احداث قبل وبعد الأختبارات , اكتبوها لنا ..

[الفتى]

السلام عليكم

ضاق صدري من قبل الاختبارات وجلست لي شهرين مغير أدربي راسي ما بين الشعر والنقد الادبي

والمودرن و شكسبير والفكشن والشعر والدراما .. ذاك اليوم دخلت مكتب خدمات يخلص اوراق جوازات وغيره

وانا اللي اشوف ذاك المصري يشتغل بالمحل يرطن انجليزي مع دكتور هندي , بصراحة المصري

عجيب اول مره اشوف مصري مطبق للأكسنت الأمريكي صح لأنهم بالعادة " زيس إيز "

وتشبك براسي فكرة سؤال المصري عن الأدب الانجليزي , وانا اللي اتوكل على الله واجلس قدامه

واضبط كشختي و اترزز وارسم ذيك الإبتسامه علشان يحس بروح المحبه والأخوه فيما بيننا

قلت صباح الفوول قصدي الخير .. قال اهلن إززيك , قلت له ما شألله الأنجليزي معك ينقط عسل

عاد المصري وسمع مدح جلس ساعة يشرح لي قصة حياته وكيف طور من نفسه وكيف كافح

ووصل للمرحلة اللي شدت انتباهي له وأنا ما غير فاق خشتي عنده وانا بيني وبين نفسي اقول

لو فيه معاهد زي الناس بديرتنا كان ما جيتك بس يالله خل نجامل ونشوف وش وراه

قال انا اساسا معايا ماجستير لغة انجليزية , انا بصراحة خقيت معه وقلت وجدت ضالتي

قلت جابك الله أنا بصراحة عندي اختبار بعد شهرين لمواد كلها تخص الأدب الأنجليزي وبصراحة

تعبت ماني عارف وشلون ابداء , قال ولا يهمك أنا موقود لااااا دي حاقه سهله خالص انتا بس مكبر

الموضوع حبتين شويا ما تحولش تصعب الأمور في نفوخك وتخليها تركيبة مفاعل نووي لاااااا

دي اسهل لغة في العالم , بصراحة كلامه فرحني وخلاني انظر للانجليزي على انه تافه ولا شي

قلت طيب وش رايك اجيب الكتب ونجلس انا وانت و نحاول نفهم الوضع ؟ قال خلاص عدي عليا

بعد سعتين انا ساكن فوء المكتب , قلت طيب كثر الله خيرك ..

و أنا انقز للبيت واشوف امي جالسه بالصاله وانا ابوس راسه , قلت ابشرك لقيت مدرس انجليزي فلته اسمه فرغلي

قالت الله يفتح طاقت الرزق بوجهك يا وليدي وين ما وجهت , اهم شي حط الله بين عيونك ..

والله وانا اخذ الملخصات والكتب واروح له يوم انه شاف الكتب والملخصات تغير وجه المصري

قلت هاه يا استاز وش رايك ؟ قال لاااا دي مواضيع بتختلف عن اللي احنا درسناها خاااااالص

قلت اكيد بتختلف انتم منهجكم مصري وحنا سعودي فيه فرق بس اعتقد التخصص واحد كله انجليزي

قال لا بووص حكاية الأدب دي حاقه بتاعت الدكتور اللي بيدي المادة يعني انتا لازم تعرف هوا عايز ايه

قلت طيب انت ما تقدر تفيدني بشي ؟ قال واللهي انا ممكن اترجم لك المواد .. قلت لا كثر الله خيرك

اذا على الترجمة سهله , لكن غيره ما تقدر تسوي شي ؟ قال لو عايز قرامر انا حاضر .

قلت لاااا قرامر سهله ان شألله . وانا اللي يضيق صدري ويتكدر خاطري ولا ادري وين اروح

ام حمدان ونور العمر ما يقصرن والله لو طلبناهن شي بس تستحي يا الواحد انك تطلبهن شي وانت

شواربك طول وعرض وش تقول ماني فاهم شي اكيد بيبتلشون فيك وعندهم زملاء غيرك .

الموووووهم رجعت للبيت وانا القى أمي بالحوش جالسه قالت بشر وشلون فرغلي عساه نفعك

قلت ابشرك نفعني يمه وان شأالله عملية الشد اللي انا واعدك فيها اذا تخرجت اسويها لك بفرنسا

اخلي ابوي اذا شافك يتعب نفسيا تطمني يمه ان شألله بتخرج بس انتي ادعي لي ..

بديت اجمع ملخصات مناك ومناك واتصل على حمد خويي بالجوف وشوي شوي جمعنا معلومات

عن المواد وذاكرناها وجاء وقت الأختبارات , طلبت من البنك إجازة رفض البنك وعلل الرفض

بوجود زحمة بالفرع والبنك ينظر لإنجاز العمل أهم من اي شي آخر , اضطريت اروح وارجع بالطيارة

من حائل الى جدة 12 مرة حسبي الله ونعم الوكيل فيهم . اول يوم كان عندي اختبار الشعر يوم الخميس

الساعة 8 صباحا وصلت من المطار للشقة الساعة 1 بعد منتصف الليل قلت خلاص يا ولد ذاكر لك كم

كلمة تنفعك قبل الاختبار يوم اني صليت الفجر رجعت اذاكر وانا متمدد على السرير ماصحيت الا لما

حسيت بشي دخل اذني واقوم مفزوع الا الساعة عشر ونص والشي اللي دخل اذني سعبولتي

على طول دق جوالي إلا هذي أمي تقول هاه بشر وشلون اختبارك ؟ قلت ابشرك يمه 100%

اكيد إنتي داعيه لي اليوم صح ؟ قالت مادعيت لك اكثر من اليوم .. قلت ياحبي لك يا يمه عسى الله مايحرمني

منك ولا من دعائك يا رب .. شوفي يمه مع عملية الشد نفسي اضبط اشياء كثيره فيك مثلا فيه عمليات

تحديد خصر خل ابوي يتعب من قلب وش رايك انتي بس ؟

بس الحمدلله الدكتور باقبص ماقصر والله اعاد الأختبار لي وساعدني الله يشفيه ..

واخيرا ضهرت النتائج والحمدالله من اصل 6 مواد أدبية حملت مادة وحدة وربك ييسرها لنا الترم القادم

ونتخرج على خير ..



محبكم في الله / الفتى

[Banana|]

ضحكتني والله :)
المصري خيبة أمل الصراحة..
ما أعرف ليش توقعت النهاية بتكون مأساوية،بس طلعت قدع ماشالله..
مبارك عليك النجاح وعقبال المادة اللي باقية لك..

[القهوة العربية]

لايكون اللى فى شارع السيرة عند بقالة النورس سمعت انه اونطة ياخذ على المادة 1000 ريال ويضحك عليهم بكلمتين ويقول بعد الدورة تعلى ---- انا الامر شر لابد منه المدرس الخصوصى عليك بالزولللللللللللللللللللللللللل البشير

[nour al3mr]

وعليكم السلام ورحمة الله و بركـــــاته

الله يسعدك دنيـآ و آخــــرة على قد ما ضحكتني

أثمــرت معاك موآد الأدب الحمد لله .. في اليوتيوب لقيت شرح لدكتور في جامعة أمريكية لقصة درستها في الأدب الحديث .. لقيت فرق شاسع كتباعد المشرق عن المغرب
احنا مطالبين بأشياء العجب العجآب و هما عالم تهتم بنقاط رئيسية و صلّ الله و بآرك

و عمليه شــــد في فرنســـآ ..

الله يحفظ لك أهلك و يجزى من فزع لك و اللي بيتخرجك معاك التــرم الجـآي إن شاء الله

و أي شيء تحتاجوهـ لا تترددوا بطلبه أبداً :)
و أنتَ عملت انجـآز رائع ماشاء الله و مجهود جبـآر .. و العاقبة بمشيئة لله بفرحتك الترم القادم

العاقبة بقراءة بقية موآقف الأعضـآء و مغامراتهم

[ام حمدان]

وعليكم ورحمة الله وبركاته

الله يسعدك ردك ضحكني

الله يحفظ لك الوالده ويفرحها فيك

والمصري ماكذب عليك فعلا المواد الادبيه تعتمد عالدكتور بشكل كبير

مثال: عندنا في شطر الطالبات ممكن يكون للماده اكثر من شعبه ولكل شعبه استاذه مختلفه ويعطوا نفس المنهج

لكن كل وحده تلقاه تركز على امور معينه غير الثانيه لذلك مايقدر يفيدك اي مدرس غير بشرح القصه نفسها او ترجمتها في الغالب


انت المفروض تكون فخور بنفسك الي عملته كان انجاز ماشالله تبارك الله صراحه اذكر اول مااستشرت الاعضاء بخصوص جدولك اني نصحتك تزيد ترم حتى تقدر تعطي كل ماده حقها لانه صعب تنهي مذاكره 6 مواد ادبيه في ترم واحد وقلت انك بتغتالني على هالنصيحه ><

عموما هانت هي ماده وحدها باذن تعديها بامتياز

ربي يسهلك ماتبقى ويفرحك بتخرجك الترم الجاي


موفق

[الملاك الأبيض]

ههههههه الله يسعدك بجدد قصتك عجبتني على قد ماتعبت وقاسيت بس طريقة حكايتك للامور تظهر تفاؤلك .

يلا هانت ومابقي الا مادة وربي يكتب لك التوفيق ويحفظ لك اهلك , واسمح لي اقول شي ثاني وانا اكيد مابتفلسف عليك لأنو خبرتك اكثر مني , بس انا اكتشفت انو موادنا ماترتبط بالانجليزي الي نبغاه بشكل مباشر ,احنا نبغى نتعلم اللغة اليومية العامية الي تساعدنا في مجال العمل , وهم هنا في الجامعة يعلمونا لغة اكاديمية مبنية على اللغة الاصلية للانجليزي والكلمات الي ناخدها في بعض النصوص حتى اهل اللغة الاصليين مايعرفوها احيانا , بس هذي مناهجنا وهذا القسم المتاح لنا , فالباقي راح يكون علينا انت اهم شي حط الهدف نصب عيونك انك تبغى تتخرج عشان تقوي نفسك ومنصبك ويصير عندك شهادة , بس من ناحية اللغة ماراح تتطور الا بالممارسة الفعلية من خلال الكلام والكتابة والاستماع وهي المهارات الي عطونا اياها اول التخصص هذي الي تركز عليها وانت بوسعك تركز عليها من خلال عملك باذن الله . الله يوفقك اخي وييسر امورك ويوفقنا يااااارب

[الســــــــــاطع]

اضحك الله طقم اسنانك كما اضحكتنا.............

[asim]

وفقك الله
أعجبني طريقتك في سرد القصة
أنت رجل موهوب وكاتب مميز
فرغلي صدقك فيما قال ولم يغشك

المهم لا تنسى سفرة باريس وعملية الشد تراها دين في رقبتك .

[طيف عابر]

قصة مشوقه واحداثها دراميه ههههههه
وفقك الله

[why not]

بصراحة أنسجمت جداااا وأنا أقراء هذا السرد الرائع وأعجني المقدمة والمتن والخاتمه كانت رائعة والله جدا واضح تأثير المواد الادبية عليك
لكن أحب أعطيك راى أنا كان يمديني أتخرج هذا الترم لأن كان عندي خمس مواد فقط اش سويت حذفت شكسبير والدرما بعد دراسة متأنية وابقيت النقد الادبي ولأدب الحديث والرواية وأضفت مادتين حره صراحة المواد الأدبية ممله جدا في درستها لأن الدكتور لدية تصور أنك لم تقراء القصة فيبداء يسئلك عن أشياء ثانوية في القصة فيقع الفاس في الراس وبعضهم يحاول أن يظهر مقدرتة الأدبية على حسابي أنا الطالب طبعا كما أشارو من سبقني برد.
الملاك الأبيض أنا أوافقك الراى جداا حيث أحساسي أن هذا الجهد يذهب ادراج الرياح أنا أعمل ومعي أمريكان في نفس العمل فطلبني الرئيس أن أعطيهم قصيده بالانجليزية مما درستة هذا الترم طبعا لم يكن عندي إلا قصيده واحده هي في لأدب الحديث المهم أني بدأت لأني كنت حافظ الاستانز الاول المهم اني قلت الابيات فرايت وجوهم وكاني قاعد انصب عليهم لم يتذوقو الابيات فمباشرتا توجهة إلي صديقي كنج الامريكي وسألته ما الذي فهمته أو ماذا يريد الشاعر أن يقول فلم يحرك ساكن وبدأ يقول أشياء لم تخطر ببال الشاعر ثم أخذت اوضح مدلول الشاعر والماذا استخدم هذه العبارات وكيف كان التصوير الرائع لدخول فيما يريد أن يرسله لنا من خلال هذه الابيات فسألته( كنج) عن كلامات كثيرة قضية معظم وقتي في حفظها فبعضها لم يسمع بها من قبل نعم فهم الأدب شئ جميل ولكن لاجمل أن تجعلني اتخاطب مع الغير بالغة الشائعة لأني لي صديق ذهب إلى أمريكا فبصراحة كنت اكثر من المصطلحات الادبية إذا كلمته وهو مدقق أخطائي يقول لا لا تستخدمها خطاء ثم يعطيني كلمة لم تمر علي خلال دراستي فانعم نتعلم في الجامعة لكي ننجح فقط أما التطوير والجودة والتحسين فهي بقدراتك خارج ما تدرسة هذة وجهة نظري والسلام وأعتذر عن الاطالة