حساب النسبة العامة والخاصة والمعدل + نصايح لكم

[فاتحة]

السلام عليكم ورحمة الله ..

تفضلو حبايبي كيف تحسبو نسبتكم الخاصة والعامة .. لو تنشروه أحسن لكثرة الاستفسارات حولو

أول شيء النسبة الخاصة

الحاسبات .. يطلبو موزونة الرياضيات و انقلش مستوى 4 فقط .. أقل نسبة فيهم 77 ونص وإذا جبت أقل منها ما راح تنقبل
على الدفعات اللي قبل كان يطلبو مهارات الحاسب بدال الرياضيات .. بس دفعتنا 15 غيروا النظام خلوه الرياضيات ..
كثير منهم حققو النسبة العامة .. بس النسبة الخاصة ما حققوها بسبب الرياضيات كانو ناجحين على الحافة و خربت النسبة الخاصة فانتبهوا
الهندسة .. يطلبو موزونة الرياضيات والفيزياء وانقلش مستوى 4 فقط .. أقل نسبة فيهم 80 وإذا جبت أقل منها ما راح تنقبل
الصيدلة والتمريض والعلوم الطبية التطبيقية .. يطلبو موزونة الفيزياء والأحياء والكيمياء وانقلش مستوى 2-3-4 .. أقل نسبة فيهم 80 وإذا جبت أقل منها ما راح تنقبل
الطب وطب الأسنان ومساعد طبيب أسنان وصحة فم وأسنان .. يطلبو موزونة الفيزياء والأحياء والكيمياء وانقلش مستوى 2-3-4 .. أقل نسبة فيهم 85 وإذا جبت أقل منها ما راح تنقبل

باقي الكيات اللي ما انذكرت مش مطلوبة النسب الخاصة فيها ..
مهارات الاتصال - مهارات الحاسب - الإحصاء .. ماهي مطلوبة في النسب الخاصة الي سبق وذكرتها فوق .. بس مهمة جدًا في رفع النسبة العامة لانها أسهههههلللل المواد اضمنو الفل مارك فيها
والنسبة العامة هي أساس قبولك في الكلية .. و النسبة الخاصة زي ما نسميها تأشيرة دخول فقط .. إذا ما حققتها ماراح تدخل أصلاً
وكمان النسبة الخاصة هي تصفية الطلاب .. بمعنى عمرك شفت واحد يبغى الهندسة مثلاً وجايب في الرياضيات والفيزياء مقبول ؟
حتى لو نسبته العامة تخليه يدخل الهندسة ..بس ما راح يدخل لشرط النسبة الخاصة ..
النسبة العامة للطب البشري هذي السنة 97.667 بنات .. والسنة اللي فاتت كانت 98.43 بنات .. طيب على أي أساس ؟
يعتمد على عدد المتقدمين لهذي الرغبة وشطارتهم .. آخر مقعد شاغر يكون لمين وايش نسبتها و توقف النسبة العامة عندها
تنزل أو ترتفع علمها عند الله .. كل اللي عليك تجتهد وتجيب أعلى الدرجات ..
وحاجة ثانية للي عادلو الانقلش ويبو تخصصات صحية والكليات طالبين مستويات الانقلش 2-3-4
عادي كأن الانقلش مو موجود عندك .. يحسبولك النسبة الخاصة فقط للفيزياء والكيمياء والأحياء
واللي بدأو من مستوى 4 .. عادي كأنهم ما درسو مستوى 3 ولا 2 .. يحسبولك النسبة الخاصة فقط للفيزياء والكيمياء والأحياء انقلش مستوى4
شيء ما يستاهل تقلقوا عليه وتعملو دوشة

نجي لأهم حاجة في الموضوع :
في البداية لازم تعرفو انو حساب نسبتكم هنا مو زي حساب النسبة في المدرسة .. وحتى لاحظت انو دكتور قاعد يقول كذا وكمان ناس تجاوب كذا يالطيف !!
فيه فرق بسيط اللي هوا .. الأحياء والكيمياء والفيزياء والرياضيات والإحصاء والحاسب ومهارات الاتصال وزنهم في النسبة والمعدل كمان .. ب ثلاثة ساعات
الانقلش بمستوياته 2-2-4 .. وزنهم في المعدل والنسبة كمان .. ب ساعتين فقط
طبعاً هذا فرق كيف احسب نسبتي زي حسابي لنسبة المدرسة وأنا عندي مادتين وحدة ثلاث ساعات والثانية ساعيتن !!
اللي بثلاثة ساعات تأثيرها أعلى شوي من مادة لها ساعتين في المعدل والنسبة
يعني افتكر بنت جابت B+ في مستويين في الانقلش والباقي A+ ومعدلها صار 4.875 من 5
وكمان بنت جابت B+ في الرياضيات والفيزياء والباقي A+ و معدلها صار 4.813 من 5
مع أنهم نفس المواد ! اختلاف بسيط بس حيفرق في الأترام الجايه مابعد التحضيري لانو فيه مواد لها 4 ساعات
هذا في المعدل اختلف .. وحتى في النسبة يختلف لكن ما سألتهم
1- طيب كيف تحسبوا في النسبة الخاصة ؟؟؟( والطريقة نفسها لحساب النسبة العامة بس تأخذوا درجات كل المواد )

مثال : طالبة تبا كلية التمريض ودرجاتها في المواد اللي طلبوها كالتالي
انقلش مستوى 3 : 87 بساعتين
الكيمياء : 100 بثلاث ساعات
الأحياء : 99 بثلاث ساعات
الفيزياء : 95 بثلاث ساعات
انقلش مستوى 2 عادلته من اختبار تحديد المستوى .. وانقلش مستوى 4 جابت شهادة ايتلس قبل الاختبار النهائي للمستوى وعادلوا لها

مجموع الساعات للمواد المطلوبة 2+3+3+3 = 11
الحساب يكون
(87*2) + ( 100*3) + ( 99*3) + ( 95*3) / 11 = 96
نسبتها الخاصة 96


2- طيب نجي لباقي موادها عشان نحسب النسبة العامة
جابت 100 في الاتصال والحاسب والاحصاء .. لكل مادة منهم ثلاث ساعات.
وفي الرياضيات 66 . برضو ثلاث ساعات .
مجموع الساعات اللي درستها في التحضيري = 23 ساعة
الحساب يكون
(87*2) + ( 100*3) + ( 99*3) + ( 95*3) + ( 100*3) +(100*3) +(100*3) + (66*3) / 23 = 93.652

نسبتها العامة 93.652 وآحر نسبة قبلوها في التمريض 85.111 لهذي السنة .. وانقبلت فيها

3- حساب المعدل

أول شيء لازم تعرفو انو لو جبت 95 أو 96 أو 97 أو 98 أو 99 أو 100 .. أنت كذا جايب أصلاً A+ .. أخذت 5 نقاط في ذي المادة
ونفس الشيء لو جبت درجة في مادة ما داخل ذا النطاق من 90 إلى 94 جبت A .. حتاخذ 4.75 في ذي المادة
85 إلى 89 B+ .. حتاخذ 4.5
80 إلى 84 B .. حتاخذ 4
75 إلى 79 C+ .. حتاخذ 3.5
70 إلى 74 C .. حتاخذ 3
65 إلى 69 D+ .. حتاخذ 2.5
60 إلى 64 D .. حتاخذ 2
أقل من 60 راسب بس يحسب لك في المعدل إنك أخذت 1

Dn حرمان ونفس الشيء حياخذ 1 زي الرسوب
بس هو شيء مو كويس من ناحية التوظيف لو شافوه في كشف درجاتك يعطي انطباع سيء عنك من ناحية الاهتمام والحضور

يلا نحسب المعدل لهذا المثال ..

طالبة جايبة هذي التقادير في الترم الثاني

الرياضيات A+ .. بثلاث ساعات .. 5 نقاط
الفيزياء F .. بثلاث ساعات .. نقطة
الاتصال B+ .. بثلاث ساعات .. 4.5 نقاط
الحاسب A .. ثلاث ساعات .. 4.75 نقاط
انقلش مستوى 4 جابت C+ بساعتين .. 3.5 نقاط

عدد الساعات = 3+3+3+3+2
= 14
( 5*3) +( 1*3) +(4.5*3)+(4.75*3) + ( 3.5*2) / 14 = 3.767
معدلها هذا الترم 3.767 من 5

درست في الصيفي ونجحت ب A+ يعني أخذت 5 نقاط للفيزياء يصير معدلها التراكمي حق الترم الثاني والصيفي :
( 5*3) +( 1*3) +(4.5*3)+(4.75*3) + ( 3.5*2) + ( 5*3) / 17 = 3.985

وكمان قد اضفت ثلاث ساعات على 14 . . حتى لو رسبت تحطها في حساباتك
معدلها التراكمي صار 3.985 من 5 بعدما نجحت في الفيزياء للمرة الثانية
واللي يقول هذي الإشاعة الوسخة حتى لو نجحت تحسب لك انك جبت 60 .. هذا اعطيه كف جامد في وجهو
طبعًا تقدرو تحسبوا معدلكم من أول ترم إلى عاشر ترم في الجامعة ...من
تبويب الطالب << سجلات الطالب << احتساب المعدل التجريبي
واللي يقول يختلف المعدل كمان هذا كف حار .. ما راح يختلف الإ إذا تقديرك اختلف .. هوا اسمو معدل تجريبي يعني انت قاعد تخمن لو جبت A+ كم حيصير معدلك
لكن إذا نزلت كل تقادير موادك في الاستعلام الشامل والمعدل ما نزل *بسبب لكاعة العمادة* .. تقدر تحسبها من هناك .. ماراح يختلف أبدًا ..

محد سأل كيف تعرف عدد الساعات للمادة مستقبلاً بعد التحضيري ؟
تروحو عند الطالب << التسجيل << الجدول الدراسي .. تجيك بيانات زي كذا عند كل مادة مسجلة لك

الفصل الدراسى :
الرقم المرجعي للمقرر(CRN):
الحالة:
الاستاذ المعين:
نظام الدرجات:
الوحدات / الساعات الدراسية:
المرحلة الجامعية:
الفرع:

طبعًا الوحدات / الساعات الدراسية هي المقصود بها عدد الساعات ..

ونصيحة لكم شوفو هالروابط مفيدة لكم :
1- الى دفعة 14 ، كل ما يهمك عن مواد السنة التحضيرية
http://www.skaau.com/vb/showthread.php?t=712163

2- [STAT110] كتاب الإحصاء مع الحلول Elementary Statistics- A Step By Step Approach
وعلى فكرة الترم الثاني اعتمدوا اعتماد كلي على الطبعة9 وفيه فروقات متوسطة بين الطبعتين ..
بس مو مشكلة في رابط الكتاب موجود حلول لأغلب السكاشن استفيدو منها ..
http://www.skaau.com/vb/showthread.php?t=730745

3- قِطافُ السَّنة التَّحضِيريَّة بيْنَ أيدِيكُمْ | دُفعَة 15 ♥ ‏
http://www.skaau.com/vb/showthread.php?t=766331
موضوع شامل ماشاء الله .. جمعت ملفات كثيرة من مواضيع كانت موجودة في المنتدى واضفت رأيي عن خطة ألف هنا
http://www.skaau.com/vb/showthread.php?t=788416

4- English Level 3 & 4 .. Workbook Kyes ... حلول الورك بووك
http://www.skaau.com/vb/showthread.php?t=734906

وهذا برضو نفس 3 بس تتكلم عن الأنظمة
http://www.skaau.com/vb/showthread.php?t=772345

كف أخير للي يقولك اهم شيء ننجح في ذي المادة . ذولي مافيهم خير وناس همجية حتشوفوهم كثير الله يعينكم اسحبو منهم
كثييييييييييييييييييييييير نسبتهم العامة تدخلهم الكلية بس نسبتهم الخاصة ما تأهل يدخلو وأصلاً مالهم أحقية في التسكين فيها.. بسبب مقولة أهم شيء ننجح !!
وبكذا كتبت الموضوع
والسلام عليكم ..

[بنت ناس وقلبي ألماس]

وعليكم السلام ورحمة الله وبركاته

ما شاء الله تبارك الله موضوع مميز وجاء في وقته

ربي يعطيك العافية ما قصرتي ويكتب لك الأجر العظيم ويحقق لك كل أمنياتك

منورة القسم دائماً بردودك الله يسعدك


وتم تثبيت الموضوع وتستحقي إضافة وسام التميز

[فاتحة]

أهلاااا آميييييين ولك مثلها يارب شكراً ع لطفك

**

افتكرت معلومة نسيت أقولها بخصوص ترتيب الرغبات و كانت موجودة في الأودس ونصها :

المفاضلة على مقاعد الرغبة في الفرز الالي للتسكين سيكون بناءا على النسبة العامة والخاصة وليس ترتيب الرغبة بين الطلاب

بمعنى انو فيه طالب ما انقبل لا رغبة 1 ولا 2 .. ورغبته الثالثة حاسبات ونسبته العامة 97 مع اجتياز النسبة الخاصة طبعا
وفيه طالب ثاني رغبته الأولى حاسبات ونسبته 96

اللي أحق بالقبول هوا صاحب الرغبة الثالثة حاسبات لإن نسبته أعلى من الطالب الثاني بغض النظر عن ترتيب الرغبات

كانت عندنا دكتورة تقول عكس الكلام هذا والبنات يرتابوا ويغيروا رغباتهم خصوصا الكليات الصحية إذا حست انها ما راح تنقبل في الطب تقوم تختار تخصص صحي ثاني

مع إن المعلومة مكتوبة قدامهم في الاودس وفي حساب عمادة القبول !!

فلا أحد يضحك عليكم حتى الدكاترة // إذا ما كانو هم المسؤولين عن القبول \\ لا تسألوهم وتلخبطوا نفسكم

[hasan5087]

مشكور يعطيك العافية

[ملك الهوكي]

الله يعطيك العافيه ، عندي سؤال لو سمحتو

فالطب و طب الأسنان لو جبت فماده من المواد 80 والباقي اعلى من 85 انقبل؟

[فاتحة]

تكتب موضوع طويل وفي النهاية يجيك رد عبيط زي كذا !
شكلك قرأت العنوان بس

احسب الموزونة كم تطلع .. وذكرت لك الطريقة الحسابية فوق وواضحة