تجمع طالبآت خطه(ب) للاستعدآد للاختبآرآت النهآئيه>نفيد ونستفيد~

[رنيم سليمان]

أولا لازم تعرفي ان اختبار مربع كاي الفرق بينه وبين سابقه

انه يستخدم للبيانات الوصفيه يعني العلاقة بين صفتين


نبدأ بالخطوة الأولى :


صياغة الفروض

بتكوِني فرضين الأول : فرض العدم وهو يعني " عدم وجود علاقة بين الصفتين "

الثاني فرض البديل "وهو يعني وجود علاقة بين الصفتين "

وخذيلك معلومه عشان تقدري تفهمي معايا آخر خطوة

لو قلنا " رفضنا فرض العدم " معناه اننا قبلنا فرض البديل

ولو رفضنا فرض البديل معناه اننا قبلنا فرض العدم

وهالشئ بديهيا


ننتقل للخطوة اللي بعدها :


رمز الخلايا في الجدول قبل مانطبق عليها قانون التكرار

يكون Oij



أول شئ الخلايا اللي عندك في المثال اللي تبدأ بالرقم 170

هي الخلية الأولى في الصف الأول يكون رمزهاO11



الرقم الأول 1 بَدل الآي لأن الآي تعني رقم الصف والـJ تعني العمود

بالتالي هذا الرقم يعتبر الصف الأول بالعمود الأول

ولو انتقلنا مع بعض لنفس الصف بس العمود الثاني يعني رقم 50

حيسير O12

لأنها بالصف الأول للعمود الثاني ..

وهكذا ~



إلى الآن مابدأنا بالخطوة الثانية يعني مُجرد توضيح عشان تقدري تفهمي هالخطوة




يُتبع

[رنيم سليمان]

الحين نبدأ نطبق القانون

شوفي القانون بصفحه257

أول شئ بما إننا حنطبق هذا القانون معناه نسوي جدول ثاني

والجدول الأول بيكون مُعطى عشان تقدري تطبقي عليه القانون وتستنجي الجواب



القانون باختصار :

مجموع الصف الذي به الخليه x مجموع العمود الذي به الخليه

على مجموع التكرارت يعني حجم العينة




*مجموع الصف الذي به الخليه :

يعني مثلا الخليه الأولى اللي رقمها 170 مو هي في الصف الأول ؟

طيب ايش مجموع الصف الأول ؟


زيما هو كاتبلك على طول بيمينك مجموعه 220


* مجموع العمود الذي به الخليه


يعني بنفس الرقم 170 هو في العمود الأول

ننزل تحت ونشوف ايش مجموع العمود الأول ؟

زيما ظاهر لِك 240



* مجموع التكرارات " حجم العينة "

وهي عباره عن المجموع الكامل يعني بآخر الصف مو كاتبلك " سيجما "

تشوفي نهااايته المجموع الأخير هو =400


بالتالي حيكون 220 في 240 على 400

ويطلع لِك الجواب بالجدول اللي تحت بصفحه 259 : 132

وطبعًا هالشئ تطبقيه بيدك مع كُل الأرقام عشان تقدري تسوي جدول كامل

راح تفهميني أكثر لو كتبتي وحليتي وتأكدتي من الأرقام اللي بالجدول طلعت نفس نتايجك ولالا



-طبعا هنا بيكون رمز الخلايا بَدل الـO

تكون E لانك طبقتِ عليها القانون و انتهيتي




ننتقل للخطوة اللي بعدها

يُتبع .

[رنيم سليمان]

راح نحسب احصاء الاختبار وهو عبارة عن ايجاد x2 " اكس اس تو "

وقانونها مجرد تعويض مُباشر مكتوبه عندك في نفس الصفحه


أجي أطبقها لِك في نفس المثال

حاطلك أول شئ " الـo" يعني رقم الخليه قبل ماتسوي فيها القانون

عشان كده لازم يكون الجدولين قدام عينك الاول المعطى والثاني اللي سويتيه

ثاني شئ حاطينلك هو في القانون الـe" يعني بعد التطبيق

هذولي الاثنين ناقص بعض اس اثنين .. على الـe نفسها مره ثانيه << مجرد شرح للقانون



التطبيق :


أولا نروح للجدول ونمسك خليه خليه

عندك الرقم 170 مو هو الرقم الأول ؟ بس قبل التحويل يعني o

والـ170 بعد ماطبقنا عليها القانون E سار رقمها 132

يعني (170 -132 ) أس اثنين قسمة 132


يطلع لِك الجواب وتكملي بباقي الأرقام زيما هو كاتبلك صفحه 260

طبعًا تجمعيها كلَها مع بعضها وبيطلع لِك الجواب



الجواب اللي طلعلك هو عبارة عن الـx2 الفعلية

والحمد لله = )



ننتقل للخطوة قبل الأخيرة

[رنيم سليمان]

الآن نحسب الـX2 النظرية

لازم تفرقي بين كلمة " فعليه ونظرية "


اللي طبقناها قبل شوي فعليه والآن بنبدأ بالنظرية

النظريه برضو تطبيق مُباشر في القانون المكتوب صفحه258


زيما هو كاتبلك إن الـC عباره عن عدد الاعمده

والـr عباره عن عدد الصفوف


والألفا " مستوى المعنويه " بتكون مُعطى او تحسبيها من الجدول الصغير اللي حفظتيه

" حسب مايجيك بالسؤال "



طيب كيف نعرف عدد الصفوف

عدد الصفوف طبعًا اهم شئ مو مع العجله والنظره السريعه

تحسبي صف " السيجما " لانه هذا مجموع هو ضايفلك ومعطيك

لكن الصفوف الأساسيه هي أرقام المدخنين والغير مدخنين

طبعا برضو الصف اللي مكتوب عليه مدخن وغير مدخن ماينحسب

بس مجرد تنحسب الصفوف الثلاثه تحت " كلمة مدخن وغير مدخن " يعني بشكل عام

تحت العلاقتين الوصفيه تحسبيه صف اول بيكون وصف ثاني وثالث وتوقفي

السيجما زيما قلت ماتحسبيها ابدًا



يعني طلعت ثلاث صفوف طيب الاعمده كم ؟

العمود الاول هو أرقام العمود للمدخن والثاني للغير مدخن

يعني عمودين



طيب .. نطبق القانون

يقول لك الاكس تو النظرية " آر ناقص واحد "

يعني عدد الصفوف 3 -1 = 2

والقوس الثاني :

سي ناقص واحد

يعني عدد الاعمده 2-1 = 1

" طبعا بنضرب جواب القوس الأول بجواب القوس الثاني "


بالتالي 2X1 = 2


يعني ( 2 ، الألفا ) والالفا " مستوى المعنويه " اعطاك هي بقيمة = 0.05

والحين تروحي بالجدول الكبير آخر الكتاب الخاص بـ" مربع كاي "

وتشوفي رقم 2 لمن يلتقي مع 0.05 كم يطلعلك ؟


بيطلع معك 5.991


الحين ننتقل لآخر خطوة اللي هي بتحددي القرار الأخير والمطلوب .

[رنيم سليمان]

بما اننا جبنا الاكس تو الفعليه والنظرية

الحين راح نسوي الخطوة الاخير على اساسها وهي تحديد القرار


القرار يقول اذا كانت اكس تو الفعليه اقل من قيمة اكس تو النظرية

يعني لاتوجد علاقة بين الصفتين " اثبات فرض العدم " يعني قبول فرض العدم



ولو كان اكس تو الفعليه اكبر من قيمة اكس تو النظرية

معناه توجد علاقة بين الصفتين " فرض البديل " يعني رفض فرض العدم






وزيما هو موضحلك كمان في الرسمه صفحه 258




نقطة مهمة : وانت تقري شرحي خلي الكتاب مفتوح قدامك وشوفي الامور اللي باشرلك عليها

عشان تفهمي ومرسامك بيدك



وبس ياحلوة ^^





اذا اصبت فمن الله واذا اخطأت فمن نفسي ومن الشيطان..



تكفيني دعواتك ودعواتكم جميعًا

موفقين يارب ~