العروس العجرميه ياترى مين حتكون؟؟؟؟؟؟؟؟؟؟

[طالبة مستجدة]

جايبلكم حكايه عجبتني من حكايات الف خيبه وخيبه اللي تشبه عاوزه اتجوز في مضمونها وربنا يسعد كل البنات ويرحمنا من نانسي وهيفا واخواتهم




جائني يا قراء يا كرام ... أنه وفي احدى الأيام
وبعد ان علمنا بعرسان مخبوطة السقع ..
وانه لا يتقدم لها الا ..

المتردية والنطيحة وما اكل السبع
جاءت قريبة مخبوطة ... وجايبالها هذاالعريس النطع
اللي بيقولوا عليه لقطة .. حيث أنه وسيم ومتعلم
وعيونه ملونة زي القطة


ام العريس : ما شاء الله عليكي يا مخبوطة .. انا قلبي فرح اول ما شفتك
انا : ميرسي يا طنط
قريبة مخبوطة : مش قلتلك يا ام حسين ان مخبوطة زينة البنات
ام العريس : أي والله .. ده كفاية اسمها .. انا ابني قبل كده جيت اخطبله بنت زي القمر شعرها اصفر وعنيها ملونة و اسمها عيشة .. مارضيش هاهاها .. قالي يا ماما اتجننتي انا اتجوز وحدة اسمها عيشة ! .. هاهاها
( رفضها عشان اسمها عيشة ؟ .. هي البنات بقت تترفض على اساميها كمان ! )
ماما : ده اسم زوجة الرسول عليه الصلاة والسلام !
ام العريس :ما انتي عارفة شباب الايام دي هاهاها .. عايزين اسم على الموضة .. لكن المرة دي الحمدلله مخبوطة مش ناقصها حاجة ...
( طب فتشيني كويس لكون ناقصة برغي كده ولا صمولة كده ..)

وأثناء الحوار الذي ينم عن الدقة اللامتناهية لابن الست هانم في اختيار عروسة المولد .. جاء بالصدفة على التليفزيون .. الكليب السحري الذي يسلب الباب الرجال .. واللي كان ساعتها جديد ومكسر الدنيا
اخاصمك آه .. أسيبك لا .. وجوة الروح هتفضل حبيبي اللي انا بهواااااااااااه

التفتت ام العريس فجأة عليا .. زي اللي اكتشف عنصر كيميائي جديد هيتضاف للجدول الدوري


ام العريس : على فكرة .. انتي فيكي شبه من المغنية دي
( يا نهار اسود !! انتي حوليتي يا ولية ولا ايه ! )
ماما : اعوذ بالله .. بقى مخبوطة اللي بتصلي الصلاة بوقتها شبه العفريت ده !
قريبة مخبوطة : لا مخبوطة احلى .. هاهاهاهاها
( يا ولية انتي وهي هتبوظولي مشروع الخطوبة ده بكلامكم اللي يودي في داهية ! شبان الايام دي عقولهم صغيرة وما بيصدقوا )
انا : لا يا طنط شبه ايه وبتاع ايه ...
ام العريس : لا فيكي شوية منها ..
انا :هو في وحدة بتطلع في التليفزيون وما قالوش اني شبهها .. حتى نعيمة الصغير قالوا ان فيا شبه منها
ام العريس : هاهاهاهاهاهاهاهاها دمك خفيف يا مخبوطة ..
والتفتت ام العريس لقريبتي وقالتلها : مش عارفة اشكرك ازاي انك جبتيني للناس العسل دول
ماما : هاهاها .. ربنا يخليكي كلك ذوق
ام العريس : انا هستأذن عشان اتأخرت .. بكرة ان شاء الله هتصل بيكوا عشان نحدد موعد للزيارة الجاية عشان حسين يشوف مخبوطة
ماما : ان شاء الله ربنا يسهل

بعد ما ام العريس مشيت :
انا : انتوا بتسيبوا التليفزيون شغال ليه لما يكون عندنا ضيوف ! .. كويس كده اهي بتقول اني شبه نانسي عجرم !
ماما : دي بتهزر بس
- يا ماما الست شكلها ما صدقت هتروح تقول لابنها ان العروسة شبه نانسي عشان يوافق عالعمياني
- انتي اتهبلتي ؟ هو في حد يوافق على بنت عشان شبه وحدة بترقص في التليفزيون ؟!
- ايه يا ماما ! .. انتي الظاهر مش عايشة في الدنيا !!


وكما توقعت مخبوطة .. راحت ام العريس وقالت لابنها الجملة اللي بيتمنى كل شاب انه يسمعها
( العروسة شبه نانسي عجرم )

تاني يوم الساعة 5 بالزبط ...
كان العريس جاي جري وقاعد في الصالون بيستنى طلة مخبوطة
بركاتك يا ست نانسي
كان متوقع ان نانسي عجرم هتخرجله بفستانها الاسود الشفتشي وشعرها الاحمر المتوهج المتموج
وتلف قدامه برشاقة وهي بتقوله :
ان كان عليك بسوق دلالي ويخطر في بالي اعاند هواك
وتغنيله وهي بتنط على الكنب بخفة .. وتتعلق في النجفة .. وتتشقلب وخصلات الشعر المتوهجة تطير في الهواء ..
وتشده من الكرافتة وتخبطه بالقلم وتدلق عليه جردل المية
وهو قاعد مسحوووور .. مبهوووووور ..
عينيه محولة ولسانه متدلل

ولكن .. خاب أمله
لما لقى مخبوطة بنت عادية محجبة .. حاملة صينية العصير وداخلة الصالون مرتبكة
والأهم ..
انها مش بتغني .. أخاصمك آه


أنا : السلام عليكم
العريس : وعليكم السلام ورحمة الله

ايه الولد اللي زي القمر ده !
طول بعرض وشبه الاجانب .. اخيرا هتتجوزي واحد يحسن النسل مش يبوظه يا مخبوطة


العريس .. فضل ساكت .. بيبص عليا ويتأمل في صمت .. صمت الحملا .. قصدي صمت العرسان

ام العريس : ازيك يا مخبوطة ؟
انا : الحمدلله

العريس ده غريب .. شوية يبتسم .. وشوية يعقد حواجبه .. وشوية يسكت بدون اي تعبير .. هو في ايه !
بعد شوية ميل على امه ووشوشها ..
ربنا يستر !

ام العريس : مخبوطة .. تعالي معايا جوة شوية عايزاكي ..
مخبوطة : اه اتفضلي يا طنط

ودخلت الاوضة ومعايا ام العريس وقريبتي اللي جابت هذا العريس الخنفشاري
ام العريس : اقلعي السابوه يا مخبوطة ..
انا : ليه ؟
قريبتي : هاهاها يابت اقلعيه ما تخافيش
وقلعت السابوه .. وجت ام العريس قلعت جزمتها ووقفت جمبي ..
وقالت لقريبتي : بصي كويس .. اطول مني بقد ايه ؟
( ايه الهبل ده ! )
قريبتي : اطول منك ييجي كده باتنين تلاتة سم
ام العريس : انا قلت لحسين امبارح ان العروسة اطول مني اصر يعرف هي اطول مني بقد ايه
( ده مجنون رسمي بقى ! )
قريبة مخبوطة : وهو حسين هيلاقي زي مخبوطة فين ؟! بزمتك في كل العرايس اللي شفتيهم شفتي وحدة اجمل منها ؟
ام العريس : الشهادة لله لا ... يارب يابني يجعلها من نصيبك ... قربي عليا يا مخبوطة ..
انا : في ايه طنط ؟
قريبتي : مافيهاش حاجة .. قربي يا مخبوطة ..
( وفضلت واقفة مكاني مش عارفة اعمل ايه .. قامت ام العريس مقربة عليا ومبحلقة في عنيا ..)
ام العريس : لون عنيكي ايه ؟
انا : عسلي يا طنط
- هاها اصل حسين قالي دققي كويس في لون عنيها ..
- يا سلام !
- طب اقلعي الايشارب كده عشان اتأكد من شعرك ..
قريبتي : يا ست ام حسين ما انتي شفتيها امبارح !
ام العريس : ايوة بس حسين قعد يسألني عن لون شعرها وطوله بالزبط معرفتش اقوله ايه قلت ما اشوفه تاني ..
( الحق عليا اللي ما اديتكيش الكتالوج بتاعي وانتي ماشية امبارح ! )

شعرت مخبوطة انها مش بني آدمة لحم ودم واحساس .. وانها مجرد تلاجة إل جي عايزين يشتروها
وتغلل جواها الاحساس ده لدرجة انها كانت هتبتسم في وش ام العريس وتقولها :
إل جي .. العرسان أول اهتماماتنا

اخرجي يا مخبوطة من الاوضة قبل ما تبقي تلاجة بجد .. اخرجي

خرجت بسرعة من الاوضة ورحت الاوضة تانية وقعدت ازعق : ايه التخلف ده !!!!!!!
مرات اخويا قامت بسرعة وقفلت باب الاوضة عشان العريس وامه ما يسمعونيش : وطي صوتك يا مخبوطة الناس هيسمعونا
انا : ما يسمعوا ! ... ايه القرف ده ! تقولي لون عنيكي ايه ! هيكون ايه يعني !!
- معلش يا مخبوطة بنات كتير بيحصلهم كده ..
- هما جايين يشتروا جاموسة !!!!
- خلاص يا مخبوطة عديها معلش بكرة تنسي .. المهم تخلصي من القرف ده وتتجوزي .. احسن ما تيجي كل يوم وحدة وابنها يعملوا كده .. مشيها المرة دي واخلصي .. معلش اخرجي اقعدي معاهم دلوقتي ..
- مش خارجة ..
- يا مخبوطة عشان خاطري خلي المركب تمشي ..
- مش خارجة يعني مش خارجة !!

دخلت ماما الاوضة : العريس وامه عايزين يمشوا مش هتسلمي عليهم ؟
انا : لا
ماما : نعم يختي ؟! .. ليه ان شاء الله ؟
- اصلك ماشفتيش الولية امه عملت فيا ايه جوة !
- طب اخرجي سلمي عليهم دلوقتي وبعدين قوليلي عملت ايه ... عيب يا مخبوطة
- مش خارجة
شدتني ماما من ايدي ومرات اخويا تزق فيا من ورا لحد ما وصلت كان المحروس وامه وصلوا عند الباب ..
ام العريس : هنتصل بيكوا ان شاء الله .. مع السلامة

العريس .. بيبص تاني لمخبوطة وبيبتسم في صمت .. صمت العرسان ..

ومشي ومعاه امه اللي كانت طايرة بمخبوطة طير ..وفات يوم واتنين .. وتلاتة واربعة .. ورن التليفون
تررررررررررررررررن ترررررررررررررررن

ماما : آلو ..
قريبتي : الو ازيكوا ؟
ماما : الحمدلله .. مفيش اخبار عن العريس ؟
- ايوة .. هو قال .. انه عايز يقابل مخبوطة تاني
- هو كل شوية !!
- من حقه يا حبيبتي يشوفها مرة واتنين وتلاتة ... ده جواز
- طيب .. يتفضل بكرة لو يحب
- اوكي هقولهم وارد عليكوا ..

انا : في ايه ؟
ماما : ده العريس بيقول انه عايز يشوفك تاني
[COLOR="DarkOrchid"]- انا بقى مش عايزة اشوفه
- ليه ؟؟ .. عديها بقى[/COLOR]
- ده مجنون رسمي .. رفض بنت قبل كده عشان اسمها عيشة .. مش بعيد يرفضني عشان شكل قفايا مش عاجبه
- بطلي جنان .. وماتكونيش السبب في ميلة بختك .. شوفيه واقعدي معاه يمكن تكون ساعة رحمن ويحصل نصيب ونخلص بقى !

وخد العريس المبجل حسين موعد آخر .. وجه .. والمرة دي ماجتش مامته .. جت معاه اخته الكبيرة ..
انا حاسة ان الحكاية فيها إنة
ماما استقبلتهم ورحبت بيهم
خدت العصير على مضض .. ودخلت وسلمت عليهم

أخت العريس : ماشاء الله .. ماهي امورة اهي يا حسين !
( يا خبر ! هو قال عني وحشة ولا ايه ! )
حسين ( فهمي ) ضحك وبصلي : ازيك يا آنسة مخبوطة ؟
انا : الحمدلله
- انتي ناوية تشتغلي بعد الجواز ؟
- مش عارفة

ماما اللي قاعدة جمبي قرصتني عشان اكلم العريس عدل
رجع العريس يبصلي تاني بصمت .. وحركات الجنان اياها
شوية يبتسم .. وشوية يعقد حواجبه ويسرح
ويرجع يتأمل تاني في وشي

اخت العريس : .. انتي معاكي شهادات عالية يا مخبوطة معقولة مش عايزة تشتغلي بيها ؟
انا : والله حسب الظروف .. مفيش شيئ مضمون
ماما : دي حاجة ترجع لجوزها بقى هاهاها

اخت العريس : كل شيئ قسمة ونصيب
حطيت رجل على رجل وبصيت على العريس من فوق لتحت : هو حضرتك بتعمل ماجستير ؟
العريس : أأ .. لا .. هعوز ايه بالماجستير .. انا معايا بكالوريوس محاسبة وبشتغل في بنك
- ممممم
- انتي دلوقتي استفدتي ايه من الماجستير ؟
- حاجات كتير .. بيطور من الشخصية .. بيكبر العقل .. بيخلي الانسان عنده وعي .. كده يعني
حط العريس رجل على رجل وقال بكل فخر : انا الحمدلله .. مش محتاج الدراسات العليا
- كل واحد وله وجهة نظر
ماما : أأ .. انت بتشتغل في انهي بنك يا حسين ؟
العريس : بنك القاهرة

ورجع تاني العريس الوسيم .. يتأمل فيا .. زي اللي بيدور على عيل تايه في وشي .. او بالاصح ..
بيدور على نانسي

اخت العريس : احنا اتشرفنا بمعرفتكم يا جماعة والله
ماما : ربنا يخليكي الشرف لينا
- ان شاء الله هنتصل بيكو قريب
- ربنا يجيب اللي فيه الخير ...


وقف العريس عند الباب .. والتفت لمخبوطة وهو مبتسم ابتسامة عبيطة .. مخبوطة ماعبرتهوش ودخلت اوضتها
هو الواد ده صحيح شكله حلو .. انما باين عليه مريض .. يا اما مريض نفسيا .. يا اما عنده السل .. والله اعلم


وبعد 3 أيام .. التليفون تررررررن ترررررررن


ماما : آلو ..
قريبتي : آلو .. ازيكو
- الحمدلله .. هاه مفيش اخبار عن المحروس ؟
- مخبوطة تستاهل اللي احسن منه
- يعني ايه ؟
- والله يا حبيبتي ماكنت اعرف انه اهبل للدرجة دي .. لو كنت اعرف ماكنتش كلمته عن مخبوطة اصلا .. شفته طول بعرض وشكل حلو قلت ده ياما هنا ياما هناك
- هو يطول اصلا ان مخبوطة توافق عليه ! .. دي جزمتها تسوى عشرة زيه
- اصله .. بيقول .. انها مش شبه نانسي .. يعني .. انها ..
- يا نهار اسوووود !!!

( مش قلتلك يا ماما انك مش عايشة في الدنيا )




وراح العريس صاحب العقلية المجنونة .. لأنه مالقاش عروسة فل اوبشن بالكرتونة
اللي طالب عروسة في الشكل عجرمية .. وفي نفس الوقت متدينة وبنت ناس ومتربية
ما تروح للترزي تفصلها .. ولا ترسمها بالفوتوشوب وتبرمجها
ولا تعملها قالب فخار ولما ينشف تطلعها

وحطت مخبوطة ايدها على خدها .. بتفكر في العاهات اللي بتتقدملها
داعية ربها دعوة ولية .. يخلصها من هذه النوعية
اللي كانت السبب في خيبتنا القويه









تقطع بطني من الضحك موضوع شفته بمنتدى الفراشه للعضوه ندى البسمه

ربي يعين البنات على الحريم و الفحص الدوري ألي يسوووووووووووووه

[سنفورة موت]

هههههههههههههههههههاي هههههههههههاي جوننان مررة مت ضحك ربي يسعدك على النقل ويسعد العضوة اللي في الفراشه نزلتو

[روعة طموح]

من جد نحزن احنا الحريم جننو ابو اهلنا
بس القصة تحفة

[طالبة مستجدة]

هلا حبيباتي الله يسعدكم أهم شي أنتبهوا لا يسيرلكم مثل هذي البنت و بعدين تطردكم أم العريس بالشلوت
وتقووووووووووووووول ( قرف ) ماهم زي البولنديه حليمه وع عليهم هههههههههههههه

[وفاء جدة]

من قوانين القسم

يُمنع طرح موآضيع الضحك والوناسه في منتدى لها وفي حين طرحهآ سيتم اغلآقها

عليه يُغلق الموضوع