مستجدات يوم الأحد 19\12 + حصر المباني المغلقة و غير المغلقة (شطر الطلّاب).

[الباسل3003]

السلام عليكم و رحمة الله و بركاته .

ترددت في كتابة موضوعي و ذلك لوجود مواضيع تتحدث عن نفس النقاط لكن اتمنى في هذا الموضوع كل طالب داوم اليوم يكتب عن احوال المباني اللي داوم فيها .

بالنسبة لليوم الأحد من ناحية الحضور انا حضرت من 8 الى 12 الطلاب اللي حضروا نوعاً ما قليلين في محاضرة الثقافة من 120 طالب حضر 25 تقريباً

و محاضرة مادة حرة hist 333 من أصل 120 طالب و طالبة حضر 20 طالب و 4 طالبات فقط ( الطالبات تم أخذ الحضور بينما الطلاب لا ) ليش عاد مدري .


بالنسبة للمباني سمعت ان 125 كان مغلق امس لكن اليوم مفتوح و الدكاترة حضروا
المباني اللي مريت عليها 73 , 75 , 30 و كلها مفتوحة و فيها محاضرات .

كلية الآداب مقطوعة الكهرباء تماماً و المحاضرات ملغية على حسب كلام احد الموظفين .


نصيحة : اللي بيداوم يلبس حذيان عالية او يسمونها ( سميكة ) عشان الطين في كل مكان ,,, تشوف المبنى قدامك ماتقدر تدخل لازم تقعد تلفلف و تدوّر لك مدخل .

في نهاية الموضوع اللي عنده محاضرة مهمة ولا اختبار ولا دكتور متشدد في التحضير لا يغيب ,,

و اللي ماعنده شيء قبل ماتروح المحاضرة شوف الجو اذا تمام الله يسهل دربك و اذا مو تمام انت مسؤول عن قرارك .

هذي حصيلة اليوم و اللي عنده زياده حياه الله .