسئلني اجاوبها بجمل كامله وهذي نقطه مهمه نبهتنا عليها الاستاذه في المحاضرات فانتبهي للشي ذا

اممم وبس هذي اهم الاشياء عن البرزنتيشن


بالتوفيق

[Fahdah.k]

السلاااااام عليكم مع اني ماذكرت بالاسم بس حبيت اتلقف واشارك هههه
الاخت ام حمدان كعادتها ماقصرت في اجابتك يعطيها العافيه بس بما اني اذكر بالضبط الي صار معاي في مستوي ثالث حقولك عن تجربتي انا بعد ،، زياده الخير خيرين هههه
شوفي حبيبتي انا عرفت عنه وقت الاختبار ماكنت ادري قبل قلتلها وشرحت لها اني توني ادري تفهمت وضعي وقالتلي تعالي بعد بكره الي سويته بالضبط هو : رجعت الهوتيل فتحت النت طلعتلي موضوع عن المولات والشوبينق لقيت كثييييير اخترت اسهل وامتع واحد اخذت منه كم مقطع وكم فكره واكيد كتبت كم حاجه من عندي وكتبتها باسلوبي،، مثلا تكلمت عن الاسواق انها فيها جهه مطاعم وملاهي للاطفال وقهاوي وفيها جلسات للعيله وفيها محلات كذا وكذا واحينا تحتوي علا مكتبات ومن هالحكي طبعا انا كتبتها في ورقه وقعدت اقراها علي نفسي لمن فهمتها كويس ورحت للمس وقالتلي يالله يا فهده تولك تو مي وقعدت ابربرعليها بطريقه سوالف مو سرد حكي ابدا،، اهم شي انك تكونين وااااااثقه وتحاولين تتكلمين عن كل حاجه وبتوقفك تسالك ماراح تطولين تحكين ،، مثلا سالتني انتي من الرياض؟ قلت ايه قالك ايش رايك باسواق جده وقعدت احكيلها قالت قوليلي ايش مول رحتي وايش زرتي ،، جدا سهل بس يبيله ياحبيبتي تركيز حبتين ،، والله يوفقك يارب ،،، اســـــــفــــــه عالاطاله

[toofey]

مشكورة ام حمدان والاخت فهده واتمنى التفاعل اكثر مع موضوعي

[nour al3mr]

{.. وعليكـم السلام ورحمة الله و بركـاته ..}

حياك الله تووفي ..~

البريزنتيشن عندي معاه قصص ..
لأنه لمـا درست آورال 1 .. كان العرض المقرر علينا عن الإحتباس الحراري global warming
أما آورال 2 .. كان مقرر علينـآ 7 بريزنتيشنز..

المهم من هذا كلـه ..

أختاري موضوع أنتِ حابه تتكلمي عنه ..
ويكون عندك خلفيه عن محتواه ..
وتكون الكلمـات سهله بالنسبه لك ..
لازم تتدربي تمـام على كيفيه النطق للكلمـــــــات..

أتدربي قدام مـراية كأنك تكلمي البنات و الأستـاذه ..
لازم تراعي أنه لما تعرضي ماترتبكي وتلعبي بشعرك أو بأظافرك ..و حرة عيونك يحاسبوا عليها.eye contact
كمـان لو كان عندكم عرض بالداتا شو ( البوربوينت ).. لازم العرض بس يحتوي على صـور ويادوب عناوين رئيسية head line
مايكون في كلام كثير ..
لازم ماتبيني لهـا أنك حافظه .. لانه لو حست انك حافظه راح تسألك عشان تتأكد ..وهما في كل الأحوال يسألووا .. فالأفضل تكوني مستوعبه الموضوع ..

لازم تراعي الوقت .. والمدة الزمنيـــــــة ..

أفتكر سويت عرض عن لغة الجسد body language
عن شركتي باتشي و باسكن روبنز
عن قصتين ..
عن كيفية الإستعداد للإمتحانات

وبإذن لله بيسهل عليك لاتخافي ..
المهم تتدربي مزبوط ..

يوفقك رب العبـآآآد ..~

[toofey]

مشكورة قلبي نور العمر بس البنات قالو مولازم عرض لان مدة التقديم 5 دقايق وانتي ايش تشوفي

[nour al3mr]

خلاص ياقمـر لا تعملي عرض ..
المهم هو طريقة القـائك للموضوع ..

[ام حمدان]

توفي ياعسل لا تنسي نور العمر انتظام وفي اختلاف بيننا ---هم استاذتهم كانت شارطه هالشي اما استاذتنا مايشرطوا هالشي هو شي اختياري لو تحبي تعمليه مافي مشكله بس لانه احنا انتساب ووقتنا ضيق مايطالبونا بالشي ذا

بالتوفيق

[toofey]

تسلمو قلبو على التوضيح

[رغد محمد]

وعليكم السلام ورحمة الله وبركاته ..

موضوع خطنــــــــــــــــــــطر توفي ...

ياشيخة روحي الله يسعدكِ وتجيبي الفل ماااااااااارك في البريزنتشن تبعكِ ...

أشكر العسولات على مشاركاتهن في المعلومات ..

في نظري انا أحسه حمـــــــــــــــــــــــــــــــاس ...>>متحمسة الأخت ..

خصوصًا أني متعودة على الوقوف أمام الآخرين والمناقشة والشرح وهذه الأشياء ...

شعور جدًا رائع ...

توفي ياعسل ...

نصيحة .. حتى وإنتِ تذاكري حاولي تذاكري كأنكِ تشرحي لأي أحد ...

صدقيني هذا الشي راح يساعدكِ كثير في البريزنتيشن قلبو ...

وما شاء الله العسولات ماقصرن ..

الله يحفظكِ ويسهل أموركِ قلبو ...

رغوووودة ..