تجربتي مع السنة التحضيرية

[ibrahim_13]

بسم الله الرحمن الرحيم

فالبدايه أبارك للي انقبلوا بالسنة التحضيرية , وبدون مجاملات السنه ذي كانت من اجمل وأسهل السنين على معظم الطلبه (طبعا للي كانوا يذاكروا أول بأول وأخلصوا النية لله ) وصدقوني (( على ماقد تعطوا الماده حتعطيكم )) <<<<طبعا ذي المقولة سرقتها من شخص عزيز عليا اسمه د. محمد الداود , ولا تنسوا انه السنه ذي هيا بداية حياتكم الجامعية , وهيا الي بتحدد مصيركم .

طيب الحين حسدحلكم طريقة المذاكرةو أماكن الملخصات

الاحياء : ذي الماده كانت من اسهل المواد , لأنو اختباراتها كانت بتجينا (نسخ , لصق) من التست بنك وبالنسبه للتست بنك تقدروا تشتروه من مكتبة خوارزم ذا بالنسبه للاولاد اما البنات , اشوف انو افضل شي تحملوه من موقع رئيسة قسم الاحياء اللي عندكم ...وذي الماده اهم شي فيها انكم تترجموا الكلمات الصعبه بنفسكم وتحفظوها وبعدوا عن (التيست بنك المترجم) اللي بالمكتبات .

الفيزياء : ذي الماده كنت احبها من ايام الثانوي و ما واجهت فيها اي صعوبه , واكثر شي فادني بذي الماده ملخصات اشرف بركات ...ولا تنسوا اشتروا الملخصات الجديدة (راح تلقو بكل ملخص رقم بالرأس العلوي لغلاف الملخص , وذا الي حيبينلكم الجديدة من القديمه واعتقد انتم رقمكم حيكون 05) وحاولوا انكم تفهموا الدروس مو بس تحفظوا لأنو المنهج مترابط المعلومات .

الكيمياء : ذي المادة كنت اكرهها من ايام الثانوي وسبحان الله اتغيرت نظرتي تجاه هذي المادة بعد ما اديتها حقها واجتهدت فيها , ولو تبغوا تجيبوا a+ بذي الماده لازم تحلوا اسئله بكثرة عشان تتعودوا ولا تنسوا ( حلوا اسئلة الاختبارات القديمة بمادتي الفيزياء و الكيمياء) لأنها اهم شي من وجهة نظري , وبالنسبة للملخصات انصحكم انكم تشتروا اكثر من ملخص للماده ذي زي ملخص يوسف زويل أو ملخص السيد , وادخلوا على موقع د سمير سنيور وراح تلقوا اسئلة حاولوا انكم تتمرنوا عليها ولو حسيتوا نفسكم فاضيين اشتروا الكتاب الاسود حق الكيمياء وحلو فيه الاكسامبلز chemistry for prepare year .

ملاحظة : بمادة الكيمياء و الفيزياء قبل الاختبار بيومين لخصوا القوانين كلها بورقة خارجية .

الرياضيات : ذي المادة خبصت فيها لأنو جابولنا اختبار تعجيزي كله لف ودوران بس ابشركم غيروا منسق المادة وصارت اختباراتهم سهله , بس لاتستهينوا فيها وذاكروها أول بأول من ملخصات جمال السعدي واذا لقيتوا اختبارات قديمة حلوها .

الاحصاء : ذي المادة يبغالها جهد و تفكيير , يعني افهموها اول باول وادخلو على موقع الدكتور سعيد الغامدي وحملو منه السلايدات واحفظوها وذاكروا من ملخص اشرف بركات للأحصاء وقبل الاختبار بيوم حلوا نماذج الاختبارات القديمة .

مهارات الاتصال : ذي الماده كانت من اتفه المواد وانا ماكنت افتحها الا قبل الاختبار بيومين , بس لازم تقروها على الاقل 3 مرات قبل الاختبار بتركيز واضمنلكم ال a+ وراح يطلبوا منكم اوراق وعرض بوربويت , ذي الطلبات لازم تسلموها للدكاتره بالموعد المحدد لأنو عليها 30 درجة تقريبا (لا تستهينوا فيها).

مهارات الحاسب : ذي المادة تعتبر من اتفه المواد زي مهارات الإتصال وراح تاخذوا فيها عملي ونظري , الجزء النظري راح تختبروا فيه 3 اختبارات زي كل المواد (دوري اول , دوري ثاني , نهائي ) وكل اختبار اسهل من الثاني بس لازم تقرئوا الكتاب بتركيز وتخططوا النقاط المهمة بنفسكم عشان تفتكروها بالأختبار وأحلا شي بالحاسب ومهارات الاتصال انو اختباراتهم بالعربي , أما الجزء العملي فيعتبر جدا سهل بس لازم تطبقوه فبيتكم قبل الاختبار .

اللغة الانجليزية : ذي الماده تعتبر جدا مملة لأنك راح تجلس بالكلاس 3 ساعات , بس برضوا راح تستفيدوا لو ركزتوا مع المدرس , وحاولوا انكم تطوروا من لغتكم خلال السنه ذي , اما من ناحية الدراسة فلازم تذاكروا الماده ذي اول بأول وما تستهينوا فيها وطريقة الاختبارات هيا كالتالي .. (اختبار استماع واختيارات , اختبار كتابة مقال , اختبار شفوي ) وكلها سهلة بإذن الله .

المكتبات و الكتب ....

بالنسبة للكتب فلا تشتروا الا كتاب الكيمياء الاسود و كتب الانجليزي و كتاب مهارات الاتصال و مهارات الحاسب فقط طبعا تشتروها من خوارزم او الشقري .
وبالنسبة لمصادر الملخصات :

1- اشرف بركات ...ينزل ملخصاتوا بمكتبه اسمها الانوار قريبه من سوق عزيز مول وافضل شي دقوا على اشرف وخلوه يوصفلكم طريق المكتبه
2- يوسف زويل و جمال السعدي : ينزلوا ملخصاتهم بقرطاسية 2000 .

وبالنسبة للمكتبات فعندكم مكتبة خوارزم والشقري (لهم فروع داخل الجامعة وخارجها) وعندكم قرطاسية 2000 ذي الي تبيع ملخصات يوسف زويل وجمال السعدي اعتقد تلقوها بالحارة الي قدام بوابة 6 للجامعه بالعماره الي فيها باسكن روبنز .
وذي صورتها<<<واحد من الشباب ما قصر وصورها لنا



ولا تنسوا : ( اتوكلوا على الله قبل كل شي , وأكثروا من الدعاء , وإذا سمعتوا اشاعه جديدة روحوا أتأكدوا من مصداقيتها بنفسكم , وبإذن الله كل واحد راح يحقق حلمة بنهاية السنة التحضيرية ) .

وبالتوفيق للجميع ..

[محمد الداود]

::
الله يسعدك يآآ د ابراااهيم
ماا شاااء الله يااا د ابرآآآ ما الذي يحححدث أمآآآآمنآآآ
بإذن الله أضمن لـلـي يمشي على كلمآتك بالتمآآآآم
إذا خبصصص يجـيـب موزونة 95% ..
كتب الله لك بكل حرف أجوورآ كالجبآآآآل..
وجعلك مثآلاُ لــ "الطبيب القدوة"
وششكككرآآآ أيهآ الرآئع ..
-إش راايك ياا دكتر راحت الألفية الأولى-

[د.يارا~]

مشكور اخوي والله يسمع منك ان شاء الله والله يسر كل عسير ان شاء الله

[Noor Moon]

مشكوووووووور د/إبراهيم
الله يوفقكـــ ويسعدكــ إن شاء الله
مبروووووكـ عليكم شهر رمضان أعاده الله علينا

[Dr.rori]

ماشالله كلااااام جداً مفيد للجديدين ع التحضيري
أبداً أبداً أبداً لا تستهينوا بدي السنة مهي سهلة ولا صعبة بس يبغالها شدة حيييل
بالنسبة للمواد أصعب شي كيميا و رياضيات ولازم فهم مزبوووط

وفقني الله و إياكم ^_^

[ibrahim_13]

المشاركة الأصلية كتبت بواسطة محمد الداود :: الله يسعدك يآآ د ابراااهيم ماا شاااء الله يااا د ابرآآآ ما الذي يحححدث أمآآآآمنآآآ بإذن الله أضمن لـلـي يمشي على كلمآتك بالتمآآآآم إذا خبصصص يجـيـب موزونة 95% .. كتب الله لك بكل حرف أجوورآ كالجبآآآآل.. وجعلك مثآلاُ لــ "الطبيب القدوة" وششكككرآآآ أيهآ الرآئع .. -إش راايك ياا دكتر راحت الألفية الأولى-

ماشاءالله , مبرووووووك عالألفية الأولى وعقبال مانشوفك مشرف عام




د.يارا~ و Noor Moon و Dr.rori و محمد الداود

اشكركم على مروركم وأسئل الله العلي العظيم لي ولكم السداد و التوفيق بالدنيا والاخرة .

[Sweet Dreamz]

يعطيك العاااافيه دكتوور ابراااهيم :)
ماقصرت جزاك الله خييير
دعوااااتكم ربي يعدي السنه على خخخير :(

[زمردة 2009]

الله يوفقكم المهم طلعتوا من التحضيري بسلااام ماشا الله هذا وعندكم إحصاء وكيمياء ودنيا

حنا رياضيات وإحصاء بس وجبنا جميع الأعياد فيها ..!

تحياتي // الجازي

[m6ňšħĦ αℓ3αιm]

يععطيك الععآفيه مرآ آستفدت :)

[Qotaiba HBK]

موضوع جميل جداً ..

الله يوفقكم يا رب ..