الله من هم بكبدي

[عطيب الضرايب]

الله من هم بكبدي سعرهــــــا
دلي يمل القلب مل الشواتــــي
وشخانة الدنيا سريع دورهــــا
لو اقبلن سنينها مقفياتـــــي
ومن عقب ماني مقفي عن نحرهــا
اليوم بين القين هو والحذاتـي
ومن عقب ما نلبس غرايب شهرهـا
من فوق قبٍ عندنا مكرماتـــــي
يوم ان خيال الندم ما قصرهــا
عمن جذت به نفهق الاولاتــــــي
واليوم طيبنا عن الشيل مرهــا
يا حيف مانستاهل المعسراتـــي
حلال عقداتٍ كبارٍ عبرهــــــــا
وخالق نجومٍ بالسما ساهراتـــي
ما مالٍ الا فارغٍ من زبرهـــــا
ولاحي الا مقتفيه المماتــــــي
يا رازق اللي ما بعشه ذخرهــا
طيور الهوى في قدرتك عايشاتـي
تفرج لمن عينه تزايد سهرهـــا
الطف بنا يا عالم الخافياتــي
ياللي خلقت أقفارها مع بحرهـا
يا من بحكمك تجري الكايناتــي
أوجست من حر الليالي سعرهـــا
وذكرت طيب أيامنا الفايتاتــي
ونشدت وين اللي ينثر حمرهـــا
وقمت أتذكر وين حروة شفاتـــي
اللي الى جاء الخيل خبث كدرها
صوته ذعار القرح الصافناتـــي
عقاب السبايا كان جاها ذعرهـا
عوق العديم ومشبع الحايماتــي