لكل الراغبين في الكليات الصحية وكلية الهندسة .. طريقة فرز الطلاب بعد السنة التحضيرية

[عماد3]

السلام عليكم ..


بدون مقدمات انا سبق وكتبت موضوع نزلت فيه فرز السنة التحضيرية لعام 1430/1431
تقدروا تشوفوا الموضوع من هنا
http://www.skaau.com/vb/showthread.php?t=325322

وهذا مثال حطيتو لواحد من طلاب العام الماضي ..





نجي في المهم..

كثير منكم سالني دحين هذا الطالب نسبته الخاصة في الطب الموازي 86.2
والكلية طلبت اقل شي 85 ..واقل نسبه قبلوها الكلية 83.77 (شوفوها اخر الجدول )
ليش مكتوب قدام هذه الخانة : استبعدت الرغبة في المفاضلة
طيب هوا جايب الشرط المفروض يكتبوا قدامو : حققت له رغبة اعلى او اي حاجة بدل هذه الجملة ..

هنا ان شاء الله راح نعرف ليش كتبوا هذه العبارة ونعرف كيف يتم الفرز تدريجيا حتى يتسكن الطالب في الكلية المناسبة ..

قبل ما ابدا في اشياء لازم تعرفوها ..
اول شي لازم تعرفوا ايش الفرق بين النسبة الخاصة والعامة

النسبة العامة : هي نسبة درجات الطالب اللي جابها في جميع مواد السنة التحضيرية بدون استثناء


النسبة الخاصة: هي نسبة درجات الطالب اللي جابها في بعض المواد .. مثلا لو النسبة الخاصة للهندسة تحسب درجات المواد هذه : فيزياء .. رياضيات .. انجليزي(2-4) .. احصاء .
ولو تبغى النسبة الخاصة لكلية الطب تحسب : فيزياء .. كيمياء.. انجليزي (2-4) ..احياء.

وطبعا النسبة العامة والخاصة كلها من 100 .. مو من 5
النسبة اللي من 5 هذه اتركوها على جنب ما حنحتاجها في التسكين ولا راح يشوفوها اصلن.

طيب كيف نحسب الدرجة المزونة العامة والخاصة ؟؟
تقدروا تشوفوا الطريقة من هذا الرابط
http://www.skaau.com/vb/showthread.php?t=305937

نجي في طريقة الفرز
زي مو مكتوب في موقع الجامعة هذه معاايير التسكين لجميع الكليات :
اجتياز جميع متطلبات السنة الأولى بنجاح ( النجاح في جميع المقررات )
+
بعض الكليات تشترط حد ادنى لنتائج بعض المواد
+
المعدل النسبي للتسكين
+
الطاقة الاستيعابية لكل كلية
=
التسكين في الكلية المناسبة

حلو ؟؟

دحين نجي لصاحبني دا اللي فوق .. نسبتو العامة كانت 77.40 (النسبة العامة مهي مكتوبة في الجدول .. تكون مكتوبة في ملف الطالب وبس )
ونسبته الخاصة لكلية الطب الموازي كانت 86.2
نجي نشوف اذا الطالب حقق الشروط كلها ولا لا :
الشرط الاول :
اجتياز جميع مقررات السنة التحضيرية بنجاح
الطالب نجح في كل المقررات .. عدينا اول شرط

الشرط الثاني :
بعض الكليات تشترط حد ادنى لبعض المواد
هنا كلية الطب الموازي تبغى 85 والطالب جاب 86.2 .. عدينا الشرط الثاني

الشرط الثالث : ( الشرط الغامض .. اللي ما حنعرفوا الين ما نخلص السنة)
المعدل النسبي للتسكين
هنا تتم المفاضلة بين الطلاب اللي جابوا 85 وفوق في النسبة الخاصة للطب ..
وهنا راح يشوفوا النسبة العامة للطالب
نجلي لصاحبنا دا اللي جاب في النسبة العامة 77.40
نشوف في خانة ( موزونة الكلية ) مكتوب 83.77 !!!
وهذا يعني انو اقل نسبة عامة قبلوها في الكلية هيا 83.77
هنا تم استبعاد هذا الطالب المحترم وعشان كذا كتبوا في هذه الخانة : استبعدت الرغبة في المفاضلة

نجي في مربط الفرس ..
يا جماعة الخير لما يقولولكم العام الماضي قبلو في الطب لين 89 .. هذا مو معناتو انهم قبلو كل اللي نسبتهم الخاصة 89 وفوق .. لان في ناس نسبتهم الخاصة 86 وانقبلو..
وكمان مو معناتو انهم قبلو كل اللي نسبتهم العامة 89 وفوق .. لان في ناس جابو في النسبة العامة 90 وما انقبلوا ..

لكن الحقيقة هي انهم حددوا الطلاب اللي جابوا في النسبة الخاصة للطب 85 وفوق ..
واختاروا منهم اعلى نسب عامة لين وصلوا 89 واكتفوا.

الخلاصة :
1/اللي ما جاب في النسبة الخاصة للطب 85 وفوق .. ينسى شي اسمو طب.
2/اللي ما جاب في النسبة الخاصة للهندسة 80 وفوق .. ينسى شي اسمو هندسة.
3/المفاضلة دائما تكون بين الطلاب اللي حققوا النشبة الخاصة.

اتمنى وصلت الفكرة .. واذا في اي سؤال انا جاهز

[طارق الحارثي]

ماقصرررت الله يوفقك كفيت ووفيت
انا صراحة ماقريت الموضوع ولا بقراهـ

لاني ماني فاضي حسابات وكيف ادخل وليش ما ادخل
انا بشد حيلي وبحط رغباتي والله يكتب الي فيه الخيررر

الشئ الي مو مكتوب للانسان ماراح يدخله لو سوآآ ايش

[إبداع آخر]

أنا حسب ماسمعت إن النسبة الخاصة تدخلك فقط المفاضلة

بعدين يشوفوا النسبة العامة و يفاضلوا

[طارق الحارثي]

الخلاصة : 1/اللي ما جاب في النسبة الخاصة للطب 85 وفوق .. ينسى شي اسمو طب. 2/اللي ما جاب في النسبة الخاصة للهندسة 80 وفوق .. ينسى شي اسمو هندسة. 3/المفاضلة دائما تكون بين الطلاب اللي حققوا النشبة الخاصة

انا اشك في صحة هالكلام

وحتى لو كان الكلام هذا صحيح مايصلح تكتبه والطلاب الان في مرحلة حصآآد واختبارات فايننل

الله يهديك

هذا الموضوع وقته بعد اخر اختبار فاينل

[NEBRAS..]

يعطيك العافية اخوي ع الشرح المفصل..

موضوع متعوب عليه صراحة..

في سؤال واحد اللي هوا كم عدد الطلاب الل تستوعبه كلية الطب والهندسة والحاسب..>>مابقيت شي.

[طارق الحارثي]

وبعدين انت طالب تحضيري مثلنآ
من فين جبت هالمعلومات الي تقول صحيحة

اتمنى ماتكون من خيآلك الواااسع

[pinkberry]

يعطيك العافيه اخي الكريم على الموضوع المفيد ,,, عندي استفسار لو كانت نسبتي الخاصه في ال4 مواد 95 حادخل في المفاضله برضو ؟ وهل الي نسبته الخاصه 95 زي الي نسبته الخاصه 85 ؟ والمفاضله تعتمد فقط على النسبه العامه ؟ وشكرا ,,, :)

[عماد3]

المشاركة الأصلية كتبت بواسطة طارق الحارثي وبعدين انت طالب تحضيري مثلنآ من فين جبت هالمعلومات الي تقول صحيحة اتمنى ماتكون من خيآلك الواااسع

اول شي اذا انت ما يهمك في ناس يهمهم هذا الشي..

وثاني شي لازم كل واحد يعرف ايش حيصير عشان يعرف هوا قد ايش باقيلو على الكلية اللي يبغاها ويحاول يشد حيلو .. مو نجي اخر السنة ونقول والله نظام الجامعة صعب وانا ما كنت فاهمه عشان كذا ما قدرت اتخصص.. وهذا االموضوع لو تعتبره انت تحطيم في ناس غيرك يعتبره حافز

واخر شي احب اقلك اني دارس النسة التحضيرية مرتين وقابلت العميد ووكيل العميد وعميد كلية الهندسة والطب ورؤساء بعض الاقسام على مدار سنتين وهذه المعلومات اللي جمعتها ..

وعندي ملعومات عن التحضيري دكاتره ما يعرفوها .
وتجي انت تقول من خيالك الواسع !

[عماد3]

المشاركة الأصلية كتبت بواسطة إبداع آخر أنا حسب ماسمعت إن النسبة الخاصة تدخلك فقط المفاضلة بعدين يشوفوا النسبة العامة و يفاضلوا

كلامك صحيك
و نفس الكلام انا كاتبه .. النسبة الخاصة ظرورية للتسكين لكن مهي حاسمة

[عماد3]

المشاركة الأصلية كتبت بواسطة nebras.. يعطيك العافية اخوي ع الشرح المفصل.. موضوع متعوب عليه صراحة.. في سؤال واحد اللي هوا كم عدد الطلاب الل تستوعبه كلية الطب والهندسة والحاسب..>>مابقيت شي.

حياك الله حبيبي وما سوينا الا الواجب ..

بالنسبة لعدد الطلاب والله ما ادري بالضبط كم كان .. لكن اللي اذكره الطب 200 او 150 طالب
والهندسة 400

باقي الكليات ما ادري عنها
ولو حبيت استفسرلك ما عندي مشكلة ...
^_^