ممكن تساعدوني في اختيار الرغبات ؟ انا محاسبة

[رشة عطر]

السلام عليكم ورحمة الله وبركاته

طبعا سؤالي جا مررا متأخر .. بس قلت حرام يكون عندي فرصة وما استغلها

المهم .. انا تخصصي محاسبة

وناوية اكمل ماجستير في نفس تخصصي ان شاء الله

وحاطه فبالي رغبه ثانيه ادارة اعمال .. على اساس درست مواد ادرة اعمال في البكالوريوس وكانت حلوة وممتعه .. بس برضو نفسي انقبل في المحاسبه

طبعا الرغبة الثالثة مررا ما في شي فبالي .. بايش تنصحوني ؟

ابغى برنامج قريب من تخصصي

مع العلم اني ما اقدر اقدم على البرامج الخاصه لانهم طالبين خبرة عملية وانا حديثة التخرج

الأخ فندام .. يهمني رأيك

ومشكورين مقدما

.

[طموحهـ ولكنـ]

اجل خلاص ننتظر الاخ فندام اول شي وبعدين نساعدك .

وينك يافندام !!

دوعاابة

طيب شوفي تخصص ادارة معلومات او تخصص مهارات اتصال . او اختاري اي تخصص من تخصصات كلية الادارة >> ان شالله اقتراحي يعجب فندام

[فندام]

أول شي اشكرك على الثقة الكبيرة الي اوليتها لي واتمنى اني اكون اهل لها

ثاني شي الي فهمتو منك انك حتقدمي على الماجستير العام مش الماجستير الخاص بس في هنا معلومة مهمة جدا انت ماتعرفيها وهي انو صحيح ماجستير المحاسبة المهنيه (الماجستير الخاص) يشترط خبرة عمليه لاتقبل عن ثلاث سنوات بس للمتقدمين الي تقدبرهم يكون جيد او حتى جيد مرتفع بشهادة البكاريوس اما المتقدمين الي يكون تقديرهم جيد جدا فيسقط شرط الخبرة العمليه عنهم فلو كان تقديرك جيد جدا فخلاص قدمي على ماجستير المحاسبة المهنية وهنا في نقطة مهمة أخرى لازم تحطيها ببالك وهي انو عدد المقاعد المتاحة بكل من برنامج الماجستير العام والماجستير الخاص فعندك بالنسبة للماجستير العام عدد المقاعد المتاحة لايتجاوز 10 مقاعد في الغالب ولو حصل وزادو عدد المقاعد فتحتوصل ل 15 مقعد فقط وهدا معناه انو كل المقبولين حتكون معدلاتهم فوق ال4 طبعا ممكن تقولي انو اختبار القدرات واختبار كفايات لهم دور بالقبول هدا صحيح بس تصوري بالنسبة للماجستير العام انو المعدل لازال هو العنصر الأكثر تأثيرا بالنسبة لتحديد المقبولين بالماجستير العام خصوصا انو عدد المتقدمين في تزايد مستمر وعدد المقاعد المتاحة ماحصل فيها اي زيادة ملحوظة تواكب الزيادة المظطرة في عدد المتقدمين ولاحظي معايا انو الطالبات صراحة اشطر من الطلاب ومعدلات اغلب الطالبات بتكون مرتفعة وهدا حيخلق منافسة كبيرة جدا بينهم على الفوز بمقاعد القبول المتاحة بالماجستير العام طبعا أنا ماودي احبطك ولا اثبط من عزيمتك بكلامي هدا لا ابدا ولكن انا ودي احطك بالصورة فيما يتعلق بالماجستير العام وحقيقة مشكلة الماجستير العام بتخصص المحاسبة وغيره من التخصصات الاخرى هو قلة عدد المقاعد المتاحة مع العلم انو ماجستير المحاسبة العام يقبل تقدير جيد مرتفع كحد ادنى والدراسة فيه اما تكون برسالة ومققرات دراسية وهي الاصعب أو بمقررات دراسية ومشروع بحثي وهي اسهل من الرسالة بس طبعا الاثنين بدهم مجهود كبير والرسالة او المشروع البحثي حسب بيكون عليه عدد كبير من الساعات ممكن تكون 9 ساعات او 12 ساعة في حالة الرسالة يعني حيأثر كثير بالمعدل
اما بالنسبة لماجستير المحاسبة المهنية (الماجستير الخاص) ففيه مرونة اكثر من الماجستير العام فهو يشترط تقدير جيد جدا او تقدير جيد مع خبرة 3 سنوات على الاقل وايضا عدد المقاعد التاحة بي توصل ل 40 مقعد و بالنسبة للدراسة المحاضرات بتكون باخر الأسبوع (أربعاء وخميس وجمعة) والمحاضرات كل اسبوعين يعني حيكون اسبوع فيه محاضرات واسبوع مافيه محاضرات مش زي الماجستير العام الي المحاضرات بتكون فيه كل اسبوع من السبت للأربعاء غالبا ورسالة الماجستير بتكون عبارة عن مادة اسمها قاعة بحث تتكون من 3 ساعات فقط زي اي مادة عادية من مادة من مواد الخطة الدراسية والمجهود المبدول فيها يكون اقل بكثير من المجهود الي حيبذل بالرسالة او المشروع البحثي بالماجستير العام
فالي اشوفه انك تعيدي النظر بالنسبة لنوع البرنامج الي حتقدمي فيه وتختاري الماجستير الخاص لو كان تقديرك جيد جدا لأنو فرص القبول بالماجستير الخاص حسب رايي اكبر من فرص القبول بالماجستير العام بكثير بسب المرونة الواضحة بالماجستير الخاص مقارنة بالماجستير العام

اما لو كان تقديرك مش جيد جدا فمالك الا الماجستير العام قدمي فيه والله يسهل امورك وتكوني من المقبولين باذن الله وحطي ببالك انو مافي شي مستحيل اما بالنسبة للخيار الثالث الي انت محتارة ايش تحطيه فالي اشوفه انك تختاري ادارة عامة لانو هدا التخصص ياتي بالمرتبة الثالثة بعد المحاسبه وادارة الاعمال من حيث حاجة شوق العمل بكلية الاقتصاد ولادارة والي فهمتو من كلامك انك بدك الرغبة الثلثه ايضا بتكون من ضمن برامج الماجستير بكليه الاقتصاد والادارة ام بالنسبة لماجستير الاقتصد وماجستير العلوم السياسيه ماانصحك بيه
هدا هو كل الي عندي ولو احد من الزملاء عندو تعقيب او تصحيح او اضافة على اي شي من الي دكرته ياليت مابيخل علينا وبالتوفيق يارشة عطر وان شاء الله يوم 29/6/1432 تدخلي المنتدى وتبشرينا بخبر قبولك بالماجستير بس نت اتوكلي على الله وقدمي

[رشة عطر]

المشاركة الأصلية كتبت بواسطة طموحهـ ولكنـ اجل خلاص ننتظر الاخ فندام اول شي وبعدين نساعدك . وينك يافندام !! دوعاابة طيب شوفي تخصص ادارة معلومات او تخصص مهارات اتصال . او اختاري اي تخصص من تخصصات كلية الادارة >> ان شالله اقتراحي يعجب فندام

انا كنت ابغى تخصص قريب من المحاسبة


مشكورة يا قلبي على ردك

.

[رملة الحسني]

السلام عليكم ورحمة الله وبركاته

انا اشوف انك تقدمي على ادارة اعمال او الادارة المالية اظن الادارة المالية قريبة من تخصصك
لكن ماني متأكدة لو هي موجودة بجامعة عزوز ..
لأن الادارة في أي شركة أو اي عمل تنقسم لقسمين ادارة العمل وادارة المال والقسمين بنفس الاهمية طبعاً .. مكان ما تنحطي بأي شركة بأي ارض بإذن الله تلاقي نفسك ما تضيعي

عشان كدة افضل التخصصين الي ذكرتهم لكِ
وبالتوفيق يارب .. حاولي تختاري الانسب لمجال العمل بشكل عام
الله يحقق لك الي تتمنيه واكثر

[رشة عطر]

المشاركة الأصلية كتبت بواسطة رملة الحسني السلام عليكم ورحمة الله وبركاته انا اشوف انك تقدمي على ادارة اعمال او الادارة المالية اظن الادارة المالية قريبة من تخصصك لكن ماني متأكدة لو هي موجودة بجامعة عزوز .. لأن الادارة في أي شركة أو اي عمل تنقسم لقسمين ادارة العمل وادارة المال والقسمين بنفس الاهمية طبعاً .. مكان ما تنحطي بأي شركة بأي ارض بإذن الله تلاقي نفسك ما تضيعي عشان كدة افضل التخصصين الي ذكرتهم لكِ وبالتوفيق يارب .. حاولي تختاري الانسب لمجال العمل بشكل عام الله يحقق لك الي تتمنيه واكثر

للأسف مافي تخصص ادارة مالية في جامعة الملك عبدالعزيز

ان شاء الله محاسبة وبعدها ادارة اعمال


الف شكر لردك على موضوعي


بالتوفيق ان شاء الله

.