تخصص الفيزياء ..محتاجه مساعدتكم وخبرتكـم

[ريم جده]

المشاركة الأصلية كتبت بواسطة طيبة المدينة ارجو المساعدة: لكل طلاب وطالبات الفيزياء الي عنده معامل الفيزياء لجميع السنوات الرجاء وضعها في المنتدى لتحميلها لاني والله في حاجه لها لوظيفة فنية مختبر حيث يكون القبول بناء على اتقان المعامل ودخول اختبار للمعامل؟

أختي .. حطي طلبك في موضوع جديد عشآن الكل ينتبه لك وممكن يسآعدك ..
بالتوفيق ^ ^

[LeLou]

و عليكم السلام و رحمة الله و بركاته..

أول حاجة مبروك تخرجك من التحضيري << فين الفيس اللي يحتفل؟؟..

ثاني حاجة..
أنا و بصراحة تااامة راح أكون صريحة معاكِ و أقول لك كل شي في بالي عن قسمنا المصون ..

أول حاجة: التخصص حقيقة مو صعب بس مو سهل..

ثاني شي: طبعًا في ناس بتتخرح بمعدل واطي و بتحول و بترسب كثير..
لكن السبب الحقيقي إللي راح تعرفيه لما تتخصصي هو أنه فعلا و حقيقة التخصص مو سهل أبدًا..
و لكن التخصص مو مشترط نسبة على اعتبار أنه مافي طلب عليه..
و راح تلاحظي الدفعات كلها قليلة و أحيانًا أقل من 20..
فعشان كذا الناس بتستسهل و تدخله و هي بصراحة و مع احترامي الشديد غير مؤهلة و قدراتها لا تؤهل لتخصص دقيق و معقد زي الفيزياء ..
فــ شي طبيعي أنهم راح يرسبوا و يحولوا و إن كملوا و اتخرجوا راح تكون معدلاتهم واطية و أحيانا تكون واطية من الأساس،، يعني من التحضيري معدلاتهم أقل من 3..

ثالث حاجة: حقيقة القسم مكركب جدًا و يجيب الهم بس التخصص جدًا رائع و لو تحبيه لا تحطي الموضوع دا عقبة أو حجة لك أبدًا..
لكني قلته من باب العلم بالشيء..

رابع حاجة: بالنسبة للوظيفة..
زي ما قلت القسم دا فيه عجز في عدد الخرجين خصوصًا المتفوقين..
و فيه عجز في الدكاترة و المعيدات..
و القسم دا عمومًا اللي بيتخصصوه كثير في كل دول العالم مش بس هنا..
فإذا إنتِ ناوية تشدي حيلك و تتخرجي بتفوق بإذن الله تضمني وظيفة المعيدة لأنه عندنا عجز فتاااك..
و أولا و أخيرًا الوظيفة بيد رب العالمين فلا تشيلي هم دا الموضوع كثير..

حاجة أخيرة// برضو عشان أكون صريحة معاكِ احنا المواد إللي بندرسها ما تكفي انها تطلع طالب متخرج من بكالوريوس فيزيكس..
في مواد اختيارية المفروض تكون اجبارية،، و مواااد غير موجودة من الأساس حتى كمواد اختيارية ..
زي تقنية النانو مثلا و الفيزياء الفلكية،، هذي المواد المفروض تنحط مواد اختيارية و غير موجودة..
فعمومًا النقطة إللي أبغى أوصل لك هي لو تبغي تعملي حاجة في الفيزيكس لا تعتمدي بس على إللي بتدرسية في الجامعة،، لازم تقري كتب و تشوفي مراجع و تقوي ثقافتك..

أتمنى ما أكون قلت لك حاجة تحطم بس أنا قلت لك الحقيقة إللي أنا شايفتها..
لكن التخصص بجد رائع و أنا أعشقه بشكل ما تتخيليه،، فلو تحبي التخصص اتوكلي على ربنا..
و أولا و أخيرًا أنا أنصحك بالاستخارة و الاستخارة ثم الاستخارة..
و أخلصي النية لربنا و بإذن الله هو يكتب لك إللي فيه الخير..

و عمومًا أنا راح أرفق لك في الخطة الدراسية و توصيف المقررات عشان تعرفي احنا بندرس أيه..
بس الخطة فيها غلط إللي هو أنه Math 202 ثلاثة وحدات دراسية مو أربعة..
و في مادة ناقصة إللي هي أمن و سلامة مختبرات Chem 200..

و بالتوفيق يا عسل و أي استفسار عندك ما يردك إلا لسانك ^^..
و أعتذر على الإطالة||~