بخصوص ما حصل باختبار مبادئ الإقتصاد الجزئي 101

[s7s4you]

بسم الله الرحمن الرحيم
والصلاة والسلام على سيد المرسلين نبينا محمد وعلى آله وصحبه أجمعين أما بعد
حبيت أطرح موضوعي هذا هنا لعل الله سبحانه وتعالى يسخر لنا من يوصل هالكلام للمشرفين والمسؤولين لأنه فعلا ضاقت بنا السبل ولم نعد نحتمل

الموضوع وما فيه إختبرت يوم الخميس الماضي مادة مبادئ الإقتصاد الجزئي 101 المادة كانت بالنسبة لي بسيطة وسهلة وفعلا بما إنها أول إختبار كنت مذاكرها ولكن تبقى صعوبتها بالعمليات الحسابية الدقيقة والمملة عموما النموذج (د) كان من نصيبي وللأسف أول مرة أقرا الأسئلة قبل الحل بالصفحة ما قبل الأخيرة تقريبا كان فيه رسم بياني وعليه تقريبا 16 درجة على أقل تقدير والمشكلة الرسم البياني فيه خطأ من طباعة الأسئلة وهو إن الرسمة داخلة ومتشابكة مع الأسئلة والفقرات الي فوقها والأدهى والأمر إن الرسمة كلها أرقام حساسة جدا وعليك تحل 8 فقرات تقريبا بالصفحة الأخرى بنائا عليها، ، ،

ناديت المشرف الي بالقاعة وبلغته بالمشكلة وفعلا ما قصر راح على طول وقال حل الباقي وسيب هذا على بال ما أشوف دكتور المادة ،،،

والله ضاعت المعلومات وتشتت ذهني وما عرفت أحل شي وأخيرا جاء دكتور المادة وبلغه المشرف وقاله فيه مشكله رد عليه الدكتور بكل (...) وقاله بصوت منخفض أدري وضرب الباب ولا كأنه فيه شي ضاقت بي الدنيا وقتها وفعلا كنت باقوم وراه ولكن خفت الله سبحانه بالشباب الي بيختبروا معانا حرام اشوش عليهم ولكن بصوت أعلى من الي قبله ناديت على المشرف وكلمته بصوت منخفض جدا قاطعني مباشرة وقالي إنت سمعت الي قاله طيب والحل قال أبروح أشوف المشرف فوق وأرجع ، ، ،

راح وليته ما راح جا ومعها الدكتور نفسه والله لا شعوريا تحركت من مكاني أبي أقوم له بكل برود يقول أنا عارف أنه فيه مشكلة بالرسمه ولكن هي واضحة وتقدروا تحلو وعموما الي مذاكر يحل واحنا راح نساعدكم ،،،

فعلا دمعت عيني بالقاعة قهر لتدهور نفسيتي بوقتها ولوفاة ولد خالتي قبل الاختبار بأربعة أيام تقريبا وأيضا لتعبي الي راح مع الي راح ، ، ،

3000 ريال للترم مدرسين خصوصيين 2000 مسافة السفر 1300 كلم مصاريف سكن وأكل وشرب 2000 ضيق وقتك بين العمل والدراسة والبيت ، ترك من نحب وفراقهم وجعلهم متوترين لدرجة الهوس أدخل الإختبار وأطلع وأحصل بجوالي أكثر من 100 مكالمة ورسالة بسبب الأجواء والتحذيرات وغيرها وإن كانت المدة قصيرة ولكن العمر لحضة ، ، ،

ياليت المشكلة كانت بورقتي ولكن للأسف كانت بالنموذج كامل طيب كيف تمت طباعة الأسئلة طيب الي طبع الإسئلة معقولة ما لاحظ هالمشكلة طيب الي دبس الأوراق ما لاحظ هالمشكلة دكتور المادة ما راجع نماذج الأسئلة بعد الطباعة على كذا ممكن تكون وضعية الإختيارات خطأ والطلاب يحلون صح والماسح الضوئي يقراها خطأ ويمكن ويمكن ويمكن ولا حول ولا قوة إلا بالله ، ، ،

أعتذر على الإطالة وعلى النظرة التشاؤمية ولكن هذا الي صار نحن كطلاب جامعة وكطلبة طموحين وكطلبة منتسبين لابد أن يكون الأفضل لنا بكل شي بالتعامل بالتقدير بالمساهمة لتحقيق مبتغانا



تحياتي وتقديري


عَنْ أَبي هُرَيْرَةَ رَضِيَ اللهُ عَنْهُ أَنَّ رَسُولَ اللهِ صَلَّى اللهُ عَلَيْهِ وَسَلَّمَ قَالَ : « مَنْ جَلَسَ مَجْلِساً كَثُرَ فِيهِ لَغَطُهُ ، فَقَالَ قَبْلَ أَنْ يَقُومَ مِنْ مَجْلِسِهِ ذَلِكَ : سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ ، إِلَّا غُفِرَ لَهُ مَا كَانَ في مَجْلِسِهِ ذَلِكَ » .
أخرجه أبو داود والترمذي واللفظ له والنسائي وابن حبان في صحيحه والحاكم