Respect The Dead =)

[Dr.Passed]

السلام عليكم ورحمه الله وبركاته ورضوانه


كيف حالكم...؟ طيبين...؟ بناءا على طلب البعض حاحكيكم قصه شويه ممكن تكون مخيفه للبعض سارت لماما اثناء دراستها في كليه الطب في الرياض ...لو خوافين باااااااااااااااااااااااااااااااااي

قبل ما اقلكم القصه: الخوافين لا تقرو بليز اوكي؟

كان يا مكان ..ماما كانت تدرس في كليه الطب في الرياض..كانت عندها وحده من صحباتها تدرس ادبي انجليزي ( كانت سابقا تدرس طب وسحبت) السبب انو تعرفو ايام زمان في مصر كانو يسحبو الجثث...يعني كانت حوالي 50 جنيه..فالبنت دي صاحبه ماما الي خرجت من كليه الطب اخدت جثه من واحد كان يدروس عليها ونضفوها وكلي حاجه واخدتها عشان تسير تدرس عليها...البنت فجأه سارت تقول يقوملي في الليل و انا احس بحركه غير طبيعيه و اسمع بأشياء تتحرك و الخ..وبعدين ماما تقول البنت دي سابت كليه الطب وحولت ادبي انجليزي...سألتها ماما عن الجثه تبغى تدرس عليها ..قالتلها البنت سبناها في بيت مهجور في مكه..وماما من الرياض ( كانت في السكن ) كلمت سيدو في جده وقالتلو اطلع مكه جبلي هيا ابغاها عشان ادروس عليها) طبعا ماما ماصدقت كلام البنت ...سيدو بسرعه راح جابها من البيت المهجور الي تركت البنت الجثه في...جبلها الجثه ( لقوها في البلكونه) جابلها هيا واخدتو ماما وقعدت تنضفو في الحمام ( الجثه عباره عن هيكل عضام يدروسو عليها) المهم غسلتها ونشفتها وحطتها عندها على الأرض) يالطيييففففف في نفس الغرفه الي تنام فيها ماشاء الله..

طبعا مرت الأيام وماما تقول انها كانت تنام عادي وماتحس في شي..مرتااااااااااااااااااااااااااحه..و الوضع طبيعي

تقولي يوم من الأيام دخلو عليها البنات في الغرفه وجات وحده وقعدت تتريق على الجثه وجات شاتت برجلها الجمجمه بالقوه واستهترت بيها...وطبعا ماما تقول انها مره عصبت وصرخت عليها وقالتلها كيف تسوي كده لازم الميت ليلو احترامو ميسير كده...مايجوز طبعا البنت استهترت في الموضوع...ومامرت الا اسابيع قليله الا والبنت دي مسكينه ما كملت وتعبت...و اضطرت انها تسحب وماقدرت تكمل في كليه الطب معد سارت زي اول مرضت
طبعا ماما من داكا اليوم من يوم ما البنت هادي شاتت الجمجمه تقولي كلي يوم لمن تنام في الليل سارت تحس "انها مهي لحالها" تقول احس بشي...حاسه انو في احد غيري معايا في الغرفه...سارت تحس في وفي حركه بسيطه
برضو طنشت ( ماما من النوع الي مايصدق اي خرابيط ولا تكبر الأمور يعني طبيعي عادي تحط راصها ماشاء الله وتنام...حتى لو حاسه انو في شي تبين انو لأ مهي حاسه بحاجه ) قولو ماشاء الله ماهي خوافه =)
المهم..

تقولي بعدها بكم يوم كانت بين النوم والصحيان تقول شافت وحده متحجبه وماشاء الله وجهها نوووووور وقالتلها انو الجثه هادي واحد كان رجل صالح اسمو "حسان" يشتغل حلاق في مصر..وحكتها عنو..
كلمت ماما سيدو بسرعه وقالتلو ارسيلي احد يستلم الجثه بسرعه انا ما ابغاها..وقالتلو انها خايفه وما اعرف ايش والمهم تعال خدها..رسل سيدو ( الي هوا جدي) واحد يستلمها من السكن ويجبلو هيا وسيدو حطها عندو في المكتب فوق الدولاب..
مرت الأيام وماما سألت نفس البنت الأولى صاحبتها الي كان عندها الجثه اول وحده ....قالتلها مين دا وايش اسمو؟ البنت صاحبتها قالتلها انو اسمو "حسن" ...استغربت...



مشيت الأيام وحده تانيه من صاحبات ماما (مصريه) سمعت بموضوع الجثه وقالتلها هاتيها ليه وديتيها انا ابغاهاادروس عليها>>>> ما حنخلص




ماما رجعت اخدت الجثه وادتها الأدميه دي..طبعا البنت دي ماقالت لأمها ..اخدت الجثه وقعدت تغسلها هيا كمان في الحمام..جات امها فتحت عليها الباب وقالتلها "يااااااالهههههوووووويـــــــــــــــ" وقالتلها ابدا الجثه دي ماتقعد في البيت دقيقه وحده...رجعت البنت دي قالت لماما خديها...طبعا ماما رفضت بشده ...واخيرا اتفقو انهم يحطوها في كرتون ويحطوها في الفصل عندهم في الجامعه الين مامرت الأسابيع و الشهور وكلي وحده تستعير عضمه تدروس عليها...الين ما اخر شي اختفى...مابقي شي من الجثه...وتوته توته خلصت الحتوته



الغرض من القصه: احترمو الميت و الجثث ليهم حرمه...والموضوع مش لعبه...احنا ندروس عليها نتعلم عشان نسير نعرف نعالج...خدو الموضوع بجديه للأسف البعض لايقدر هادا الشي =(





سوري طولت عليكم
اتمنى انكم تكونو استفدتو

[THE HILL]

هههههههههههههههههههههههه


انا خواافه بس ما خوفت > دليل اني صرت قويه





ع العموم انا راايحه ابلغ على كل اللي مذكورين في القصه " تدخل جثه بدون علم الدوله "


غير كذا الحكاايه " عظام " يعني مدري احس كاني اسمع اساطير خخخ الا متااكده




دكتر بااسد ترا في نااس يسحبو من الطب بعدين وحيجو صيدله وعلوم طبيه" الكراسي ما تكفي "





بالتوفيق للي يردو بعدي هههههه



بعلق ع نقطه احترام الجثه " الجثث اللي عندنا كاافرة " يعني جثه حسان مدري حسسن نصرانيه لانو لو مسسلم مصييبه ^^...

[Dr.Passed]

ههههههههههههههههههههههههههههههههههه روحي نامي بس
هما ياخدوها يدروسو عليها وبعدين محد راح يسحب الجثه...حسان جاهم
ايام زمان كان غيــــــــــــر طبعا

كان يجيهم دكتور في البيت يشرحلهم عليها...بعدين الرجال داكا لمن خلص اداها البنت دي صاحبه ماما وبدأت المغامرات p:

كيف يعني اساطير اكيد عضام ايش حتكون يعني

[Dr.Passed]

المشاركة الأصلية كتبت بواسطة the hill بعلق ع نقطه احترام الجثه " الجثث اللي عندنا كاافرة " يعني جثه حسان مدري حسسن نصرانيه لانو لو مسسلم مصييبه ^^...

وي وي وي

ختى لو الجثه كافره ما نحترمها يعني؟ لازم ...مايجوز

[THE HILL]

المشاركة الأصلية كتبت بواسطة dr.passed وي وي وي ختى لو الجثه كافره ما نحترمها يعني؟ لازم ...مايجوز

نسجدلها مثلا مجرد جثه واتششرحت وانتهينا خخخخ

[No_0ne]

.............
مع احترامي لكن ممكن الي حسوو بيه مجرد تهيأت يعني اسمها جثاا كيف تتحرك ؟؟؟
و زي ما قلت يمكن تكون خيالات :( و حتى من ناحيه الحلم الاسمين مختلفين و ممكن تكون جت بالصدفه ....
و انا اتفق معك الموتى لهم احترامهم حتى لو كانو جثث :)
تحياتي و الله يستر شكلي ما هنام الا على الصبح :(

[Dr.Passed]

No one
ماما تقول انها هيا مره تأثرت لمن البنت شاتت الجمجمه ...فتقول انها امكن الحركه الي حست فيها كانت من كتر ماتأثرت..

قلتلك هههههههههههههه لاتخافي ماما ماتصدق اي شي بسهوله دايما تاخود الأمور بطريقه علميه بس هي استغربت من قرب الأسامي =)

الله يعينك انا كمان حاقعد للصبح وكمان حانام لحالي =(

[أثير العالم]

د.باسد جمعت البيت كله عشآن كنت خآيفة بس مو مرة انرعبت من القصة :/
بس برضوو الجثث تخووف..
ماشاء الله في ناس قبل مآ يموتو يوصو آن جثثهم تروح للجامعات وكذا عشآن يدرسو عليهآ الطلآب..
ياقوة قلوبهم :‘(
شكرآ د.باسد <3

[Dr.Passed]

المشاركة الأصلية كتبت بواسطة the hill نسجدلها مثلا مجرد جثه واتششرحت وانتهينا خخخخ

المشاركة الأصلية كتبت بواسطة the hill

لا طبعا " على فكره انتي قاعده تتريق عليهم دحين"

________________

الإحترام يكون انو احنا ما نأزي الجثه ولا نضحك عليها...مانكشفها من غير داعي لذلك...نغطيها ونسترها ...ما نرميها بالقوه....نعاملها وكأنها تحس ...مايجوز ضربها و تصقيعها كأنها خشبه...لابد من الإحترام

[Dr.Passed]

المشاركة الأصلية كتبت بواسطة أثير العالم د.باسد جمعت البيت كله عشآن كنت خآيفة بس مو مرة انرعبت من القصة :/

المشاركة الأصلية كتبت بواسطة أثير العالم بس برضوو الجثث تخووف.. ماشاء الله في ناس قبل مآ يموتو يوصو آن جثثهم تروح للجامعات وكذا عشآن يدرسو عليهآ الطلآب.. ياقوة قلوبهم :‘( شكرآ د.باسد <3

أنا نمت عند مامي.....امزح ههههههههههه
انا كنت اقول اني ابغى اسوي كده لمن كنت صغيره هههههههههههههههههه بس تفكيري اتغير دحين اكيد