تجربتي في السنة التحضيرية 13^

[رَزَان]

السلام عليكم ورحمة الله وبركاته


لكل المستجدين والمستجدات في جامعتنا..
أضع بين أيديكم تجربتي الشخصية في السنة التحضيرية
وأتمنى تستفيدوا منها وتنتفعوا بيها ..


"ما يمدح السوق إلا من ربح فيه" ، والعكس صحيح !
يعني حتسمعوا كلام كثير ومتباين عن التحضيري ( ممتعة/مملة .. سهلة/صعبة )
اللي جابوا درجات حلوة واتسكنوا في الكليات اللي يبغوها أكيد حيقولوا لكم السنة التحضيرية حلوة
واللي ماجاب درجات حلوة أو مو راضي عن درجاته أو تسكن في كلية غير رغبته الأولى أكيد حيذم فيها ..
وقليل المحايدين !
عشان كدا
إذا دخلتوا التحضيري لا تتشاءموا أبدا ولا تتأثروا بالآراء السلبية
بالعكس لازم تكونوا متفائلين لأن تفاؤلكم حيسهل عليكم ويساعدكم كثير
"تفاءلوا بالخير تجدوه"
أثبتوا نفسكم بنفسكم .. كونوا انطباعكم الخاص عن التحضيري بعيد عن أفكار ووجهات نظر غيركم خصوصا لو كانت سلبية


بالنسبة لي ..
السنة التحضيرية كانت سنة ممتعة وسهلة رغم كل الصعوبات اللي واجهتها
عندي أختين أكبر مني درسوا التحضيري وكنت في الثنوي أسمعهم وهما بيحكوا وأعيش الجو وكونت فكرة بسيطة عن الجامعة
أول أيامي كانت عندي خريطة الجامعة في الجوال وما كنت أحتاج أسأل أحد عن أي مبنى وبدون مايكون شكلي يضحك عشان معايا خريطة ورقية
لكن هذا ما حماني من الشمس وحرارتها .. عشان كدا أنصحكم بالنظارات الشمسية وواقي الشمس والمظلة


أكثر شي كان عاجبني :عالم الجامعة المنفتح
درست في مدرسة خاصة مبناها صغير وفيها 160 طالبة
كنت أحس إني محبوسة وما آخذ راحتي وأي خبر يدور في المدرسة كلها بسرعة
لكن في الجامعة
محد يمسكني لو ماحضرت محاضراتي
إذا غبت محد يتصل على ولي أمري
أخرج وقت ما أبغى (بعد الساعة 10 طبعا) وأجي وقت ما أبغى
عشان كدا كنت أحس بحرية أكبر ، وفي نفس الوقت مسؤولية أكبر

في الجامعة كثير أنظمة ما عجبتني
مثلا " ممنوع الخروج قبل الساعة 10 "
أو تفتيش الملابس عند الباب من الساعة 8 إلى 10
أو أحيانا أشحن جوالي في المبنى تجي السيكيورتي وتقول لي ممنوع !
أنظمة باااايخة .. لكن قررت إني ما أتذمر كثير وأمشي حالي


نجي للمواد وطريقة المذاكرة ..


كل إنسان له طريقته في الحفظ والفهم والمذاكرة ، وأكيد بعد الثنوي كلكم عارفين إيش أفضل طريقة تذاكروا بيهالا تقلدوا غيركم في كل شي تسمعوه منهم

احضروا محاضراتكم دايما ، لا تغيبوا إلا بعذر حقيقي
ومن تجربة شخصية .. الترم الثاني سحبت على محاضرات كثير بدون أسباب فعلية
يعني طفششانة أو ما أبغى أداوم ، وواجهت صعوبة فيها
خصوصا إني ما أذاكر إلا في الفترة اللي قبل الاختبار بس:)
لكن الحمد لله شديت حيلها وعديتها .. وتعلمت درس كمان


إذا ماناسبكم أستاذ/ة المادة .. شوفوا غيرها سواء كان نقل ودي أو تغيير في الجدول (بواسطة طبعا) أو حضور محاضرات لأستاذة ثانيين
لكن احرصوا إذا نقلتوا شعب ثانية إنكم ما تضايقوا طلاب الشعبة الأساسيين
لأن هذي محاضرتهم نازلة في جدولهم ومن حقهم يلاقوا لهم مكان مناسب وهم أحق منكم


المواد

أنا من طالبات خطة أ.. مرة مبسوطة إني بدأت بيها
حسيتها سهلت لي كثير ومهدت لي خصوصا في طريقة الدراسة والمصطلحات الإنجليزية


أبدأ بمادة الرياضيات
مادة الرياضيات حلوة للي يحبوها .. ومنهج التحضيري كان سهل وأغلبه درسناه في الثنوي مع زيادة كم درس واختلاف اللغة
صحيح إن المنهج بالإنجليزي .. لكن الشرح عربي .. والأستاذة تترجم كل مصطلح جديد
المصدر الرئيسي في المادة هو الكتاب ، فيه مجموعة تمارين بعضها نحلها في المحاضرة وبعضها تكون واجب
الواجبمحد يفتش عليه أو يسألك ويحاسبك عنه
الواجبتحله بنفسك لنفسك .. تدرب نفسك على أسئلة الاختبار ويجي منها جزء كبير
درست عندأ/هتون شعيب.. تدخل المعلوومة وسط الراس وتشرح كل شي بأمانة وذمة
ودايما تمشي ع الوقت بالتمام
وإذا غبت عن أي محاضرة أو عندي سؤالي في الواجب أروح لها في ساعاتها المكتبية دايما تكون موجودة
أحسن شي كنت أسويه في التحضيري إني كنت أحل واجب الرياضيات أول بأول
ما يجي وقت الاختبار إلا وأنا فاهمة كل شي الحمد لله
ما احتجت لأي ملخصات .. كل مذاكرتي من الكتاب والتمارين اللي فيه وملاحظات الأستاذة
درجتي كانت حلوة الحمد لله
أكيد سمعتوا إن في بونس 10 درجات : 3 في كل دوري و 4 في النهائي


الفيزياء
أكثر مادة اشتكوا منها البنات .. لكن نفس البنات اللي كانوا يشتكوا منها الترم الأول صاروا يقولوا "ياليتنا نرجع ندرس فيزيا" في الترم الثاني !
الفيزيا سهل للي يفهمه .. حاولوا تذاكروه أول بأول أو على الأقل تفهموه في المحاضرة
وقت المذاكرة يصير طويل وغلس نوعا ما لكن الفاهم ما يصعب عليه شي بإذن الله
درست عندد/لبنى سندي.. بنات الشعبة ماكانوا مبسوطين معاها ، لكني كنت أفهم منها تمام وأحيانا تركز على معلومات مهمة وتجي في الاختبار
صحيح أسلوبها مافيه تميز أبدًا .. لكنها ممتازة
في مذاكرتي اعتمدت على أكثر من مصدر
الكتاب، أذاكر منه القوانين والأمثلة
(كنت في كل محاضرة أأشر في الكتاب وأكتب الملاحظات فيه ، وإذا ماجبت الكتاب أسجل ملاحظاتي في ورقة وأرجع أكتبها ع الكتاب)
ملخصات هناء فرحان
كانت هي منسقة المادة ، ملخصاتها بسيطة جدا لكن فيها أغلب الأشياء المهمة
وكمان مجمعة أسئلة كثيرة من النماذج القديمة .. عشان كدا جزء كبير من أسئلتها يكون موجود في الاختبار
تمارين السكشن
محاضرات السكشن ما عجبتني ، حضرت محاضرة وحدة لمها دفتردار
كل البنات كانوا يمدحوها ، لكني ماحبيت أسلوبها أبدا .. بطيئة جدا وتشرح حبة حبة ومن أول وجديد
يعني البنت اللي مهي فاهمة تستفيد ، لكن البنت الفاهمة تسمع شرح سمعته في المحاضرة :/
بعد هذي المحاضرة صرت آخذ حلول التمارين من البنات وأذاكرها بنفسي وأحافظ على وقت البريك حقي8-)
نماذج الأسئلة والاختبارات السابقة
تلاقوها كلها في صفحة المنسقة ويجي منها أسئلة كثيرة في الاختبار



الحاسب
مادة غلسة نوعا ما .. لكنها سسهلة جدا وحرام الواحد مايجيبA+فيها
اختباراتها منوعة بين نظري وعملي في الدوري ، ونظري فقط في النهائي
مافيه حفظ دش .. لازم تكون فاهم اللي تسويه ومطبق كويس وعارف مكان كل زر ووظيفته (بالغت شوية) وتجيب الفل مارك
درست عندأ/ندى الضراب.. أستاذة ظريفة وتفهم وبزيادة كمان ، كنت أحسها زي الأبلات تعطي البنات وجه وتتكلم معاهم وتعطينا معلومات برا المنهج وتحكينا وتضحك معانا .. بس بحدود
وبرأيي ماتفرق أستاذة عن غيرها في الحاسب ومهارات الاتصال




مهارات الاتصال
مادة مالها داعي في الحياة .. طول المحاضرة نسمع قصص ونتحكى .. وجزء بسيط منها كنت أحس إني أحضر دورة
المصدر الرئيسي هو الكتاب والمذاكرة منه .. في المذاكرة إذا قرأتوه 3 مرات بتركيز وتمعن تجيبوا الفل مارك
برضو حرام ماتجيبو A+ فيها
أهم شي شدوا حيلكم وسلموا التكاليف أول بأول
درست عندأ/شيماء جستنية.. مررة حبيتها وحبيت أسلوبها .. صحيح انها تضحك مع البنات بزيادة لكن في النهاية تغيير جو عن المحاضرات الباقية


الإنجليزي
مادة مملة جدا .. وقتها طويل بزيااادة .. لكن لحسن حظي إنهم حطوني لفل 4 .. يعني الوضع هين
درست عندمس راجية يوسف.. مصرية لكن لكنتها أمريكية
مررة استفدت منها وحبيتها ..
أهم شي في الإنجليزيتجميع المعلومات واكتساب اللغة، مافي شي اسمه مذاكرة ليلة الاختبار
اختبار الرايتنغ واللسيننغ سهلين لكن يبغالهم تدريب
النصفي والنهائي كمان سهلين للي مذاكرين كويس ومكتسبين المهارات المطلوبة في اللفل
أسخف عبارة سمعتها بعد الاختبار "جانا من برا الكتاب" ! حتسمعوها كثير لكن صدقوني مايجيكم شي من برا .. ممكن يجيك السؤال فيه غلط مثلا أكثر من إجابة صحيحة أو الإجابة الصحيحة ما تكون موجودة - حالات قليلة جدا - لكن لازم تكلموا مسؤول/ة القاعة عشان لا تضيع عليكم الدرجة
في مذاكرة القواعد ذاكروا القواعد من ورا الكتاب .. كل شي يجي من هناك


الأحياء
المادة المستحيلة في الترم الثاني
من كثر التهويل اللي سمعته عن الأحياء توقعته شي مررة صعب
طلعأسهلمن توقعاتي بكثير
في الأحياء ركزوا في المحاضرة وذاكروا أول بأول قد ماتقدروا
اكتبوا الملاحظات والروابط اللي تسمعوها في المحاضرة وممكن تفيدكم في حفظ العلومة
بصراحة الأحياء سهلوه لنا بزيااااااااااادة
يعني في الدوري يعطونا 30 سؤال ، وجا منها 10 أسئلة في الاختبار
وفي النهائي 40 سؤال جا منها 20
يعني 40 درجة تحطوها في جيوبكم وانتو مغمضين عيونكم
والباقي جهد وتعب .. لكنه مو صعب أبدا وكثيرين أعرفهم جابوا ال 100
مصدر المذاكرة : السلايدات (عروض بوربوينت فيها كل المنهج مترجم سطر بسطر تلاقوها في موقع الكلية)
درست عندد/حنان الشاذلي.. دي الدكتورة شي جميييل جدا
مررة حبيتها وحبيت أسلوبها وتعاملها مع البنات .. عيبها الوحيد انها تسمع للبنات كتير وتحكي كتير ويضيع نص وقت المحاضرة
لكننا في النهاية لحقنا وخلصنا مع الناس


الكيمياء
المادة دي في البداية تبان سهلة وبسييطة مررة ، وكل ما مشينا في المنهج يزيد مستوى الصعوبة
عشان كدا ذاكروها أول بأول وإلا حتشدوا شعوركم ليلة الاختبارأبدا محد شد شعره العام -_-
صحيح أكثر المنهج درسناه من قبل ، لكن الأفضل الواحد يذاكره أول بأول ويفهمه
كنت أعتمد في مذاكرتي على سلايدات د. ليلى وبعد سلايدات د.إكرام .. ونماذج الاختبارات السابقة
ما عندي كلام كثير عن الكيميا ، كل اللي أعرفه إني من الثنوي أحب المادة عشان كنت أفهمها نظريا وعمليا
درست عندد/ليلى الحربي.. ما يحتاج أقول لكم عن كمية الزحمة الفظيعة اللي تصير في الكلاس وقت محاضراتها
لأن كل طالبات شعبتها واللي حيحضروا معاها حيشوفوا بنفسهم
صحيح هيا ممتازة لكن مهي مميزة أبدا .. يعني أسلوبها عادي جدا
د.إكرام دانش (حضرت عندها محاضرتين) .. صحيح تشرح بذمة وضمير لكن شرحها طويل وبطيئة في الشرح وتعيد وتزيد في النقطة السهلة والصعبة


الإحصاء
مادة جميلة ، أنا كنت أستمتع فيها لأني أحب الإحصائيات والأرقام ، وكمان كنت أساعد ماما في دراسة الماستر حقها وكان فيها إحصائيات فكان عندي فكرة بسيطة عنها8-)
درست عند د/سماح سندي.. دكتورة أكثر من رائعة .. شرحها بسيط وفيه كل المعلومات المهمة
والسكشن حضرت محاضرتين مع أستاذة نهلة عبدالجبار واستفدت منها .. أهم شي في السكشن تكونوا حالين الأسئلة كلها لأن الأستاذة كانت تعدي عليها بسرعة وتشرح اللي صعب ع البنات وسألوها عنه بس
مصادر المذاكرة: الكتاب (شامل ملاحظات الدكتورة والتمارين اللي تعطينا هيا من برا الكتاب) + الوورك شيت + نماذج الاختبارات السابقة


...


أدري طولت عليكم لكن من جد حابة أفيدكم بتجربتي
الله يسهل لكم وييسر لكم وتكون السنة التحضيرية بداية مسيرة ناجحة للكل

:067:

[رونــا]

يعطيكي الف عافية ,,
بس ماتفق معاكي في مسالة الاحياء انا من خطة ب كان الاحياء جدا صعب جدا جدا بس الحمدلله المذاكرة اول باول هونت الموضوع ومشتها
وبالاخير هو يعتمد على الطالب
بالتوفيق للجميع

[bahamdain]

الله يعطيكي العافية
زي ما كنا نحتاج أحد يفيدنا أنتي فدتيهم
مع أني ما قريت الموضوع كله
بس شكله ممتتااااز

[Razz]

اول شي مبرووك عليكي تسكينك ماشاء الله :$$
لو في شي اعرفه هو حرام واحنا ما جربنا التحضيري نتمسك بأفكار ناس سلبية تكون أحياناً نابعة عن غيرة :"(..
سؤالي هو: هل قدرتي تتوفقي في مواعيد كلاساتك ؟
وشي تاني هو، يمديكي لو تقدري تعطيني إحداثيات المباني احطها في جوالي :$

[رَزَان]

المشاركة الأصلية كتبت بواسطة Razz اول شي مبرووك عليكي تسكينك ماشاء الله :$$ لو في شي اعرفه هو حرام واحنا ما جربنا التحضيري نتمسك بأفكار ناس سلبية تكون أحياناً نابعة عن غيرة :"(.. سؤالي هو: هل قدرتي تتوفقي في مواعيد كلاساتك ؟ وشي تاني هو، يمديكي لو تقدري تعطيني إحداثيات المباني احطها في جوالي :$

الله يبارك فيك :-*

تفضلي الخريطة ، بس هي قديمة نوعا ما



مبنى 460 حق الانجلش مقابل 420

ومبنى الشؤون الجديد ورا بوابة شمالية 3

[ReRe.H]

رزاااان وحشتييييني
يعطيك العافية على تجربتك ما شاء الله مرررة ذكرتي كل شي بالتفصيل وكلامك كلو صح
وانا اقرى تجربتك في الترم الاول شوي وابكي كنتي معايا فكللللل الكلاسات
والله على طولو بس كان ترم جميييييل وذكريات اجمل
جزاك الله خير ووفقك دائما

[Roza S]

يعطيككيي العافية سميّتيي الشطورة ^^

أتفق معاككي بكلل حاجة قلتيهها , السنة التحضيرية سهلة و ممتعة للي شلد حيله و بيذاكرر ,,

إن شاء الله يستفيدوو دفعة 14 و تكون عندهم صوررة واضحة عن هذي السنة و يدخلوها بدون مخاوف ^^