يا جماعة فتح التقديم في جامعة الملك سعود .. للي يبغى يقدم هنا وهنا

[اقتصادي لغوي]

نفس اللي فوق

مع إني أرغب في جدة وبقوة :)

إلا أني قلت أقول لكم إنو فتح وبدأ التقديم في جامعة الملك سعود من تاريخ 14 / 1 ويستمر إلى تاريخ 18 / 2

والظاهر من اعلانهم على صفحة عمادة الدراسات العليا انو طلاب الماجستير ما يحتاجو توفل للتقديم ( بس والله شاكك في النقطة هادي .. بس هادا المكتوب في الاعلان )

والقدرات يحتاجو ع الأقل 70

وهادا رابط الاعلان على موقع الجامعة :

http://ksu.edu.sa/sites/KSUArabic/De...3-10-2013.aspx

تحياتي للجميع وربنا يحققلكم اللي تتمنوه

[عطر المسافر]

الله يعطيك العافية ودوم سباق بالخير وبالنسبة للغة الإنجليزية نفس جامعة الملك عبدالعزيز بالنسبة لﻹقتصاد أما أنك تجيب الدرجة المطلوبة في التوفل أو دورة بديلة

[اقتصادي لغوي]

حق وواجب يا أستاذ عطر المسافر :)

وشكرا لتفاعلك مع الموضوع

[اتعبني*غلاهم]

السلام عليكم
اخواني ممكن اعرف المطلوب مني انا الترم ذا تخرج باذن الله ونفسي اكمل الماجستير وش الخطوات الي اسويها بعد مااستلم الوثيقة؟؟
مع العلم معدلي نازل بسبب ظروف وبرضو انا انتساب يشملني ولا؟؟؟
الله يفتحها بوجه الي يدلني ع الخير والله يجعلها في موازين حسناتكم

[tahani_dreem]

طيب الحين فتح التقديم على جامعة الملك عبد الله والملك سعود
اقدر اقدم فيها الاثنين واذا فتح التقديم على جامعة الملك عبد العزيز كمان اقدم
ولا لازم اقدم على جامعة وحده فقط

[اقتصادي لغوي]

والله يا أستاذة أتعبني غلاهم للأسف ما عندي علم أفيدك بيه عن اللي سألتي عنو

والزملاء والزميلات ما راح يقصرو معاكي ان شاء الله

أستاذة تهاني دريم اللي أعرفو ( بس ماني متأكد 100 ٪ ) انو الواحد ممكن يقدم على أكثر من جامعة واذا جاه القبول في جامعة أو أكثر لازم يختار وحدة منهم عشان يرسلهم ( أو يعطيهم ) الشهادات والأوراق الأصلية

وان شاء الله الزملاء والزميلات يفيدوكي أكتر مني

وطبعا ما أنسى أشكرك جزيل الشكر انك نبهتينا انو القبول في جامعة كاوست فتح

وربنا يحققلكم اللي تتمنوه

[اقتصادي لغوي]

المشكلة يا أستاذ عطر المسافر لما جيت أشوف ماجستير الاقتصاد في جامعة الملك سعود لقيت الآتي :

- في ورقة شروط التقديم للبرنامج ذكرو 70 قدرات ومقابلة شخصية واختبار تحريري ( وما ذكرو أي شيء عن التوفل )

- وفي الورقة التعريفية عن البرنامج ذكرو المقابلة والاختبار واجتياز دورة اللغة المكثفة أو الحصول على 53 توفل ibt ( ما يعادل 475 ورقي )

- وفي إعلانهم على موقع العمادة ذكرو 70 قدرات ( وما جابو ذكر للتوفل ) وكتبو ملاحظة : " على المتقدمين التواصل مع الأقسام لمعرفة مواعيد الاختبارات التحريرية والمقابلات الشخصية أو أي شروط أخرى "

- ولما اتصلت على وحدة القبول في عمادة الدراسات العليا واحد قال الا فيه توفل ورد عليه اللي جنبه قال لأ التوفل للدكتوراة بس فرجع الأول قال التوفل للدكتوراة بس

- ولما تصلت بقسم الاقتصاد في كلية ادارة الأعمال أعطوني رقم هاتف مكتب دكتور فريد الخطيب ( 4674171 ) وقال اتواصل معاه لأنو هوا المسؤول عن ماجستير الاقتصاد واحنا ما نعرف حاجة عن موضوع التوفل

بصراحة مدري إلى متى اللخطبة هادي :)

[عطر المسافر]

ممكن القدرات شرط عام لجميع التخصصات أما التوفل فهو يفرق من تخصص لنخصص وعشان كذا تلاقي في برنامج التخصص
بس حبيت أسألك بما انك دارس بكالوريوس اقتصاد ايش افضل من ناحية الخطة الدراسية للماجستير جامعة الملك سعود أو جامعة الملك عبدالعزيز
وودي أعرف كم أقل نسبة توقف عندها القبول العام الماضي في جامعة الملك عبدالعزيز عشان الواحد يشوف إذا يعيد القدرات أو لا

[اقتصادي لغوي]

مرحبا بيك مجددا استاذ عطر المسافر

* قلت :

بس حبيت أسألك بما انك دارس بكالوريوس اقتصاد ايش افضل من ناحية الخطة الدراسية للماجستير جامعة الملك سعود أو جامعة الملك عبدالعزيز

والله بصراحة من وجهة نظري الشخصية معرف اي خطة هيا الأفضل بينهم .. وممكن ما أكون فهمت سؤالك بدقة عشان كذا ما قدرت أفكر في اللي ممكن يكون جواب مناسب

عموما حتى أنا بتساءل بيني وبين نفسي عن هادا الشيء .. اللي هوا مين اللي عندو خطة أفضل من التاني

طبعا نلاحظ انو اللي في الرياض سنتين واللي في جدة ممكن يكون سنتين وممكن يكون أكثر على حسب خطة الطالب نفسو ( وطبعا على حسب المواد اللي بتنزل كل ترم )

ونلاحظ انو اللي في الرياض فيه اختبار شامل قبل الحصول على الدرجة العلمية بينما في جدة مافي اختبار شامل

وأنا شخصيا أشوف انو اللي في الرياض خطتو تعطينا مجال أوسع نوعا ما في مواد الاختياري .. بينما في جدة المجال أضيق والاختياري صاير كأنو اجباري هههههه

طبعا فيه كلام لقيتو في موقع : تجمع طلبة جامعة الملك سعود انو اللي ما يجيب التوفل وقت تسليم الأوراق الأصلية راح يضطر يآخذ ترم كامل دورة لغة انجليزية مكثفة .. وطبعا مدري عنهم هل يقبلو اختبار ستيب أو آيلتس أو ما يقبلو :)

ولقيت معلومة عندهم ( بس ماني متأكد منها 100 ٪ ) انو حتى خريج قسم الاقتصاد ممكن تنزلو مواد تكميلية ازا كان خريج قديم أو خطة جامعتو اللي اتخرج عنها تختلف عن خطة البكالريوس في جامعة الملك سعود

وهادي النقطتين الأخيرة معناها انو الماجستير عندهم ممكن يكون 3 سنوات مو سنتين .. وهادا الشيء ما يناسبني شخصيا أبدا لأني بحاول أخلص بسنتين .. وراح أرفق في هادي الرسالة خطة ماجستير الاقتصاد في جامعة الملك سعود

وأخيرا لا شك انو خريج الاقتصاد من جامعة الملك عبد العزيز نسبة قبولو أعلى في هادي الجامعة من نسبة قبولو في جامعة تانية ( طبعا مع غض النظر عن شروط القبول الأخرى ) .. وكمان ما ننسى انو كل جامعة ليها منهج معين ومواد وأسلوب تدريس ونوعية مخرجات تهدف ليها وهذا الشيء موجود في جامعات أمريكا وكندا الخ بالتالي أرجع أقول انو اللي بكالريوسو من جامعة معينة قبولو في ماجستير تخصصو في نفس جامعتو راح يكون أكبر من قبولو في جامعة تانية .. وهذا رأيي الشخصي وقد ما يكون دقيق جدا

وكمان ما ننسى انو خطة بكالريوس الاقتصاد في جامعة الملك عبد العزيز طرأت عليه بعض التغييرات عن السنوات الماضية وهذا حاصل معايا شخصيا .. فجامعة الملك سعود مثلا راح تنظر لخطتي ومدى قربها أو بعدها عن خطتهم اللي في البكالريوس .. لأنو في الأول والأخير خطة الماجستير في أي جامعة تعتمد على خطة البكالريوس في نفس الجامعة .. عشان كذا ممكن حتى خريج الاقتصاد من جامعة تانية ينزلولو مواد تكميلي

وأنا أساسا بفكر ازا انقبلت في جدة أنزل للجامعة وأقابل رئيس القسم د. عصام وسكرتير القسم والدراسات العليا وأتأكد منهم 100 ٪ انو فيه امكانية انزل 4 مواد كل ترم ( ما عدا الأخير ) عشان انتهي من الماجستير في سنتين .. وطبعا كلامي اللي راح عن جامعة جدة كلو بالنسبة لخطة المقررات ومشروع البحث أما خطة المقررات والرسالة مدتها أطول بلا شك

وكمان هاليومين راح أتواصل مع د. فريد الخطيب المسؤول عن ماجستير الاقتصاد بجامعة الملك سعود واستفسر منو عن التوفل والدورة والتكميلي والاختبار التحريري وأشوف كيف

* وحسب علمي انو فيه تقديم على جامعة القصيم يبدأ في 2 / 2 وينتهي في 20 / 3

وللاقتصاد طالبين توفل 450 ( أو آيلتس 4 أو ستيب 67 ) وقبول لطلاب اقتصاد أو لغير اقتصاد بمعدل لا يقل عن جيد جدا .. واللي من غير القسم مع مواد تكميلي .. ومافي وجود ذكر لاختبار تحريري ولا مقابلة شخصية .. وراح احط ملف مرفق بهذا الخصوص في هاذي الرسالة

ورابط صفحة البرنامج على موقع جامعة القصيم هوا :
http://www.gsd.qu.edu.sa/Master%20pr...%A7%D8%AF.aspx

وفيه ماجستير اقتصاد كمان في جامعة الامام بالرياض بس ماني عارف فتح التقديم عندهم ولا لسه !

وفيه ماجستير الاقتصاد والارشاد الزراعي بجامعة الملك فيصل .. كمان مدري عن التقديم حقو متى يفتح .

** وقلت :

وودي أعرف كم أقل نسبة توقف عندها القبول العام الماضي في جامعة الملك عبدالعزيز عشان الواحد يشوف إذا يعيد القدرات أو لا

بصراحة معرف المعلومة هادي ويا ليت أحد يفيدنا من الزملاء والزميلات

بس حسب اللي وصلني ( واللي فهمتو ) انو الطلاب اللي انقبلو قبل سنتين في جامعة الملك عبد العزيز ( ماجستير اقتصاد ) كان عددهم 20 طالب وأقل قدرات انقبلت كانت 71 .. بينما البنات في نفس السنة كان أقل قدرات بالنسبة ليهم 82

فالظاهر هم ياخذو 20 طالب و 20 طالبة كل سنة .. فالظاهر الاعتماد الأساسي على العدد مو على درجة القدرات

لأنو لو كان الاعتماد على درجة القدرات كان المفترض تكون درجة القدرات وحدة للطلاب والطالبات زي ما بتسوي جامعة الملك سعود

بس الظاهر في جامعة الملك عبد العزيز ياخذو الطلاب اللي جايبين أعلى نسب موزونة الى ان يقفل العدد 20 مثلا وانتهينا

مدري لو كانو الطلاب/الطالبات المقدمين في سنة من السنوات نسبهم الموزونة بشكل عام منخفضة نوعا ما .. فهل راح يقبلو طلاب جايبين قدرات 60 أو 50 مثلا .. قصدي هل فيه حد أدنى للقدرات ولا لأ :)

برضو ان شاء الله راح اتواصل مع قسم الدراسات العليا بكلية الاقتصاد والادارة ( 6952000 تحويلة 65686 ) لأنو سكرتير القسم الأستاذ عبد الرحمن حولني عليهم بخصوص سؤالي عن درجة القدرات المقبولة وقالي مدري اتواصل مع الدراسات العليا بالكلية وأعطاني رقمهم

تحياتي ليك وربنا يحققلنا اللي نتمناه

[tahani_dreem]

طيب انا ان شاء الله راح اتخرج دا الترم
يمديني اقدم بإفادة من جامعتي اني راح اتخرج ذا الترم ولا ما يمديني
لانهم طالبين ارفاق الوثيقة والسجل الاكاديمي