معلومات عن / مواعيد استلام الوثائق .. ومشاكل الأودس ( التسديد + الحذف والإضافة )

[أبو فاتن]

السلام عليكم ورحمة الله


اليوم جايب لكم أخبار من الجامعة وكني عبدالله السدحان يوم صار مراسل قناة طش إم طش .. بس بدون شيبات لأني مابعد تزوجت


المعلومات اللي جايبها الله يطول بأعماركم هي عن مواعيد إستلام وثائق طلاب الإنتساب + المشاكل اللي تواجه الطلاب في التسديد والحذف والإضافة وزوال الجداول بعد اعتمادها ومسببات عدم تنفيذها فـحبيت أنقل هالمعلومات للطلاب اللي خارج جدة والا اللي بجدة ماعليهم خلاف

أولاً :

موعد إستلام الوثائق وهالكلام للأخ القدير والقدير جداً السيد / أبو طالب

يقول أبو طالب وقوله نعم القول : إن موعد إستلام الوثائق لطلاب الإنتساب هي من اسبوع إلى ثلاثة أسابيع من ثبات المعدل وإعتماده
قلت له يعني بعد كم الله يرفع قدرك لأن فيه طلاب خارج جدة ويبون يعرفون موعد أكيد عشان مايجون ويروحون بدون فائدة
قال : الأضمن خلهم يجون بعد 20 / 8 / 1433 .. ( ملاحظة : هذا الكلام اللي حصل ونقلته لكم بالحرف فـ إذا صار شي وأختلف الموعد باكر لايجيني أحد وينشب بحلقي .. واللي مو عاجبه كلام أبو فاتن مو ملزوم ياخذ فيه )

ثانياً :

مشاكل التسديد وإضافة وحذف المواد وإختفاء الجداول بعد إعتمادها من قبل الطلاب عن طريق الأودس كان سببه خلل في النظام العام
فـ بعض الطلاب ماكان يقبل معاهم الإضافه وهم مسددين أو ينزلون جداولهم بالليل ويصبح عليها الصبح بح ماعاد يلقاها .. هذولا عليهم إقافات مالية
الإقافات المالية إذا كانت على الطالب راح يرسلونه على الأستاذ / محمد أمين في عمادة خدمة المجتمع لتفعيل السداد .. وغالباً ماراح تلاقونه فيتم تحويلكم إلى السيد / عبدالله المالكي في المكتب اللي جنبه
فـ إن تم له التفعيل خير وبركة واللي مايتم يراجع بنفسه يوم السبت القادم أو يوم الأحد يعني بداية من 3 / 8 / 1433




هذا وسلامتكم ياطويليين الأعمار

[الزائر الحزين]

جزاك الله كل خير اخوي ابو فاتن على المجهود وعلى المساعدة التي وعدت بها فاوفيت

حقيقة انت من الذي سخرهم الله لخدمة عباده نحسبك كذلك والله حسيبك

اسال الله ان يرفع قدرك ويجل شانك ويعظم اجرك

[فهد العنزان]

يعطيك العافية يا صوت الحق على الاخبار الطيبة

فريق سداد بالجامعة على البريد الإلكتروني

sadad.support@kau.edu.sa

ودمت بود

[aboodi70]

الف شكر يابو فاتن..

يافهد وش سالفة هذا الايميل اللي منزله..!!؟؟

[شموخ رجل]

مشكور ابو فاتن وربي يجزاك خير

[abu-talal]

بيض الله وجهك يبو فاتن وماثني على كلامك

اتصلت على موظف قريب من وكيل كلية الإقتصاد والإدارة

والرجل منضغط ويالله يرد على المهم الي فهمته بالمختصر ان الحذف والإضافه بالنسبة للإنتساب يكون بعد الإنتظام لان وقتهم محدود بالحذف والإضافة ونفس النظام ملخبط

الأسبوع القادم ان شاء الله تنحل الامور والله أعلم

[زمانك حسيبك]

ياااخوان ماسمعتم طيب عن الترم الصيفي لهذا العام مجاني
<<<<<< اشااااااااعة ولا لا ...؟؟؟؟

[أبو فاتن]

المشاركة الأصلية كتبت بواسطة الزائر الحزين جزاك الله كل خير اخوي ابو فاتن على المجهود وعلى المساعدة التي وعدت بها فاوفيت حقيقة انت من الذي سخرهم الله لخدمة عباده نحسبك كذلك والله حسيبك اسال الله ان يرفع قدرك ويجل شانك ويعظم اجرك

يعلم الله الذي يعلم خائنة الأعين وماتخفي الصدور أن ما أقدمه لأخواني محبة مني لهم وفي العلم أيضاً خالصة لوجه الله سبحانه وتعالي ولا أرتجي من وراءها طمعاً أو مدحاً أو شكراً أو أوسمة كما يتهمني البعض الذين لا أقيم لإتهامهم وزناً أصلاً


شاكر ومقدر لك اخوي هالمشاعر اللي كانت سبب في إمتعاض الكثيرين من أبو فاتن


ولا يسعني إلا أن أقول لكم .. تامرون أمر يابعد راسي وأنا في خدمتكم وكلي شرف وسعادة بهالخدمة


وأعذروني على القصور

[WaLeEd Al RiYaDh]

وعليكم السلام ورحمة الله وبركاته

بيض الله وجهك يابو فاتن وماقصرت
بس وش المقصود بالايقافات المالية؟؟
هل فيه مخالفات ساهر بالجامعة والتجديد يكون بسداد هالمخالفات السرية

الحين قلنا انهم سامحونا على الـ3000 ريال هالصيف صار فيه ايقافات بعد

^_^

[مشعل الزيادي]

ابيض وجه يابو فاتن

والف شكر على وقفتك معاي اليوم بالجامعه

اتعبتك معي ثلاث ايام وانت رايح جاي للجامعه عشاني

الله يوفقك وين ماكنت ويجمل حالك ..

ملاحظه / لا تنسى تعزمني على زواجك