موضوع لخطة ب بس يمدي لطلاب وطالبات خطة أ الاستفادة (( طريقة مذاكرة مواد خطة ب ))

[do7me]

اولا ياهلا ومرحبا بكل طلاب وطالبات السنة التحضيرية ...

وثانيا انا بخطة ب

وثالثا والمهم : باعطيكم الزبدة في طريقة المذاكرة (( بحكم الخبرة )) ..

اولا الاحياء : زي ماقالوا العيال في مواضيع سابقة ذاكروا التست بنك من اول الترم ... ليش ؟
1- لانو في كلمات كثيرة متشابهة في الاجابات (( يعني: ياتحفظ ، ياتفهم )) وكل الاثنين يايبغاله ... كلمات متشابهه مصطلحات كثييييييييييرة ...الله يكون بالعون .. وللمعلومية ترا حتى التست بنك طووووووووويل ..
ولا اذا انت فهيم ذاكر المنهج كلو ..

ثانيا الاحصاء : مادة تشبه الرياضيات نوعا ما ... بس تعتمد على التخمينات ... يبغالها ساعة ساعتين اذا ماكنتوا فاهمين انجليزي .. سووا زي كذا كل يوم عندكم فيه احصاء ولا تنسوا تطبيق التمارين (( حطوا تحت تطبيق تمارين 60 خط )) ... والـ 100 في جيبكم ... على ضمانتي ..

ثالثا الكيمياء وماادراك مالكيمياء ؟؟! : شوف هذي المادة خداعه زي الثعبان ذاكرها وخذ حذرك منها قبل لاتلدغك ... شوف اي تمارين يعطيك اياها الدكتور سواءاً قال لك جيبها واجب ولا قال لك حلها وخليها عندك (( يعني للفايدة )) تحلها كلها - وبنفسك - وخصوصا اذا كان واجب واذا ماعرفت اسأل الطلاب عن طريقة الحل لاتأخذ الحل .. واذا مرة لزمت خذ الحل النهائي - هذا اذا مالقيته جنب السؤال في الكتاب الانجليزي (( طيب ليه اسوي ذا كلو وخصوصا في هذي المادة؟؟ اقول لك ليه ؟))
لانو اذا ماعرفت كيف طرق الاسئلة كلها وكيف تربط بين القوانين .. ابشرك رحت في خرايطها - وللمعلومية اي معلومة تفوتك - ابشرك بشارة ثانية راح تجيك في الاختبار وراح تنقص درجه هذا هو السبب لهرجتي الطويلة فوق ولا تقولوا بعدين ماقلت ... والله نصيحة اذا طموحكم لكلية الهندسة او لكلية الطب او حتى اي كلية لازم تفهموا عدل وتحلوا عدل ...

الانجليزي ... good luck all in the test
وبعد كذا كل واحد يركز عالانجليزي ويحاول يحفط كلمات .. يحضر .. يترجم.. يقول انا ماني محتاج هالكلمات ... حيجي يوم وتحتاج هالكلمات ... ماحطولك شي في المنهج من فضاوة.

واخيرا احب اوضح نقطة للكل ... شوفوا الفلة ماهي طايرة والله ملحوق عليها ... لاتغيب عن المحاضرات لانك اتوقع انك منت جاي للجامعة عشان تفل انت جاي عشان تدرس عندك البريك ساعتين تقريبا ولا اكثر فل ياخويي محد ماسكك بس لاتغيب عن المحاضرات نهائيا - لانو نص الي تحلوا في الاختبار من حضورك للمحاضرات ولاتحضر المحاضرات وانت متنح اوك - لاتحضر عشان لايسجلوك حرمان .. احضر لانك تبغى تتعلم وتنجح وتكون انسان ناجح وفخور بحياتك وبعملك ... شوف انت ذاكر (( وحيكون وقت المذاكرة طووووويل )) ..
عارف او طفش وبلاهه .. وعارف انك حتشوف اخوياك يلعبوا ويدقوا عليك ويقولوا لك تعال ... شوف خويك الي يدور لك مصلحتك مو الي يقول لك تعال نخرج وانتو ماغلقتوا المذاكرة ... مااقول سيبه اكثر من انك تقول له تعال نذاكر وبعد ماتغلقوا فلوا ... ولا تسهروووووووووووا على الفلة اسهر على المذاكرة وبس لمصلحتكم .. والله يوفقكم والجميع يارب ..


معلومة مهمة وخطيرة بعيدا عن انه امر محرم شرعا :
اذا غشيت في اول حياتك الفعلية ( الجامعة ) راح تغش بقية حياتك ، وبهذي الطريقة ماراح تنجح ...
لاتغش عشان تعرف تكمل طريقك صح ... كل المواد التي تأخذها في هذي السنة هي مجرد اساسات لبقية دراستك في الجامعة ولحياتك العلمية والمهنية ( وياحبيبي اذا كان اساسك قوي راح يكون بناءك صلب واذا كان هش دق على حياتك اكبر سلام )
وشوفوا مافي اي مادة مالها داعي هذا الكلام حتسمعوا عن مواد ( الاحصاء - مهارات الاتصال .. مادة مفيدة ممتعة خصوصا اذا استخدمتها في حياتك حتلاقي نتايجها فوراً - الحاسب .. يقولك عارف كل شي في الكميبوتر طيب .. طيب ورينا شطارتك وجيب الميه يابو العريف .. )

كثير من الطلاب يغشوا في هذه السنة وراح تشوفوا هالشي كثييييير بس اقول لكم الي شفته شباب بدون ذكر اسماء اعرفهم معرفة شخصية دخلوا الهندسة والي راسب 3 مواد ومادتين والي دخلوا الطب وجايبين تحت الـ70 ولا 60 وش فادهم الغش طاح معدلهم عالفااااااضي .. لانهم ماكانوا فاهمين الي قبل ليش ؟؟ .. خويهم الدافور ساعدهم وغششهم ونجحوا .. بس خويهم الدافور الحين مو معاهم في الشعبة ولو تشوفوا خويهم الدافور كارف نفسه طول السنة وهو الحين في كلية الطب ولمن جات بداية الاجازة الصيفية كنت اكلمه قال خلاص الحين اجازة مافي غير كورة ونوم وصلاة .. مستانس .. واخوياه عندهم ترم صيفي راسبين ولا متنكدين عشان علاماتهم الحلوة ... لاتغلطوا ياشباب نفس الغلط ... الا هل بلغت اللهم فاشهد ..

لخطة أ اذا تبغوني انزل طريقة للمذاكرة .. خبروني اذا تبغوها..

هذا كلام من اخ لكم عاش هالتجربة المريرة بكل تفاصيلها وهاانا اعيد معكم لتصحيح اخطائي ... فلا تخطئوا نفس اخطائي واخطاء الشباب الي كانوا معاي ... دمتم بود

[••Cute Girl]

يسعدك رُبيَ..

الف شكر لك خيوُ..

وإن شآء الله الكلُ يستفيدُ..

=)

[Mr.Ambitious]

من جد افدتنا

الف شكر ليك

والله يوفقك

[do7me]

شكرا اختي cute girl و Mr.Ambitious على الردود

و اتمنى اني اكون افدتكم بما تحتاجونه

[دمعه شجن]

مشكوور يااخوي بس اذا تقدر تنزل كيف نذاكر مواد خطه أ للاداري

يعطيك العاافيه

[(light)]

ألف شكر لك
وإن شاء الله ربي يكتبلك
الأجر على أتعابك

[W2A]

الله يعطيك العافيه وماقصررت والله ^^

[تركي4444]

مشكور اخوي وياليت اذا تقدر تنزل طريقة مذاكرة خطة أ للعلمي الانتقالي وعندي سؤال كمان هل طلاب الانتظام يكون لهم مميزات اكثر من طلاب الانتقالي غير المكافاة ولا الاختلاف بالمكافاة فقط ؟؟؟؟؟

[D.mohammad]

Welcome, O my friends, hello

اول شي اشكر الزميل على الموضوع الجهد واضح ولا تنسو من طلب العلا سهر الليالي ربن ما يضيع تعب عباده

خليكم متفائلين . وما بعد الكلام الى السلام

[ميعاد]

المشاركة الأصلية كتبت بواسطة تركي4444 مشكور اخوي وياليت اذا تقدر تنزل طريقة مذاكرة خطة أ للعلمي الانتقالي وعندي سؤال كمان هل طلاب الانتظام يكون لهم مميزات اكثر من طلاب الانتقالي غير المكافاة ولا الاختلاف بالمكافاة فقط ؟؟؟؟؟

الاختلاف بالمكاافأه بس...


________


فعلا كل كلمه قلتها صح ميه بالميه..

ذااكروا وصدقووني ذي الخطه لو تذااكرها من البداايه حتجييب فيها معدل حلو..

خااصة الاحياء وربي بيدك الميه , لو ذااكرت التيست باانك زي اسمك..

فطبعا لازم تبدوا فيه من بدري , لانو يبغااالوا حفظظظظظظظ فهم كماانا , وتربط وكل شي..