لو احببت انسان ولم يحبك هل تكره هذا الانسان ؟؟

[LeLou]

و عليكم السلام و رحمة الله و بركاته..

بصي يا حلوة معايا هو الكلا راح يكون غير على حسب نوع الإنسان إللي إنت بتتكلمي عنه و طبيعة العلاقة..
الكلام راح يفرق لو كان الشخص يقرب لك مثلاً قرابة دم أو لو كان زوجك أو خطيبك مثلاً أو صديقة لك..
طبعًا لكل وضعه الخاص إللي يختلف عن الآخر..

لو اتكلمنا عمومًا:~

إنتي لو تحبي أحد و هذا الأحد ما يحبك أيش الفايدة..
في دي الحالة الشخص هذا راح ينظر لك على إنك مصدر إزعاج دائم..

أنا شخصيًا إنسانة أبادل الناس الحب و لكن لا أعطي..
بمعنى أنه إللي يحبني أحبه،، كل شخص أعطيه الحب على قدر المقدار إللي يعطيني هو..
لو إنسانة تحبني للونسة أعطيها الوناسة،، و لو إنسانة تحبني للرفقة أعطيها الرفقة،، و لو إنسانة تحبني للأمانة أعطيها الأمانة،، و لو إنسانة تحبني للحب أعطيها الحب..

بالنسبة لتنسي و لا ما تنسي،، أنا قلت لك الشخص لو ما يحبك إنتي ليش تذهبي نفسك عليهم حسرات..
إنتي زعلانة و متضايقة و هما مستانسين و لا عليهم منك و لا ساءلين فيك..
مو معناته قاطعيهم،، أنا ما راح أقول لك شي يغضب ربنا لكن العلاقة تصير سلام،، و فيما يرضي الله،، و بس..
لأنه إنتي أصلا في يوم راح يكون مصيرك تنسي،، الحبيب و القريب لما يتوفوا نزعل و نبكي و بعد فترة ننسى..

أنا مريت بتجربة مشابهة،، كانت أعز صدبقة ليا كأنها أختي الصغيرة بالزبط و هي كانت تحبني كأني أختها الكبيرة بالزبط..
و بعد فترة صار شي يعني لا زعلنا بعض و لا جرحنا بعض لكن أنا ما أبغى أذكر تفاصيل القصة..
المهم،، كنت زعلانة و كل يوم أبكي،، احنا ما اتقاطعنا بس صارت علاقتنا كأننا ناس غرباء عن بعض رغم أنه كانت علاقتنا زي الأخوة بالزبط..
دحين صارت مقتصرة عالسلام..
و زعلت عليها و قعدت أبكي أيام و ليالي و أنا ما أنكر أني إلى اليوم لما أتذكر ذكرياتي معاها دايمًا أبكي..
خصوصًا أنه ما مر علينا يوم وحش اتضاربنا فيه و لا كان هذا سبب فراقنا..

لكني أقول لك أني دحين بنسبة 97 % نسيتها،، و ما عاد صرت أفكر فيها و صارت إنسانة عادية جدًا بالنسبة ليا..
و ما عندي أدنى نية أني أحاول أصلح علاقتنا إلا لو هي تبغى..

فــ زي ما قلت لك لا تتعبي قلبك و لا شي،، القلب دا لك لوحدك فلا تعطيه لأحد ما يستاهله أو يعرف يحافظ عليه..

و أولا و أخيرًا أقول لك علقي قلبك بالله عز وجل و لا تبعدي عن ربنا لأنه لما الإنسان يتعلق قلبه بربنا ما راح يتعلق بغيره و لا راح يهزه شي..
و الله إذا أحب العبد الناس راح تحبه هذا شي مهم لازم ماتنسيه..

و أتمنى لك التوفيق،، و أعتذر على الإطالة||~