فضفضه

[dre]

سلام عليكم

كدا كان حالي اول ما فك الحذف والاضافه:

واخيرا فك الحذف والاضافه ( اللي كالعاده يفكوه فجأه من غير تحديد موعد معين)
ولا احد يقولي انو دايما يحددوه, لانو واجب عليهم يحددو اليوم والساعه كمان
اللي يفتح فيه الحذف والاضافه مو يسيبو الطلاب على عماهم

كالعاده الموقع بطييييء, واكاد اجزم انه اسوأ نظام الكتروني على وجه الارض
وما جبلنا إلا الضغط والمرض من يوم ما دخلت الجامعه

طيب نقول بسم الله ودخلت على الجدول الدراسي
مو معقووووووله !!!!!!!! المواد اللي ابغا انزلها بالزبط نزلتلي
والجدول ممتاز وعدد الساعات تمام وكل حاجه مزبوطه
الحمدلله ما حروح اتمرمط عند الشؤون التعليميه اول اسبوع

طيب بسم الله نشوف الخطه الدراسيه
الخطه الدراسيه كمان ملخبطه مع الخطة تبع المستجدين
وطبعا الطلاب مهم داريين عن الموضوع
يعني معقوله طول فترة الصيف كانو نايمين؟
ليش ما كان فيه هناك اعلانات وتوضيح للطلاب او توضيح داخل الموقع نفسو او تعديل من بدري؟
دا الموضوع طبعا سبب اكبر ( دربكة ) في قسمنا السيء ( المدنية)

وطبعا انا مبسوط قاعد في البيت
واصحابي والشعب كلو في الكليه يحاولو يزبطو جداولهم

وطبعا لأني ما اضمن كليتنا الحلوه, كنت اشيك كل يوم على الجدول
وفجأه يوم الربوع اشوف جدولي الاقيه مخبوووووص فوق تحت وحذفولي
مواد وحطولي مواد على كيفهم ونزلولي ماده اخدتها قبل كدا

رحت وانا مبسووط وانطنط فرح على القسم >>> طبعا العكس
رحت عند د.المحمدي( وكان واقفين عندو أمة محمد) ...وبعد عبور ألف طالب, يا دكتور الجدول كان مزبوط والمواد كويسه
ليش غيرتولي هوا ؟؟؟

الدكتور: راجعني يوم السبت, دحين في تعديلات, ونستمر في تعديل الجداول
ليوم السبت

انا: طيب يا دكتور ( هدا جدولي ) بس ابغا اعرف ليش تم حذف الماده الفلانيه
وحطيتو بدالها دي

الدكتور: امممممم غريبه.. مع انو مافيها شي المواد اللي منزلها >>> يعني مو مواد عامه لازم آخدها, او شي متأخر ما اخدتو, بالعكس كنت ماشي على الخطه

انا: طيب والحل يا دكتور؟
الدكتور: تعالي السبت >>>> يا ليلييييي يا عينيييي
طبعا لفيت الف لفه في الجامعه عشان ارجع جدولي زي ما كان واخيرا رجع زي ما كان

اللي اعرفو انو لكل عدد صغير من الطلاب مرشد اكاديمي
ليش كل شي في قسمنا الحلو سار على راس الدكتور المحمدي؟ الله اعلم

,,

لخبطو اغلب الطلاب ونكدو عليهم عيشتهم بإسم الـ ( ABET )
وفوق دا يقولك وفي وجهك .. الأبيت اهم عندي من كل الطلاب
ما راح اضحي بالابيت عشان ارضي كم طالب !!

طيب هيا الكليه لمين؟
وآسف على الكلمة, لكن هل انتو تستحقو الابيت اصلا؟

انا مني بروفيسور ولا عالم عشان احكم
لكن حسب وجهة نظري انو ما تستحق الكلية
او على الاقل ( قسمنا ) دا الاعتماد الاكاديمي

وادا كان فيه مرمرطه للطالب فأنا ضدو
دحين يجيني واحد يقولي دا النظام لمصلحة الطالب .... الخ

طيب يا سيدي والله عارف انو لمصلحة الطالب
بس المفروض لو طبق يبدأو بالعقليه الجديده اللي داخله الكليه

لا, ودحين يقولو جميع الطلاب ما يتخرجو اقل من 2.75 !!!
الحمدلله انا اعلى من دا المعدل بكتير , لكن بالله دا مو ظلم؟؟؟

يعني هل يتساوا الطالب المستجد اللي داخل الكليه وهوا عارف دي المعلومه
بالطالب اللي باقيلو سنه او ترم ويتخرج ومعدلو طايح !!!

وطبعا لا انكر انو في الجامعه ايجابيات كتير, ودكاترتها متعلمين من افضل جامعات العالم
وعلى عيني وراسي, لكن دا الشي ما يمنع اننا نتكلم عن السلبيات العجيبه اللي عندنا

ما اعرف ليش الجامعه والتعليم العالي في بلدنا مو راضي يستوعب انو التعليم عندنا مضروب.
ايوه يا حبيبي مضروب. ومضروب من المدرسه, ادا الاساس ضعيف راح يستمر الطالب ضعيف

اعطيك مثال بسيط قلتو قبل كدا
مشكلة اللغه الانجليزيه, اللي بيعانو منها اغلب الطلاب ايش سببها؟؟؟
مع اننا بندرس من المدرسه انجليزي! بس بيطلع الطال الجامعه ما يعرف غير yes and no
وصفر في الانجليزي, يتفاجأ انو المواد بالانجليزي, ياخد F's ينزل معدلو ينطرد من الكليه
يسير عاطل !! وناس كتير شطار طلعو من الكليه بسبب اللغه

ودا يدل على انو المناهج ضعيفه, وطريقة التدريس عندنا غلط
وأغلب الطلاب عندنا همو ينجع ويجيب درجه عاليه , مو عشان يتعلم.
وطريقة التفكير هادي هما اللي طلعوها في الطلاب

وفي النهاية انا عارف اني قاعد انفخ في قربه مخروقه
أو بالاصح, قربه غير موجوده من الاساس, انفخ في هوا

سلام

[شــفــافـــة]

مو بس كلية الهندسة

اللخبطة في السيستم كلو

[banoota mnkoosha]

وعليكم السلام ...

دري انت عايش لسة

والله يا دري مشي حالك !! حنتخرج والوضع هوا هوا ..

قاعدة اعد الايام عشان اتخرج والحمدلله هانت سنة وافتك من المرمطة والقيل والقال والخطة اللي مليون مرة تتغير مو عارفين يرسو على بر وكلو كوم وحكاية الحذف والاضافة كوم ..

نفسي افهم شي هم عاملين الجداول بالنت ليش ما يزبطو كل حاجة !! ايش الحكمة من المرمطة في الجامعة اول اسبوعين

والتعليم دي حكاية كل البشرية اتكلمت عنها ... و انت قولتها بنفسك ( قاعد انفخ في قربه مخروقه )


يللا الحمدلله على كل حال :)

[لندنية]

بجد الله يعينكم

[المسلم العربي]

وعليكم السلام ورحمة الله وأسعد الله جميع أوقاتك أخي دري..

أوافقك في كثير مما ذهبت إليه ومررت بما مررت أنت به وآمل من الجامعة والدولة تعالج هذه الأمور..

وتم نقل موضوعك إلى مكان أنسب من الساحة لعله يجد أذن صاغية تنقل هذه المعاناة إلى من بيده التغيير..

دمت محباً لأمتك الخير

[dre]

اهلين banoota
تخيلي .. لسا عايش P:
كيف حالك؟ يا رب تكوني طيبه
الله يوفقك وتتخرجي وتنفكي من الجامعه

بالتوفيق : )

[dre]

شكرا للأخ المسلم العربي : )

[hanadiateiah]

never mind sir , life would not be life without this kind of things ...... best of luck

[الجــ،،،،ــوري]

الله يعين الجميع

[dre]

LMFAO
thnx ms hanadi =D