ازمة مذاكرة الخطة ب ؟؟؟؟؟؟؟

[Amwela]

السلام عليكم ورحمة الله وبركاته

انا طالبة سنة تحضيريه الخطه "ب"
وخايفه من هالسنه كثير

وصراحة يعني الى يومكم ذا مامسكت كتاب ابدأ اذاكرو
وقلت يا بنت كفاية لعب وكمان هي بس 3 مواد عيب اضيع معدلي فيهم فقررت ابدأ اذاكر هالاسبوعين بما انها اجازة
بس مشكلتي مااعرف من وين ابدا او بالاصح وش اذاكر
يعني احس فيه ضياع بالمذاكره
وهذا الشي مسببلي ازمة

فعشان كذا اتمنى تساعدوني
وتقولولي ايش ابدا فيه ومن وين اذاكر كل مادة كتب والا سلايدات والا من وين ؟؟؟!!

[أُنـثــﮯ مـــلآئـكيـة]

طلاب وطالبات التحضيري الحلوين
دايما اذا استصعب عليكم شي خلو اليوتيوب مرجعكم بتلاقو دروس كثير
لا تعتمدوا ع الملخصات في مادة الاحصاء والرياضيات مارح تستفيدوا كثير
الموقع التفاعلي لا تضيعوا وقتكم عليه حتى لو نصحوكم الاساتذة
ماث: كتاب + وورك شوب حمزة ابو جبل + اكسرسايز وامثلة الكتاب + شوية يوتيوب للي يحتاج تقوية في اساسيات الماث ويُفضل باللغة الانجليزية
فيزياء: ملخصات هناء فرحان + نماذج محلولة لهناء فرحان للدوري الاول والثاني والفاينل + فيديوهات يوسف زويل
..
احصاء: الكتاب + امثلة الكتاب مع التركيز على التعاريف خاصة بالشابتر الاول + حل السكشن في اخر كل شابتر ضروري جدا + ملاحظاتكم الي تكتبوها مع الدكاترة + وورك شيت فيها اسئلة احصاء محلولة لكل شابتر وتنزل بموقع منسقة الاحصاء قبل الاختبارات بيوم او يومين مفيدة للاولاد والبنات
+ شيء ما فهمتوه لا تترددوا روحوا لاساتذتكم يشرحوه عند البنات افضل وحدة ( سماح سندي) الاولاد ما اعرف مين افضل واحد
+ اليوتيوب لو احتجتوه
احياء : حفظ وفهم بعض الاحيان فممكن تحتاجوا اليوتيوب , ذاكروا قبل الاختبار باسبوع على الاقل المادة ماتحتاج احد كويس يشرحها
اقرأوا قراءة مبدئية والافضل لو تكون السلايدات مترجمة عشان مايضيع يومكم في الترجمة, ركزوا ع صور الشابتر الاول تحت كل صورة اتذكر كان فيه خاصية معينة زي التطور والنوم ..الخ
يعني احفظوها تتعلق بأيش
لا تضيعوا وقتكم في الجداول ( اذا كانت معلومات الجدول مش مذكورة ب السلايد معناها هو مجرد اضافة )
قبل الاختبار روحوا لاساتذتكم يحددوا معاكم الصور المطلوبة , اسماء العلماء و التواريخ ماهي مهمة
الكيمياء: نسخة من كيمياء الثانوية متجمعة مع بعض. سلايدات ليلى الحربي + تست بانك ليلى الحربي لكل شابتر حلوها + ممكن الاستعانة باليوتيوب لو استاذك مايشرح كويس
...
ملخصات مارح تحتاجوا غير بالفيزياء انا اشتريت ليوسف زويل الدوري الاول بس رميته لاني اكفتيت بمصادري وعموما هو ممتاز
اجتهدوا ولا تخجلوا من السؤال من اساتذتكم لان سبب وجودهم انهم يعطوكم المعلومة فمو مشكلة انكم ما فهمتوا اول مره
خذوا وقتكم وروحوا في الساعات المكتبية و اكتبوا اسئلتكم في ورقة خارجية واسئلوا
ربي يوفقكم

[رفّات حُلم]

أهلا
شدي حيلك عشان تفرحي لما تتخصصي.
احياء/ سلايدتك كافية.. لا تضييع وقتك في الموقع التفاعلي - لكل المواد -
اقرأي اول مرة الكلام بتركيز وافهمي المعنى وبعدها أبدأي احفظي
تقدري تحفظي تشريح كلام على رسمات متلًا، تشبهيها بشي، شكل الكلمة
فيه جزئيات تحتاجي تفهمي
عمومًا الأسئلة مرررة سهلة
مزاكرة الأحياء متعبة، بس درجاتو وأسئلتو تفرح مرة xD
والرسمات مرة مهمة،
*لو في السليمانية يفضل تكوني عند د/ حنان الشاذلي.

كيمياء: سلايدات د/ ليلى، والتيست بأنك مرة مهميييين.
اممم بالزّبط منهج ثانوي + إضافات لا تذكر!
ما عرفتِ حاجة اليوتيوب مليان.
انا مزاكرتي صراحة كانت من فيديوهات زويل+ ملخصاته ( ورقية في النت ) + سلايدات د/ ليلى وتيست بانك
ومرة كفاية. بس ترا انسحبت فيديوهات زويل ><
لو احتجتي فيه اشتراك معاه اون لاين ( بـ فلوس )
وملخصات السيد مرة كويسة كمان في الكيمياء، كنت أشوفها من صحباتي.
* حاولي تكوني عند نها وزان او إيمان حجازي

احصاء: التمارين اللي وسط الدرس مرة مهمة... لا تحاولي تسلكي لنفسك في المُزاكرة انك فاهمة وانتِ لا
كل نقطة افهميها، التمارين اللي نهاية كل درس مرة مهممممممة.
( انا ما كان يمديني احلها، بس كنت فاهمة كل شي والحمدلله ^^ )
فيه ورك شيت تنزل ع موقع دعاء بوقري مرة جيدددددة،
وكنت احل تمارين انا مجمعتها

عمومًا؛
الملفات في دا الموضوع تفيدك:
http://www.skaau.com/vb/showthread.php?t=766331

بالتوفيق.

[Somaiah Yousef]

وعليكم السلام ورحمة الله وبركاته

ولا ازمة ولا شي .. انا زيك كنت اسحب واذاكر قبل الاختبارات باسبوعين

اول شي امسكي الكيميا
خذي عنه فكرة بسيطة وابدئي حلي

اول شابتر حيكون كله تحويلات ومابياخذ منك اكثر من 3 ساعات

امسكيه بجدية عشان تخلصي بدري
ثاني شابتر يبغاله حفظ مفروض م ياخذ الا يوم
ثالث شابتر حيكون عندك قانونين احفظيهم وطبقي ع المسائل

المادة مافيها شي صعب ..

حتخلصي من دي الجزئية وتتمرني عليها مزبوط مزبوط في التست بانك

طبعا مذاكرتك سلايدات ليلى الحربي بعدين تست بانك وكدا خلصتي

امسكي الاحصاء بعدو واتدربي عليه مزبووووط .. مصدرك الكتاب

ولما تخلصي كل شابتر بامثلته وتمارينه .. امسكي الوورك شيت في موقع دعاء بوقري

شوفي الامثلة وافهميها وحليها لحالك وامسكي التمارين وحلي لين ينحفر الاحصاء في راسكك 😐

كل ذا خلصيه ف اسبوعين الاجازة

وبعد الاجازة امسكي الاحياء وفصفصيه لحاله برواقة

واهم شي لاتضغطي على نفسك في المذاكرة

لو احتجتي ترتاحي ارتاحي

لو احتجتي تخرجي اخررجي ولا تحبسي نفسكك ☺

انا كذا كنت اسوي .. واهم شي لخصي افكارك في ورقة والورقة ذي حتفيدك في النهائي

الله يكون في عووونكك

[Amwela]

مرررره مششششكورين حبايبي ماتصدقو اشقد ريحتوني
الله يرزقكم اضعاف هالراحه ياررب

ويسهلها على الجميع يارب

[أسرار سامي♥]

ماشاء الله الصبايا ما قصروا الله يقويهم يارب ♡
و انا اقلك it's never too late ♡ خلاص الأيام اللي ضيعتك ها كفايه
ابداي دحين سوي لك جدول و قسمي المواد و الشباتر
صح اجازه بس معليه زاكري في الصباح و اليل ارتاحي
و تتعبي شوي شوي بس و ترتاحي لما تجي الاختبارات مراح تندمي ابدا ♡
توكلي على الله و أبدأي
خطة ب مو صعبه و الA+ تاخديها اذا اجتهدتي و اعطيتي الجامعه حقها♡
موفقة يارب