صفاته

[البستان]

السلام عليكم ....

أول شئ .. في مواصفات كل إنسان عاقل يتمناها في شريك حياته ... منها الأخلاق و الدين ..
لكن كل واحد فينا راسم شئ معين في باله .... و هذا الشئ يختلف من كل واحد إلى الثاني ...

ما أبغى نتكلم عن الاتنين اللي فوق ... لأ
و إنما اللي أبغى أعرفه ... أي بنت في الدنيا ... إيش تتمنى يكون في زوجها ... بتكلم عن الصفات ...
إيش اللي يهمكم فينا ...
طريقة كلام ..؟؟
دراسة .؟؟
مال ؟؟؟
إيش بالضبط ...
أتمنى من الجميع المشاركة ... و إبداء الرأي ...

[lee min ho]

وعليكم السلام ورحمة الله وبركاته

الدين والاخلاق هذا شي ماحد يختلف عليه
وخاصة ان يكون محافظ على صلاة الجماعه >> مافي تنازل عن ذي النقطه
بالنسبه للاشياء الثانيه زي الصفات والشكل انا ما يهمني الجمال
وافضل يكون من نفس مستواي الدراسي والفكري عشان ما يكون فيه مشكله في التفاهم
واهم شي يكون متفتح ومتقبل فكرة عمل المرأه >> يعني ما يجيني واحد يقولي المره مالها الا بيتها وعيالها ترى بطلوها
اما المال ما يهمني لو كنت موظفه >> بس لو ما توظفت الله لايقدر افضل ما يقل راتبه عن 7 الاف لاني ماني مستعده اعيش عيالي بالفقر

واهم حااااااااااااجه وحط تحتها مليوووووووووون خط ما يكون راعي بنات وسوابق لاني ما صنت نفسي كل هالسنيين عشان اطيح بواحد راعي بنات

يسلمو عالموضوع

[O-DODY-O]

وعليكم السلام

اول شي طبعا لازم يكون شخص متعلم - جامعي

طبعاً اكيد مليون بالميه مافي شخص يروح يخطب الا وهوا متوظف

وكمان اهم شي ما يكون عزابي عايش لوحدو <لأنو اكيد اكيد خربااااااااااااااان ومستحيل يكون ماشي سيدا

واهم شي ما يدخن

وما يكون شخص بخيل

واهم شي يكون بار بـ امو وابوه - لأنو والله لو انو ما يحترم امو وابوه مستحيييييييل احترمو او اعتبرو زوجي

و ما احب الريجال اللي يقعدو يحاسبو على كل شي (ليش قلتي كذا ؟؟ - ليش عملتي كذا؟؟؟) مره ينرفزو

اهم شي ما يقعد حاط رجل على رجل وسوي وجيبي واعملي اطبخي نظفي (مررررررره مع نفسو)
هوا يبغا يسوي شي يقوم بنفسو... بس مو انو يقعد قومي سوي قومي جيبي

وكمان دمو مايكون ثقيل

وعيونو ما تكون طويله لو طويله حأعميها له

وآخر حاجه واهم حاجه

انو مستعد يخسر اللي قدامو واللي وراه بس عشان حضرتي

ووووووووووووووو بكذا اكتفي

عالعموم الله يكتب اللي فيه الخير

[احلى سمرا]

اما انا بالنسبه لي طبعا الدين والاخلاق وبما اني قبيليه لابد من قبيلي >>اجراءات موروثه.. واتمنى يكون جنوبي مثلي عشان يعيشون عيالي بدون تشتت قبلي >مشكله بالنسبه لها لانها جنوبيه وامها عتيبيه.. اهم شي ويكون نفس مستواي التعليمي ويكون انسان طموح لان نفسي اكمل الماستر وابيه يكون معي ونكمل سوا احب الرجل العاقل الهادئ مع شويه جنون يعني انا الحمدلله الكل يشهد لي بالرزانه لكن احب الوناسه والمرح واحب السفر يعني ممكن اسافر انا وياه ثلاث ايام ننبسط ونرجع احب الرجل البسوم لاني انسانه مشهوره بالابتسامه منذ الصغر والحمدلله واهم شي مايدخن ولايأكل فصفص >>تكره الفصفص اكره الشك لان الحمدلله ماما ربتني احلى تربيه وعمر الشك مادخل بيتنا ولله الحمد مااحب الغيره الزااااااااايده لانها احيانا تسبب كره الجمال لايعني لي شي لان كلنا من خلق ربي وعمر الجمال مانفع لاضاعت الاخلاق يعني الاخلاق فوق كل شي وبالنسبه للمال احب ان تكون حياتي متوسطه وطبعا لازم اتوظف لاني انسانه احب العمل واكرررررررررررره الفراغ يقتلني واحب الرجل المتفهم كل هالامور ويقدر المرأه وطبعا اتمنى رجل يكون لي زوج واخ واب وصديق وحبيب ويعوضني عن كل السنوات اللي احلم فيها بزوج يستاهلني واستاهله>(ياعيني عالرومنسيه) واحب الصدق ومااحب الزعل يعني اذا اي احد زعل من الثاني يجي يواجهه ويقول زعلت منك اليوم بسبب كذا وكذا وكذا واحب التواضع والكرم كل انسان له عيوب ولكن يحاول يكسب الناس بأخلاقه وابتسامته وربي اذا احب عبد حبب خلقه فيه هذا اللي احبه بالرجال وطبعا يكون حنون>>(عايشه جو هالبنت مع نفسها زين اذا لقت ميزه او ميزتين من اللي تتنمناه) عشان تكمل المميزات
الله يعوض اخواني ببنات الحلال والله يعوض اخواتي بعيال الحلال ويارب اشوف الكل مبسوط

[RHF]

بالنسبة ليا مممممم في الدين ما احب التشدد ابدن ، ابغا واحد اخلاقو حلوة واهم شي انو يصلي الصلاة في وقتها ،

ما ابغا واحد يتكلم في الغطا ابدن ، وبالنسبة للتدخين هو حر في نفسو

و اكره الغيرة بانواعها ،

ممممم ابغا واحد ما تهمو الفلوس << اقصد كريم جدااااا

اهم شي عندي شغلو ، ولو يكون بيزنس مان احسن شي ،

يعني ما يهم يكون جامعي ازا هو عندو البيزنس اللي يخلي راتبو احسن من المتخرجين بكالوريوس او ماستر و كدا

وطبعن عيني لها حق عليا ، ابغا واحد حليوة ومعضل ومهتم بنفسو

لاكن ما ابغاه يكون شايف حالو ,, :@

ولازم يكون هادئ عشان نقدر نحقق التوازن في الطبيعة

ودمو خفيف و ضحكتو حلوة يعني لازم كدا واحد يناسو عليه من كل النواحي

يعني اكيد الوحدة تبا واحد حنون و رومنسي < اااخ متعوب عليها

وكمان احوب اللي يدلع طول الوقت و يجيب هدايا و كدا

احلام البنات :(

واكيد انو الوحدة او الواحد محا يلاقي الشي التوب ، فاللهم ارزقنا القناعة

<< الله يعينني ألين الاقي واحد زي كدا

يلا الله يرزقنا و يرزقكم الازواج الصالحين :)

//

هههههههههههههههههههههههه

بعد ما كتبت الرد طلعت اشوف الموضوع اخر مرة ،

وانتبهت على دا السؤال:

إيش اللي يهمكم فينا ...

طلع اللي كاتب الموضوع بوي

//

عمومن انا ما ابغا اسألك انتا كولد ايش يهمك فينا ، انا باسألك امك ايش يهمها في مرت ولدها

لان انتا في النهاية حتتجوز البنت اللي امك حستها مناسبة لك ،

مع انك تكون حاط مواصفات لاكن امك نظرتها للمواصفات دي غير :)

اخر شي ، سؤالي : ايش الهدف من الموضوع ؟

معليش طولت كعادتي ههههههه

[Patricia]

أهلا ..

شهادته ماتقل عن البكالوريوس ، وظيفة محترمة ، وماديته لازم تكون حلوة عشان أعيش في نفس المستوى اللي عايشته عند أهلي مو أقل .

مثقف ، لأنه في بعضهم متخرج من الجامعة مايعرف كوعه من بوعه ..

شخصيته قوووية ، لأني عوبة وشخصيتي قوية ، الضعيف مااحس معاه بمهاراتي كل شي ايه وحاضر ، ابد مايعجبني هالكلام ..

ملتزم بس مو متشدد .. أهم شي مايسمع أغاني عشان مايشغلي بالسيارة بنوراما ..

ذوووويق ، عشان يجيبلي هدايا حلوة وذوق وأخذها بنفس ..

كريم ، البخيل ماأعيش معاه ..

مايكون وحيدد أمه .. وهذا شرط مهم لايمكن التنازل عنه ..

رووووحه حلوة وسوالفه ماتنمل ، مو كل هرجه مصايب فلان مات وفلان مرضان ..

مزيوووون لأني أحب الجمال ..

أخر شي ، مايكون بيتوتي ، لأني أكره الرجال الي مقابلني ٢٤ ساعة ، كمان أنا أبغى أتفرغ لنفسي .. واهتماماتي الثانيية ..
لأنه الرجال إذا جلس بالبيت كل وقته طلبات ماتلاقي وقت لنفسك ..

وشكراا ..

[البستان]

المشاركة الأصلية كتبت بواسطة rhf // وانتبهت على دا السؤال: طلع اللي كاتب الموضوع بوي // عمومن انا ما ابغا اسألك انتا كولد ايش يهمك فينا ، انا باسألك امك ايش يهمها في مرت ولدها لان انتا في النهاية حتتجوز البنت اللي امك حستها مناسبة لك ، مع انك تكون حاط مواصفات لاكن امك نظرتها للمواصفات دي غير :) اخر شي ، سؤالي : ايش الهدف من الموضوع ؟ معليش طولت كعادتي ههههههه

أنا ما عمره جاء ببالي اسأل أمي هذا السؤال ... لإنه ما خطر فيني و أحس إنه جواب أمي الطبيعي ...إنو البنت تكون " بنت ناس " و أقصد ببنت ناس يعني متربية ... و محترمة ...هذا واحد ... و الشئ الثاني اللي يهمها إني أكون مرتاح معاها ...
لكن عن نفسي ... ما تهمني المواصفات .... أكيد راسم بنت في بالي ... لكن ممكن يصير عكس اللي راسمه ...
يعني لو بنت أخلاق و دين , و دق قلبي لها " هذا عندي من أهم الشروط "
... و شكلها حلو " لكن مو شرط خارقة الجمال "
,,,,
لكن ماتشوفوا إنكم شوية مصعبينها ..؟؟!!!
يعني أختي اللي طلبت زوجها مايكون عزابي ... لإن العزابي في نظرها داشر ...
أنا مو أستاذ عشان أصحح لها ... لكن لي 2 من أصحابي عايشين عزاب و يعلم الله إنو إخلاقهم و تدينهم أحسن من كتير ... و كتير عزّاب زي كذا ...

أما , حضرتك يا أختي ...فطالبة مواصفات " سوبر مان " ... ماشاء اللله يبغالك واحد تفصيل ...
ما أبغى أيأسك بس لازم تتنازلي شوية و خلي دعوتك زوج صالح يناسبك و تعيشي معاه بسعادة ...
لا تنسي المثل اللي يقول ... إذا أردت زوجة كخديجة فكن زوجا كمحمد صلى الله عليه و سلم ..


أما أختي اللي طالبة إنو يكون ما يدخن و لاياكل فصفص , الدخان من حقك ... لكن الفصفص!!
لو إنت ما تحبي الفصفص ... ممكن هو ما يحب الشوكولاتة و يشترط إنو زوجته تكون ما تاكلها ...
صح ؟؟

[RHF]

شوف يا بستان ،

ما كل ما يتمناه المرء يدركه ،

ولاكن الواحد يبحث ويبحث و يبحث ، وما نعرف كيف النصيب ،

يعني مسلن اوكي انا ابغا واحد حنين و رومنسي ( مسلن )

وانا اللي حتجوزو ايش يدريني ازا كان كدا أو لا ؟

وممكن انا اخليه يكون كدا صح ولا مو صح ؟؟

لاكن برضو دي كل وحدة وفارس ( احلامها ) مو ( واقعها )

في اشياء نقدر نتحكم بيها قبل ما نتجوز

يعني اللي حاطة شرط يكون جامعي ،

من وقت تتجوز هي تكون عارفة انو دا الشخص جامعي ،

اما اللي تكون طالبة واحد دمو خفيف ، امكن تكون سمعتو دمو خفيف ، وبالنسبة لها لمن تتجوزو حتعتبر دمو تقيل ؟

[بــنــت الــوطــــن]

وعليكم السلام

موضوع رائع

اهم شي عندي الاخلاق والدين ويكون بار بأهله ومعروف بشخصيته عند الاهل

واممم مايدخن ولا يسهر برا كثير ويكون متعلم ومثقف وبس يعطيكـ العافيه ..

[البستان]

المشاركة الأصلية كتبت بواسطة rhf شوف يا بستان ، ما كل ما يتمناه المرء يدركه ، ولاكن الواحد يبحث ويبحث و يبحث ، وما نعرف كيف النصيب ، يعني مسلن اوكي انا ابغا واحد حنين و رومنسي ( مسلن ) وانا اللي حتجوزو ايش يدريني ازا كان كدا أو لا ؟ وممكن انا اخليه يكون كدا صح ولا مو صح ؟؟ لاكن برضو دي كل وحدة وفارس ( احلامها ) مو ( واقعها ) في اشياء نقدر نتحكم بيها قبل ما نتجوز يعني اللي حاطة شرط يكون جامعي ، من وقت تتجوز هي تكون عارفة انو دا الشخص جامعي ، اما اللي تكون طالبة واحد دمو خفيف ، امكن تكون سمعتو دمو خفيف ، وبالنسبة لها لمن تتجوزو حتعتبر دمو تقيل ؟

الله يسعدك يا رب و ييسرلك كل اللي تتمنيه ...