قال خمسة نجوم قال

لمعة الألماسة · #1 23-07-2010, 09:59 PM

بسم الله الرحمن الرحيم
مساء الخير
جبت مقالة لفتحي حلواني
له اسلوب جميل وساخر في معالجة القضايا الاجتماعية

يا أم فتو لاتنسي تنزلي معاكي تلاجة الشاهي المنعنش .. تلاجة الشاهي جاهزة ياسيدي أعرفك ما تمشي إلا لما تمخمخ في الخط وانت لا تنسى تنزل الشنط معاك ورانا سفر ساعتين زمان .. المهم ركبنا سيارتنا وقرينا دعاء السفر وربطنا الحزام لا يروح يلقطنا عم ساهر في الطريق وما فرملت إلا وأنا في المدينة اللي رحناها، كان الجو بارد وممطر وأول ما وصلنا قلت للحرمة خليكي في السيارة على بال ما أشوف شقة مفروشه من مجموعة الشقق دي اللي من كترها ما تعرف تعدها المهم رجولي ورمت وبققت من كتر اللف والدوران على الشقق ومافي إلا سلخ في الأسعار تسألهم ليه كده ياناس يقولك هدا موسمنا وحندبحكم من غير قبلة، المهم بعد مناحلة ووجع قلب لقينا شقة قلت لموظف الاستقبال كم سعرها رد عليا بكلام مكسر شقة مرة كويس بس 400 ريال في اليوم والساعه 2 ونص لازم في خروج (قلت في نفسي شكلهم صدقوا نفسهم انهم من جد خمسة نجوم ) وقعد يبربر ولازم كمان يدفع 1000 ريال تأمين على شقة ... كمان تتشرط في التعليمات مافي زيكم لكن في الخدمة يفتح الله طيب ممكن نشوفها .. مافي مشكلة .. زعق على العامل اللي عنده ياجهنقير وقعد يرطن معاه المهم طلعنا إلى الشقة وعينك ما تشوف إلا النور وياريتني ما طلعت مدهملة وحالتها بالبلا والبلا لاحقها لا والحبايب صنفوها وأعطوها شقق خمسة نجوم .. قال خمسة نجوم قال. والله حديدة ما أعطيها شي يحزن وضع الشقق المفروشة المصيبة انه صاحبها عارف انه إجازة وموسم ومصطافين، طيب يا حبيبنا على الأقل صلحها رشها بوية زبرقها خلي شكلها مقبول عند الزائر .. دخلت الشقة وما تشوف إلا العجب مروحة السقف مدهملة اللي يشوفها يقول مروحة هيلوكبتر مغبرة وأسلاكها مدلدلة من السقف هدا غير الموكيت اللي في الأرض معدوم ومتاكل والسرر مكسرة وكل الشراشف واللحافات اللي فيها وسخانة، هدا غير المطبخ واللي اسمه مطبخ بس بالكدب البتوجاز وعيونه كلها خربانة وما تعرف هوه بتوجاز ماشي على الغاز والا على الكهرباء من كتر الأسلاك اللي مرمية في الأرض هدا غير التلاجة اللي أدراجها مكسرة حتى ما فيها فريزر هدا غير الحمام الله يكرمكم تشغل بزبوز الحنفية تلاقي موية الدش جاتك تفتح الموية الحارة تجيك موية باردة هدا غير التلفزيون ما تعرف هوه راديو والا تلفزيون ما تسمع إلا صوت والريموت مكسر وملصق بشطرطون، أقول لك شقة حالها يحزن ويجوا في الأخير يصنفوها من الشقق أم خمسة نجوم، على ايه ما أدري
لا نظافة ولا سباكة ولا فرش زي العالم، شقة حالتها بالبلا ويجي في الأخير يقول لك سعرها 400 ريال في اليوم وتخرج الساعه 2 ونص.
وفوق الهم والبلا اللي فيها تدفع 1000 ريال تأمين على الشقة على ايه ما أدري لو جبنا واحد من من حقون اللي يشتروا الأثاث المستعمل حيقول لك خدلك 200 ريال في كامل عفش الشقة، ويجي أخينا صاحب الشقة يأجرها بـ 400 ريال في اليوم من جد شي عجييب، المهم أخدت بعضي ونزلت من الشقة ورحت للسيارة لقيت أم فتو نايمة من برودة الجو ومن برودة مكيف السيارة حركت السيارة وأم فتو نايمة ومشيت ساعتين في الخط وأم فتو نايمة ووصلت لباب العمارة وأم فتووو نايمة قلت لها قومي وصلنا لباب الشقة .. ردت عليا وقالت إن شاء الله يكون فيها أصانصير وخلي بالك لا تنسى تجيب معاك الشنط قلت لها حجيبها ولا يهمك. هوه في أحلى من بيتنا بلا شقة مفروشه بلا سياحة بلا هم.. وعيشوا كتيييير تشوفوا كتييييير.

لمعة الألماسة · 23-07-2010, 10:03 PM

وبالنهاية تشجيع السياحه الداخلية اي تشجيع في ظل ارتفاع الاسعار

JuStice · 23-07-2010, 10:06 PM

.

ههههههههههههههههه والله قصة خطيرة .. مشكوورة عالموضوع الرائع .

.

Glamor Mada · 23-07-2010, 10:24 PM

اساسا ايش اللي يحفز الواحد عالسياحه الداخلية ؟!!
لا جو عدل .. ولا اماكن حلوة .. ولا مناظر تفتح النفس .. ولا اسعار كويسه
قال سياحه داخليه قال !!
مشكورة اختي ^^