تعريف بمواد كلية الإقتصاد والإدارة

[الحـ العيوف ـلم]

السلام عليكم ورحمة الله وبركاته
بما أنه أحنا وقت تسجيل في الكليات فا جتني فكره أنى أعرف بكليتي للي ما يعرفون بها أو عارفين بس يبون زياده بالتوضيح وأعتقد أكثر شئ بيفيد الطلبه والطالبات المستجدين والراغبين بالتحويل قبل التعجل
طبعا جلست فترة وانا أحاول أجمع بالبيانات ومعلومات عن المواد وإذا فيه شئ ناسيته فاللي عارف يذكر به أن الذكر تنفع المؤمنين.....وبسم الله راح ابدأ

قصد 101 إقتصاد جزئي : اغلبه فهم وفيه نسبة حفظ .... تتكلم عن العرض والطلب على السلع او الخدمات , نظام السوق , الاحتكارات ... أشياء معاصرينها بواقع حياتنا ... سهله وحلوه بس يبيلها شدة حيل
قصد 102 إقتصاد كلي: مختلط مابين الفهم والحفظ .... يتكلم عن الاستهلاك والادخار والاستثمار والتضخم و التجارة الدولية , التنمية والنمو والبنوك ..... مادة واقعيه كثير طالبات يقولون فهمها بسيط بس أنا أشوفها أصعب من الجزئية وأنت الحكم
========================================
درع 101 مبادئ الإداره العامه : ماده فيها شرح وافي عن الإدارة وتعريفها والعلماء والنظريات اللي فيها 100% حفظ
BUS 102 مبادئ إدارة أعمال: مادة 70 % حفظ والباقي فهم ... كيف تدار المنشأة , انواع الخطط وكيفية تطبيقها
درع150 الفكر الإداري الإسلامي: ماده ممتعه للغاليه تعرف الطالب كيف نهضة الدوله الإسلامي في ضل الرسول والخلفاء الراشدين وكيف كانوا يتدبرون أمور رعاياهم من المسلمين والمستوطنين من غير المسلمين في الدولة الإسلاميه من الصين وحتى المغرب...مادة سهله جدا ولذيذه جدا كأنها حواتيت
========================================
مجاسبة101:وهي تعتمد على الفهم 100% وتعتبرعملية تحديد وقياس وتوصيل المعلومات الاقتصادية ليتمكن المستفيدون منها من التصرف بكل رؤية واضحه واتخاذ القرارات السليمة وتبين فروع المحاسبة وهي على ما أعتقد عبارة عن 10 فصول .
بصراحة هي أسااااس المحاسبة لااااازم أي واحد منا تنزل له يشد حيله فيها ويحاول قدر المستطاع انه يعطيها حقها لأنه بتفيده كثييير وتسهل عليه الصعب ان شاء الله فلا تستهينوا فيها وشدوا حيلكم
محاسبة 102: كذالك كاسابقتهافهم ...... 7 فصول .. كل فصل يتكلم عن موضوع معين من ( رواتب واجور , شركات المساهمه شركات التضامن , محاسبة التكاليف , المحاسبه الحكوميه ... )
ماده حلوه ... لازم تتذاكر أول بأول مو شرط يوميا لا على الاقل كل نهاية فصل ... وعندي انا اسهل من 101
وعموما مواد المحاسبه دراستها باختصار تكون عن طريق الورقة والقلم وحل كل سؤال ( مهم جدا )
=======================================
101سلم: 100% حفظ والفهم فيها يستخدم لخدمة الحفظ !! .... يتكلم عن ثقافة المسلم الاسلاميه بشكل عام
102سلم: يتكلم فيها عن العبادات بشكل عام
103سلم: الزواج ومشتقاته
وكلها سهله يعني جمعوا درجات بالهبل لا تطوفكم زي كذا مواد عشان بيجيكم الرك بعد كذا تتمنون الدرجات اللى ضيعتوها بالمواد السهله زي الثقافه الإسلامية
======================================
101عرب:التحرير العربي .... علامات الترقيم , الاخطاء الكتابية الشائعه( سواء النحويه أو الاملائيه) , المقال , الفقرة , التلخيص .
مادة سهله سهله سهله ...
102عرب: قوااااااااعــــــد المدرسة ماغيره
كمان مواد العربي مواد سهله وهايفيه وعار عليكم لو ماجبتوا فيها A+ من سهولتها لان اللى تاخذونه بمواد العربي هي نفس اللى ياخذونها طلاب رابع أبتدائي
======================================
MATH101 مادة رياضيات : فيها شبه كبير من رياضيات الثانويه العامه يعنى أكثر شئ تتكلم عن التفاضل والتكامل إن ماخاب ضني وطبعا رياضيات أكيد تعتمد على الفهم وحل كل مسئله وبنفسك عشان ترسخ وتعتبر من المواد السهلة
BL101 مبادئ القانون: كلمة غنية عن التعريف ,, بصراحة لو نظرنا لهذي المادة من منظور غير اللي ننظر منه راح نلقى انه المادة انت ممكن تعبر فيها من مخزون المعلومات عندك من غير دراسة يعني سهله لاتشيلون هم
PS101 مبادئ علم سياسة: وهذي الماده أقدر أقول سهله من سهولتها صايره غلسه وهي تعتمد بشكل كبير على سياسة القرون الوسطى كأبن خلدون وغيرهم
STAT101 أساسيات الإحصاء: وهذه الماده تعتبر البعبع لمعظم الطلاب والطالبات ليس فقط لصعوبتها بل لعدد ساعاتها وهي 4 ساعات التي من شأنها تخسف معدل الطالب إذا ماشد حيلة من البدايه وبذل كل طاقته ومجهوده وتركيزه في هذه المادة بالذات....وبشكل عام أقد أعرفها بأنها احصاء للمعومات وطريقة جمعها وعرضها و تبويبها وتحليل المعلومات التي تم جمعها , 70% فهم و 30% حفظ ... والفهم (المسائل) فيها مو صعبه وكمان مو سهله على حسب الفصول بس يبغالها شوي تركيز .
ECON205 تحليل إحصائي : مادة سهله جدا جدا أسها من أساسيات الإحصاء وطبعا تعتمد على الفهم والتركيز100% وحل المسائل أول بأول
BUS201 تطبيقات الحاسب: ومن أسم الماده تعتمد 100% على الحاسب الآلي ولابد من متابعة دروسك بالمنزل على الحاسب لان بهالمادة بالذات المذاكره الشفهيه أو النظريه لاتكفي إطلاقا لابد من العملي لترسيخ المعلومه خصوصاً اللي ماعندهم خبره أو معرفه إطلاقاً عن الحاسب الآلي..... ولاتخافون الماده سهله جدا جدا وخساره تضيع فيها درجات يعني بصريح العباره لازم تاخذ فيها 100%
BUS202 مهارات الإتصال : ماده تعتمد على الحفظ دون الفهم وهي سهله جدا
PS211 نظام الحكم في المملكه : ومن أسم المادة تتكلم على سياسة وتوحيد الملك المغفور له عبدالعزيز آل سعود رحمه الله يعني تاريخ خامس وسادس أبتدائي .....الماده سهله وتعتمد على الحفظ الشديد لانها تواريخ الفتوحات والمعارك والغزوات...إلخ عاد أنت وحظك مع الأستاذ\ة إما يطالبك بالتاريخ الهجري والميلادي معاً في كل حدث أو بالتاريخ الهجري فقط
PAD200 مبادئ البحث العلمي : ماده سهله سهله سهله بكل ماتتحمله الكلمه من معنى تعتمد على الحفظ بنسبة 90% والفهم 10% ونصيحتي إذا أخذتوا الماده هذي بالذات لاتحاولون بعدين تفرطون فيها (ترمونها أو تعطونها غيركم) أحفظوها عندكم لانكم بعد كذا مطالبين في كل المواد الجايه إلين ماتتخرجون إن شاء الله بالإلتزام وتطبيق مبادئ البحث العلمي في كل بحوثكم وتكاليفكم فتكون الاشياء اللي حفظتوها بمثابة المرجع لكم.
ECON204 التحليل الكمي: مادة رياضية بحته تجمع مابين الرياضيات والتحليل الإحصائي لكنها مياله أكثر للرياضيات وسهله جدا جدا ( ملحوظه ونصيحه : لاتاخذون التحليل الكمي إلا بعد ماتاخذون الرياضيات والإحصاء والتحليل الإحصائي بالترتيب لانها تعتبر أساسيات للتحليل الكمي )
ENGL110 اللغة الإنجليزية : مادة سهله جدا وهي عباره عن قواعد اللغه الإنجليزيه اللى سبق وأخذتوها في ثاني متوسط
PAD223 سلوك تنظيمي : مادة سهله وممتعه جدا تعرفك على سلوك وشخصيات الناس وكيف تتعامل معهم داخل المنظمه...أعتقد أن هالمادة تفيدك بحياتك العامه....طبعا تعتمد على الحفظ والتركيز عشان لاتتلخبط بين الشخصيات ونظريات العلماء والعلماء أيضاً لانك مطالب بحفظ أسمائهم.

هذي اللي قدرت أجمعه عن متطلبات الكلية فقط وأنشالله بالمره الجاية راح أحاول أعرف بمواد تخصصي إداره عامه مسار تطوير وتنظيم وأن قدرت أجيب معلومات عن باقي التخصصات بحطها بهالموضوع واللى عنده أو عندها إضافات عن الكلية واللي حاب يعرف عن مواد تخصصه جزاه الله خير لا يبخل علينا.....وعشان يكون هالموضوع بمثابة مرجع أو سجل يمكن الرجوع له لكل من خطر على باله إستفسار في مواد الكلية وتخصصاتها لابد من التعاون لان تعرفون اليد الوحده ماتصفق وانا ماني ملمه بكافة مواد الكلية لكن أحاول أسوي اللى أقدر عليه

وإن شاء الله أكون أفدتكم باللي عندي والعذر والسموحه لو قصرت أو أخطيت وياليت لو تصححون لي

تقبلوا تحيات الحـ العيوف ـلم