الاحصاء والمذاكره

[asmaagh]

السلام عليكم ورحمه الله وبركاته ..

مشكلتي اني موعارفه اذاكر للاحصاء الكتاب كله انجليزي ويضيع وقتي في الترجمه
واحيانا يكون بين السطور افكار مهمه يعني لازم اقراه كله وافهمه

والكل يقول الكتاب مرجعك الوحيد وانا كنت متامله الاقي ملخصات

فافيدوني جزاكم الله خير بطريقه مذاكرتكم وايش سويتو في الاحصاء بالنسبه للي تخصصو خلاص

وشكككككرا

[Somaiah Yousef]

وعليكم السلام ورحمة الله وبركاته

انا في حياتي التحضيرية كلهآ ماترجمت شي غير الآحياءء :p

الاحصاء بس ذاكري الامثلة .. والمربعات البنية والخضراءء " حسب المؤشر " .. هذي طريقتي والحمدلله جبت الفل مآرك

حتى كنت أستغرب من البنات اللي يترجموا كل كلمة وكل حرف

الاختبار سهل وواضح واغلبه مسائل .. مافي اسئلة ع الكلام بين السطور ومو لازم تفهميه كله .. اقريه ع السريع

لا تضيعي وقتك في الترجمةة !

مثلا الاخطاء الاحصائية .. روحي لدكتورة تشرحلك هوا مزبوطط .. او احفظي مثال لكل خطأ عشان تفرقي بينهم

هذا الكلام الوحيد اللي مهم عليكي تفهميه

[talal-m]

فيه ملخص السعدي كويس بالنسبة للملخصات
وبالنسبة للمرجع اتوقع الكتاب مو المرجع الوحيد ، امس في موقع الجامعة حصلت حاجة حلووة ومرتبة وهيه سلايدات للمنهج لك مادة وقليلة مرررة تعتبر.
الطريقة من موقع الجامعة >> كلية العلوم >> مواقع التدريب التفاعلي >> اختاري المادة >> بعدين محاضرات المادة "هيه المنهج" او التدريب التفاعلي " عاد هذا اذا ختمت "
واذا غلطان بحاجة او المحاضرات فيها مشكلة خبروني لاني بعتمدها ‹☺›

[أُنـثــﮯ مـــلآئـكيـة]

احصاء لا تروحي ملخصات اغلبها اخطاء حتى السعدي كان فيه اخطاء
الكتاب و شرح الاستاذة + الوورك شيت لكل شابتر بتنزلها منسقة الاحصاء في موقعها قبل كل اختبار بيومين او اقل او اكثر
و الاهم الاهم هو السكشن كل الاسئلة المطلوبة في السيلبوس حليها واحضري السكشن لا تخلي شيء يفوت مافهمتيه
وبس كذا ان شاء الله كفاية
ممكن لو احتجتي شرح زيادة افتحي يوتيوب واكتبي اسم الدرس الانجلش تلاقي شروحات كثير

[sahar.]

مرجعك الوحيد هوا كتابك، صح شكلو دسم وما يأهل بس مضمونو جدا سهل وأغلبو بيعتمد على دروس الرياضيات في ثالث ثانوي، يعني اذا كنتي ماشيه فيها تمام بيكون المنهج بالنسبة لك مراجعه فقط باستثناء أول تشابتر، أول تشابتر كمية النظري فيلو مليانة شويا ف هوا اكتر شيء يبالو تركيز وبياخذ منك وقت بس اللي بعدو ان شاء الله بيكون سهل عليك مسائل وحلها والقوانين مكتوبة في ورقة ماتحفظيها، الامثلة اللي مكتوبة في السليبوس والبوكسات هيا اهم الاشياء اللي تمري عليها وقت مذاكرتك واذا في شيء مهم بين الاسطر غالبا الاستاذة بتنبهكم عليه، حاولي ما تراكمي كمية الدروس وتذاكريها أول بأول، قبل الاختبار بأسبوع تقريبا بتنزل على موقع الاستاذة الوورك شيت حليها عشان تتمرني عليها في كم سؤال منهم بتكون فيه افكار جديدة مهمة، الاختبار غالبا من الوورك شيت، بالنسبة ليا ما قد حضرت أبدا سكشن ولا أعرف نسبة اهميتو لانو بيكون زحمة وازعاج البنات ما يخليك تركزي ودرجتي الحمدلله كانت فل مارك ما أثر عدم حضوري، وخلي ببالك انو الاحصاء المادة الوحيدة اللي ما فيها بونس من مواد التحضيري بس المادة ككل ممتعة وسهلة كنت باخذها مع استاذة ريما العمودي ومحظوظ اللي يكون عندها طريقة شرحها تسهل عليك وصول الفكرة أتمنى أفدتك وبالتوفيق للجميع..

[Ranad Ayman]

^
لا بالعكس غلط .. مادة الاحصاء مافيها بونس لكن فيها كيرف اب وهذا اعلى من البونس بكتير
اذا درجتك ما نزلت عن الـ90 بونسك حيكون 8 درجات و اذا ما نزلت عن الـ80 بونسك 7 درجات وهكذا .. عشان كدا السنة الي فاتت كتير بنات جابو ماشاءالله 100 .

وهذا الكلام من الدكتورة نفسها اخذته كنت اروحلها لحد المكتب .. واتكلم معاها عن الدرجات كيف طريقتها وكدا ..

بالنسبة للدراسة :
الملخصات ابدا ما أنصــــــــــــح بيها ولا تحلي في الموقع التفاعلي لانه فيه اغلاط اصلا الدكتورة بنفسها كانت تقولنا لا تخشوه حلوا تمارين الكتاب . "دا اول شي"

ثانياً : بس اول شابتر نظري تقريبا مافيه غير التعاريف اصلاً ويجيبلك قصص انه هذه الحالة ايش تتسمى .. اتدربي على امثلة الكتاب مرة حلوة وواضحة واعملي مفاتيح كلام يسير ممكن ما يحتاج تقري القصة كاملة من خلال كلمة تعرفي ايش تتسمى هذه الحالة "بس مو معناته تسحبي عالقصة بس انا ابغا اوضح يعني .. "

ثالثاً : الشابترز الي بعد الاول بس احفظي التعاريف و طرق حل المسائل الي محددتها الدكتورة في الامثلة افهميها + مسائل الكتاب الملزومة عليكي "مو كلها بس الملزوم عليكي يعني زي الي في جدول الدراسة الي محطوط في صفحات دكتورات الاحصاء" طبعاً السكشنز مهمة .

وعلى دا الاسلوب فل مارك بإذن الله .
ملحوظة: التعاريف الي تكون محددة بأسود غامق كمان ذاكريها مو بس الي في المربعات الخضرا و البنية .

ومافي داعي للترجمة .. التعاريف حتجيكي مصطلحات .. يعني مفاتيح كلامية لها كفاية عشان تفرقي مو تصميه وتحفظيه كامل .
حتى امثلة القصص الخاصة بأول شابتر مو لازم تفصفصي كل كلمة وتعرفي معناها .. اهم شي بعد ما تقري تكوني عارفة زبدة الكلام وايش هو عموماً.
بس ..

موفقين حبايبي

[asmaagh]

شكرا لكل اللي ردو
كنت شايله هم في البدايه بس كلامكم يريح وعرفت انه طريقتي غلط
حمشي عاللي قلتوه وشكرا مره ثانيه
الله يجزاكم خير

[رفّات حُلم]

مافي أسهل من مذاكرة الاحصاء :$
شوفي حبيبتي تجي أسئلة نظرية صح!
بس مو كتير زي المسائل والحل.
حتى شابتر 1 الأكثر منه يجيكِ مثال تطبيق على الكلام.
البوكسات مهمة تحفظيها وكمان التعاريف اللي بالاسود.. هيا المهمة.
فيه بعض البوكسات شرح للقاعدة برضو اقرايها بتركيز وطبقيها على القاانون وحتحفظيها.
وترا تقدري تحددي كلمات مهمة بس وخلاص تدلك على التعريف
والبقية بس زاكري الامثلة والاسئلة..