لكل الي يحب يساعدني بليز ابغى مساعدتكم و الله ما افهم شي في دي الأمور =(

[Dr.Passed]

السلام عليكم ورحمه الله وبركاته ورضوانه

ياجماعه انا حاخوش في الموضوع على طول الله يسعدكم ساعدوني

( انا قلتلكم على موضوعي بين الجامعتين لسا ما قررت بس داومت الأسبوع كلو في ابن سينا)

رجاءا ساعدوني قد ماتقدرو بليز

قعدت افكر اسأل مين وقلت انتو إن شاء الله حتساعدوني و تريحوني

أنا عندي مشكله طول حياتي مع القلق.و الهم و بعض الأحيان افضل غيري عن نفسي و اضحي كتير عشان غيري ( وهادا الشي يضرني كتيير) وبصراحه عيب فيا مو شي حلو..ودايما ما احب استشير احد في اي قرارات اسوي الشي بعدين اقول...ودايما الشي الي اسوي يضرني عشان من الأساس مابأستشير

زي ماقلتلكم...داومت في ابن سينا و معايا صحباتي ( مره قريبين من بعض و انا مرتاحه انو احنا سوا) و ازا ربي اراد اني اداوم في عبد العزيز السبت مع اني ( لا اخطط) لدا الشي بس ازا ربي اراد احس صعب عليا ادروس طب لحالي...ما حسوي صحبات بسرعه ...وانا صحيح طيبه و اجتماعيه جدا بس اخاف اسوي صحبات بسرعه...الموضوع عندي ياخد سنين عشان اقول دي صحبتي..فما اعرف نفسي حسيب الجامعه ولا لأ..

المهم الموضوع مو هنا

الموضوع انو في الإمبريولوجي دخلت علينا الدكتوره مرتين ( وانا قدام في وشها طول الوقت) و تعرفو ما اعرف اسكت ب اهرج و اسأل و المهم حطت بالها مني و بعد ما خلص الكلاس...قالت يبغالكم ليدر...و كل الكلاس من 90 بنت ساكتين مايبغو..وقالت انتخبو وحده " يعني مافيش وحده منكو عوزين تنتخبوها يابنات...وحده فيكو كده حبيتوها" بس فالبعض انتخبوني...وصحباتب قالولي الا سيري ليدر عشان اي احد تاني محيوصلنا المعلومه بس حيقول لليعرفو و المهم "شغل نفسي نفسي دا" و انا ما كان عندي وقت افكر حسيت نفسي انضغط وقلت " طيب" اسير ليدر..

و لمن جات تبا تاخد التحضير قالتلي اخدو واجبلها هوا ولمن اخدتو وجبتلها هوا ...قالتلي انا في اجتماع اباكي تنقوليلي الأسماء على الكشف بكره..تسعين بنت!! وهادا اول يوم..

اتفقت مع البنات وقفت وقلتلهم حعمل موقع خاص فينا ( بس احنا البنات) و انزلكم كل شي في ورفضت ادي رقمي للكل ( بس انا عارفه انو فجأه حلاقي الكل عندو )

جيت اكلم بنت خالتي في الموضوع هيا 5 طب..
زعقت فيا وقالتلي طبعا لأ ما تسيري ليدر انتي من غير شي يجيكي اكتئاب وهم وتقعدي تبكيلنا ايام الإمتحانات ...محيسير عندك وقت تحكي راصك...ولا تنامي..ولا تقابلينا و لا تسوي اي شي في حياتك و لا حتى بتزاكري قالتلي انو سمعت عن ليدرات شالو مواد بسبب كل دي المسؤووليات...قالتلي انو كل دولا الناس الطيبين الي انتخبوني "وحوش" حياكلوني وماهمهم غير مصلحتهم...وانا مسكينه طيبه ومخلصه ايا اساعدهم بس اصلي مني داريه عن الدنيا..


...تلي حتهزأ من الدكاتره وكلو حيجي فوق راصي...وحقعد ابكي دم...( تقلي الطب يدوبك تعدي من غير ماتجنينينا معاكي....ليدر كمان!!!!) ماينفع وتقلي انا انصحك وحتتزكري كلامي ومن دا الكلام..


المهم خوفتني مره كتير..


...تقلي غير السمعه البطاله الي حيطلعوها عليكي ( عن ليدر الأولاد و الكلام الفاضي دا) مع اني ما افكر اتواصل مع اي واحد منهم لو في اي حاجه مصيري الاقيها بطريقتي...الأسئله تتنشر ....مصيري الاقيها...مايحتاج تواصل...تقلي لا تستغربي ازا جا احد دق عليكي متأخر ( كونك ليدر) .....



أنا ما كنت اعرف الكلام دا كلو ولا اتوقعت انو كل دا ممكن يسير...من جد الموضوع قدي كده سيئ؟

وبعدين انا استغربت مافي و لا بنت تبا تسير ساب-ليدر...محد يبغا يكون معايا حتى صححباتي اقلهم ليه لأ...يقولولي احنا ما ننفع اني ماشاء الله عليكي ما يحتاج و عشان ماشاء الله صوتك عالي وشخصيتك حيسمعولك ومن دا الكلام..


انا مره خايفه ....احس اني سويت مصيبه بالزات بعد محاضرة بنت خالتي ( ولسا حاكلم خالي واحسو حيقول اكتر من بنت خالتي....وحيهزئ و ليه ما قلتيلي و حيحطمني اكتر و اكتر) هوا دوبو متخرج و متأكده انو امكن خلفيتو تكون زي بنت خالتي و اكتر كمان



ماما و بابا عاجبهم الكلام....وقالولي ماشاء الله...احنا مبسوطين بالخبر دا و الله يوفقك وماما قعدت تقولي امانه ومسؤوليه و شي كويس انك ليدر و قعدت تقولي قصص و احلام حلوه..


بس انا فجأه انفجعت من كلام بنت خالتي وخفت على نفسي...ما اعرف ليه وافقت من الأساس..

ما اعرف ايش ابغا...ما اعرف ينفع اكون ليدر ولا حاجيب لنفسي المصايب...ولا ابن سينا ماتنفعلي من الأساس اداوم في الجامعه هنا...ولا هنا ما ينفعلي..انا مره مكتئبه من القرارات الي باخدها في حياتي دحين...



ايش اسوي في الموضوعين.....الله يخليكم قولولي اراءكم وخبراتكم..ولا تضغطو عليا

وقبل ماتقولولي اي اجه على اليدر وما اليدر...انا مره اتأثر و اتعب و المسؤوليه ممكن تموتني بعض الأحيان من غير شي امرض في الإمتحانات النهائيه وتسير فيا بلاوي الدنيا كلها...بس دايما احاول اتحمل عشان غيري..و امكن هادا الشي الي خلاني ما افكر في نفسي و اقول ايوه وبس..

انا مره مكتئبه و احتاج مين يقولي ايش اسوي ='(

[JuStice]

.

وعليكم السلام ورحمة الله وبركاته ,

إنِك تكوني ليدر مسئولية .. ولازم تكوني اجتماعية ومتعاونة وتضحي لأجل غيرك .. دي أبرز صفات الليدرز ,

فإذا كنتِ تتعبي من المسئولية فـ انسحبي من الليدرية لأن الموضوع راح يأثر على دراستك .

وبالتوفيق

.

[Ahmad-k-92]

احسك حاطة موضوع اليدر شي مهم ..

المهم هوا ياجمعه الملك عبدالعزيز او ابن سيناء


انا اقول جامعه الملك عبدالعزيز افضل اكيد بما انها جامعه حكومية واخذت اعتماد وثاني افضل جامعه بالمملكة ..

وبالاخير استخيري ربك وانسي موضوع اليدر لنه ماله اهميه اهم شي الجامعه والدراسة

[Dr.Passed]

مو كده يا دكتور انا بس اتأثرت بكلامهم وحسيت انو الناس حتسير تستغلني وترمي كلي حاجه عليا...وبعدين مسؤوليه..مو اني مهتمه بس هوا كلو يجي مع احساسي بالمسؤوليه


بس الحمد لله كلمت خالي قلي " نختصر الموضوع كلو بكره تسحبي ما فيها كلام" الحمد لله سحبت من اليدريه خلاص ..

كلهم انفجعو ومايبغوني اسيب وكلي وحده تحاول تكلمني ليه اسيب يعني ولمن اقلها ليه انتي ماتسيري ليدر تسكت...ياسبحان الله!!!


معد حأفتي من عندي في الحياه...يعني شوفو الين دحين مافي ليدر عشان مافي ولا وحده تبغى...يعني عارفين وسايبينني ماشاء الله ارمي نفسي في المصايب ومايقولولي لأ ولا يبغو يساعدو ولا يتعبو نفسهم يالطيف!!

كل ما احد يناقشني في الموضوع منهم اعصب يناقشوني وزعلانين وهما لايمكن يرضو على نفسهم يسيرو مسؤولين ولا حتى بس يساعدو...المهم سحبت من الليدريه =) مشكله رقم واحد حليتها

[Dr.Passed]

كمان ماما تقولي اليدر بعدين يسير عندي ريكومنديشين فحطيت دا الشي في الإعتبار..بس برضو احس ما يستحق امشي في العناء دا كلو وانا ابغى اجيب معدل محترم