والشوق حارقني وأنا ميـتٍ فيـك..........حتى من اهلي والربع خاطري مـال

[الصقر (صقرالعالم سابقاً)]

السلام عليكم ورحمة الله وبركاته..


اخليكم مع القصيده..

أسمع حبيبي قبـل تعلـن مباديـك
أسمع تصبر دامني شفتلـك جـال

لا والذي سـواك مانـي بناسيـك
مير الظروف اللي أزحمتني بالأشغال

شفني عشانك قاطع الدرب بجيـك
دربٍ طويل ولا حسبنا لـه اميـال

لاتظلم المجبر عسى ربـي يهديـك
لاتزيد هـمٍ فـوق هـمٍ وغربـال

واللحين دام أنها أجهرتني مواريـك
بخبرك من بعـد غيبتـك بالحـال

ضايق ولالي بغيبتك .. غير طاريـك
وأداري دمعٍ عن عيون الملا سـال

والشوق حارقني وأنا ميـتٍ فيـك
حتى من اهلي والربع خاطري مـال

ماكنت أحسب أن الغلا في طواريك
يزيد لين ان العقـل صابـه اهبـال

وانا مـع العالـم خيالـي يناديـك
وأهرج على نفسي تقل فيني اخبال

ياهم .. مالك غير قلبـي يصافيـك
حيث ان غيره بالبشر دالـه البـال

تطرب على نوحه .. ودمعه يسليك
وتزيد همه زود عـن ثقلـه أثقـال

وأقسم قسم ماني على الكيف باغيك
مير ان قلبي لك من البعـد منـزال

عسى العوض ياهم في يوم أخليـك
فرقاك .. لا شفته وناداني .. تعـال

ابو العيـون الواسعـه والمهاليـك
أبو جبيـنٍ لظلـم الليـل شعًـال

ماتشوف له بالقلب قصر و مماليـك
غلاه ثابت فـي فـؤادي ولا مـال

واللحين لو تحكي وتعلـن مباديـك
عندك خبر من بعد غيبتك بالحـال