نصائح للمستجدين تحضيري

[xanaza6]

نقلته لكم من موضوعي بقسم " المسار العلمي انتظام

السلام عليكم ورحمة الله وبركاته. إن شاء الله احاول الخصلكم اهم الاشياء اللي تحتاجونها بالتحضيري على شكل نقاط. واللي يضيف يعطيه الف عافيه.

- الجامعه مو زي الثانوي, فاتركو عقلية الثانويه ولاتقارنونها. البيئه مختلفه وتحتاج وقت بسيط للتأقلم, وخاصة الطلاب من المناطق المختلفه عن جده

- الانجليزي مهمه بالجامعه, ولاتخافون انكم ماتقدرون تمشون فيها, اللغه تحتاج الى وقت للتعلم وتحتاج بصوره اساسيه الى التبسيط والممارسه, لان العقل يحتاج وقت عشان يستوعب ويحول الكلمه الى مصطلح ثابت في العقل. لا تضغطون نفسكم فيها صدقوني حبه حبه درست اربع لغات وهذي المعلومه تأكدو منها, احفظو عدة كلمات باليوم ومارسوها ومع الوقت تتجمع وتتثبت.

- الدراسه بشكل أساسي ماتعتمد على المحاضر والدكتور, يعتمد على الطالب اولا واخيرا. الكتب عندكم والملخصات والتدريبات والدكتور كمان, ايش اكثر من كذه.

- اخوانكم بالجامعه موجودين في كل مكان, المنتدى مفتوح لكل الطلاب بأي أسئله او استفسارات, واللي يطلب المساعده يلقاها.

- لااااااا تتحطموا, اغلب الطلاب اللي يشعرون بالفشل والتفكير السلبي حينتهون بالفشل. العقل الباطني يسجل اي كلمه وشعور تحسونه, خلكم ايجابيين ولاتتحطمو وكررو في نفسكم اقدر وححاول وحنجح. صدقوني اي كلمه سلبيه حتتسجل بالعقل الباطني وتنعكس على الواقع.

- ابتعدووووو عن المتشائمين, الطلاب اللي يقولون الجامعه كذه وكذه والاختبارات والدكاتره #### والكلام الفاضي هذا ابتعدو عنهم. صديقكم حيجركم بكلامه بطريقه غير مباشره, والاحصائيات اثبتت ان للسحب من الجامعه دور كبير بالاصدقاء والعلاقات, كلمه من صديقك سلبيه عن الجامعه او التخصص والمستقبل حتأثر على أداءكم

- اعتمدوا على انفسكم, ارجوكم حل الواجبات والمذكرات مو عشان واحد يحلها لكم, هي كلها عشان تتعودون على الحل, كل ماحليتم اسإله اكثر وبتكرار حتلقون مشكلة الوقت في الاختبار تهون, اذا المخ اعتاد على النمط حيكون مستعد في الاختبار انه يحل بدون تفكير وتضييع وقت.

- الجامعه مو نهاية حياتكم بل بدايتها, خطواتكم هنا جدا مهمه, اذا فشلتو او اخفقتو تأكدو مليون بالميه انه امر طبيعي, الفشل مو انك تطيح بالارض, الفشل انك تطيح وتجلس طايح. قومو وتوكلو وكملو عادي مو نهاية المطاف اختبار واحد او خطأ, اعتبروها تجربه والخياه مليئه بالتجارب

- كل الناس يمرون بظروف صحيه وعاطفيه منها اجتماعي وعائلي, بس خلو جامعتكم في المطاف الاول والاخير وقفتكم الاولى. محد حيعطي لمستقبلك اهتمام مثلك. ولاتفكرون ان الجامعه حق اليوم وبس, الجامعه هي طريقكم لحياتكم بعد 10- 20- 30 سنه, بإذن الله اذا ربنا عطانا عمر. وطبعا مشاكل الاسره والحياه شي طبيعي غير مستغنى عنه, والمشاكل مثبوته انها صحيه اذا اخذت بالطريقه الصحيحه.

- قد تجدون قصور من بعض الدكاتره هداهم الله او حتى من النظام وغيره, بس تأكدو انه امر طبيعي فلا تعصبون وتحمقون, الجامعه مو ضد الطالب, حتبني مستقبلك بنفسك الجامعه فقط عباره عن اداه.

- انا دايما اقول كل التخصصات والكليات لها مستقبل لكن موكل الطلاب لهم مستقبل. الكليات والتخصصات كلها مهمه في الحياه, وحنلاحظ هذا الشي لما نكبر.

- لا تخلون اختياركم للتخصص والكليه مبني على اّراء ونظرة الشعب, عندنا مأثرات على أهمية الكليه والتخصص ومكانته الاجتماعيه, ويرجع للأسف حتى بضعف المعرفه للتخصصات. اختارو بناءا على الرغبه" الاهتمام" استطاعتكم ومهارتكم وقدراتكم. الرزق من ربنا سبحانه وتعالى. انتو خذو الخطوه الصحيحه وتوكلو

حبيت اضيف نقطه غفلتت عنها في الموضوع الاساسي, الوقققققت الوقت جدا مهم, لازم تعرفون ترتبون ايامكم, اولوياتكم والاساس ومعدين الامور الثانويه,يعني طلعه مع الاصحاب وقت الاختبار وانتو ما ""خلصتو مذاكره"" ماااالها اي داعي, ايش حتستفيدون؟؟ اطلعو بعد الاختبارات, اهتمو بوقتكم وإن شاء الله حتعرفون كيف تنظمون ايامكم ومواعيدكم. حاولو اذا مليتو من مراجعة ماده راجعو غيرها وارجعولها, اطلعو شوي وارجعو كملو. لا تضغطون نفسكم وفي نفس الوقت لا تهملو وتنسون.


إن شاء الله اذا في اضافات من اي طلاب حضيفها الى نقاطي. طبعا هذي النصايح كلللللهااااا بعد توفيق الله سبحانه وتعالى, كل امورنا مقدره ومكتوبه من اول ماانخلقنا. ولاتخافون الامور ميسره وحتستمتعون بالجامعه كثيييير إن شاء الله وربي يوفقكم ^^

اخوكم عبدالرحمن ابورحمه اللي فشل وتحطم سابقا ولكن وقف اقوى وافضل من قبل

[AM00NA]

لا ان شاءالله تمر التحضيري زي السنوات اللي فاتت من دون مشاكل....
وربك يسهلها بس احنا نتوكل على الله ...
تسلم ع النصااايح وان شاءالله يستفيدوا منها .....

[بنت الشريف...]

الله يوفقنا بالتحضيري


يعطيك العافيه ياخوي

[Randa39]

شكرا والله يعطيك الف عافية
ادتني دافع
الله يسهلنا السنة التحضرية يارب ويعديها على خيير

[xanaza6]

المشاركة الأصلية كتبت بواسطة am00na لا ان شاءالله تمر التحضيري زي السنوات اللي فاتت من دون مشاكل.... وربك يسهلها بس احنا نتوكل على الله ... تسلم ع النصااايح وان شاءالله يستفيدوا منها .....

إن شاء الله تمر بدون مشاكل, بس مو شرط تمر زي اول
امين يارب, بالتوفيق للجميع بإذن الله

[xanaza6]

للرفع

[مـــلآك]

ربي يسهل ان شــــــــاااء اللهـ انآآ متفااائلهـ وبإذن ربـــي رح تكوون

سنهـ حلـــــــوهـ على قولك لازم نعطي العقل الباطني

ايجااابيااات ...

ثاانكس على النصااايح ..

[xanaza6]

المشاركة الأصلية كتبت بواسطة مـــلآك ربي يسهل ان شــــــــاااء اللهـ انآآ متفااائلهـ وبإذن ربـــي رح تكوون سنهـ حلـــــــوهـ على قولك لازم نعطي العقل الباطني ايجااابيااات ... ثاانكس على النصااايح ..

تسلمييين واول وحده ترد علي هالرد, العقل الباطني يأثر بصوره كبيره جدا, والرسايل اللي نعطيه لا اراديا ترجعلنا زي ماارسلناها, ومن وانا استخدم هالنظريه حسيت كل حاجه صارت سهله وممتعه, حتى الشين صار مايأثر فيني

ربي يوفقك ^^