الشايب الهواوي والبنت الشاعره

[محمد22]

بدايه القصه عن شايب اسمه حمدان وكان هواوي ( قلبه خضر )

ما يشوف بنت الا ينفتن ومشهور بانه مايقاوم الزين

فيه بنت ملكعه وصاحبة مقالب قالت في نفسها انا ليه ما اروح للشايب

وامزح معه واضحك عليه شوي واشوف ردة فعله كيف تكون

راحت له وسلمت وقالت:كيف حالك يا شايب ...رد السلام

والله بخير الله يعافيس

وفجأه iiiعطته ظهرها ومشت بدون استئذان ولا مقدمات

تولع الشايب من حركتها قال فيها كم بيت يستعطفها فيها ويقول لها

انك ذكرتيني الماضي واذاما عطيتيني وجه لحقت باخوي حمود اللي

في قبره ويذكر التاريخ واليوم اللي قابلها فيه

يقول الشايب

يا بنت خوذي بخاطري وارحميني....لا تجرحين العود بعيونك السـود



غضّي نظرك وغطي الوجنتينـي......لعل يومٍ جدد الجـرح مـا يعـود



يوم انتهى مع مرمسات السنيني.......جتني صواديفه على غير مقصود



باول شهر عشره نهار الثنينـي......حمدان مرّوا به على جنازة حمود

البنت كانت تقصد من استفزازه انها تجاريه في الشعر وترد عليه والمسكين ما كان

يدري انها شاعره وعلى باله ما خذ راحته في التغزل ردت عليه تقول

يا شايب الرحمن وينـك ووينـي......عزي لحالك قدمك الباب مسـدود



قلبك عطوف وجاه قلـبٍ متينـي......والبنت ما تشفق على مغازل العود



حبل الرجا مقطوع بينـك وبينـي.......مثل الغليث اللي رعا قلبه الـدود



اقفى شبابـك والعـرب مقبلينـي.........يا عود ما يرجع من العمر مفقود

حطمته يوم قالت له انك عود وان الشباب ما يرجع وان ما فيه امل

تعطيه وجه حس العود

انه تورط وقال كم بيت يبين لها انه ما يبي الغزل بعد ما وصل عمره ثمانين سنه

يقول حمدان :

يا بنت صدي بالعيـون الظليلـه......لا صد عنك الله نهـار القيامـه



مالي ومالك يالفـروع الطويلـه.......لو فيك من رسم البداوه علامـه



يابنت ما لـي بالثمانيـن حيلـه.......اهدف كما تهدف على البير قامه



اقفى شبابي وبالدهر شفت ميلـه......يالله حسـن الخاتمـه والسلامـه



اعطيك موجز والبضاعـه قليلـه......واخذت لك من صافي الماء سنامه

راحت الايام والشايب مسكين وكبر سنّه خذله معها شايب وهي بنت

وتقول له كيف اعطي شايب وجه

بعد فتره مرّته مره ثانيه وردت عليه السلام واستفزته وراحت

وخلته تولع الشايب وقال ليه ما ابين لها

في كم بيت انها بتشيب مثلي واني رجال طيب وان الناس تنصاني

ومعروف بالكرم واني ما ابي منها غير التحيه والترحيب

يقول حمدان

يا بنت ما جاس الكبـر والخشونـه......وعادت شباب اليوم يجفل من الشيب



ياسرع مـا وبلـك تمـزع مزونـه.......يالفاتنه يـا ام الثمـان الرعابيـب



يا بنت مـا بينـي وبينـك مهونـه........كلمة شرف نبـي تحيـه وترحيـب



الله مـن عـودٍ ثقيـلـه طنـونـه..........ينصاه راع المشكلـه والمواجيـب



على الكرم والديـن نفسـه حنونـه........تلقـاه بالاجـواد شـرق وتغاريـب

جهز الابيات وارسلها مع عجوز ووعد العجوز بهديه اذا وصلت الرساله لها

راحت العجوز وعطت البنت الابيات شافتها البنت وقفّلت على العجوز في

غرفه وقالت مثلما جيتيني بابياته تودين له ابياتي

العجوز مسكينه قالت طلعيني ولا ابي منكم شي الله لا يعودكم انتم واوراقكم

ردت البنت ابيات اقوى من الاولى واكثر تحطيم مسكين الشايب ما احد رحمه

حتى لو حاول يستعطف

تقول البنت

العود عود وطايحـاتٍ سنونـه.......من كثر ما يرقد على جرة الذيب



عودٍ مهرقل والعرب ما يبونـه........ياعود ما لك في طويل المراقيب



اقفى شباب العود راحت حتونه.........مثل اليتيم اللي بكا ما له مجيب



جداه ينثر دمعة ٍ مـن عيونـه........غريق موجٍ ما لقا له مقاضيـب