لطالبات كيمياء حيوى_ ممكن تفيدونى؟؟

[Nada90]

الســـلام عليكم ورحمة الله ,,
انا طالبة تحضيرى وان شاء الله ابغى اتخصص في كلية العلوم قسم كيمياء حيوي

عشان كده حابة اعرف كل شيء عن هذا التخصص _ يعني طريقة الدراسة
وهل المواد صعبة ام سهلة ؟؟ وهل هو متعب في المذاكرة ؟؟

وكيف موادكم ؟؟ والمعامل ؟ وايش معنى الصيفي ؟؟ يعني بتدرسوا في الصيف واللا ايش؟؟
وايش معنى ( مادة حرة ) ؟؟ وايش يعني مادة اختيارية ومادة اجبارية ؟؟؟

وكمان ابغى اعرف _ انا دحين خلصت تحضيري ونجحت في كل المواد والحمدلله _
دحين هتخصص على طول في كيمياء حيوي ؟؟ واللا في سنة عام لكل اللي داخلين كلية علوم وبعدين يخصصوا ؟؟؟


اللي تعرف اي معلومة ياريت ماتبخل عليا بها ..

[R-Kh]

يعني طريقة الدراسة وهل المواد صعبة ام سهلة ؟؟ وهل هو متعب في المذاكرة ؟؟

يعتمد على الحفظ مررره كتير
المواد حتكون صعبه لو ما بدأتي اول بأول
لاني حتلاقي كميه مررره كبيره تحفظيها في يوم واحد
...

وكيف موادكم ؟؟ والمعامل ؟ وايش معنى الصيفي ؟؟ يعني بتدرسوا في الصيف واللا ايش؟؟ وايش معنى ( مادة حرة ) ؟؟ وايش يعني مادة اختيارية ومادة اجبارية ؟؟؟

لو تحبي القسم حتشوفي المواد مره ممتعه
المعامل مرررره سهله وممتعه
الصيفي لو انت حابه تنزلي مواد في الصيف (الصيفي مو اجباري..بس اللي حابه)
ماده حره يعني ماده تختاريها من كليات تانيه زي الاقتصاد المنزلي و ادارة واقتصاد و و...
وهيا اجباريه عشان تخلصي ساعات الخطه
...

انا دحين خلصت تحضيري ونجحت في كل المواد والحمدلله _ دحين هتخصص على طول في كيمياء حيوي ؟؟ واللا في سنة عام لكل اللي داخلين كلية علوم وبعدين يخصصوا ؟؟؟

بس تاخدي المواد اللي باقيتلك
اللي هيا معامل المواد العامه
معمل الكيمياء (chem281) معمل الفيزياء (phy281) معمل الأحياء (bio281)
كلها بساعه وحده ومررره سهله
....
لو خلصتي دي المواد تقدري تاخدي مواد التخصص على طول
...
ولو حابه تعرفي اكتر عن القسم
http://www.skaau.com/vb/showthread.php?t=48406
...
والله يوفقك
ونشوفك معانا
..
:)

[Nada90]

الله يجزيكي كل الخير ياااااااااااارب
شكرا لردك واهتمامك ..

الله يوفقك ويبارك فيكي _ ويجعله في ميزان حسناتك

بس عندى سؤال _ ايش هيا شروط ( مرتبة الشرف ) ؟؟؟

[M!Ss AmoOoLa]

ابغى ابدء من حيث ما انتهيتي

طبعا بما انك مخلصه جميع مواد السنه الاولى تحضيري حتخصصي ع طول ان شاالله.
قسم الكيمياء الحيويه يقال انه افضل قسم في العلوم.
مواد الحره يعني مواد تختاريه من اي كليه اخرى غير العلوم بمعدل 9 ساعات فقط وهيا لها فائده انها ترفع من المعدل بكونك تقدري تختاري مواد سهله .

مواد إختياريه هذه للمقبلين ع التخرج اتوقع لازم يدرسوها وتكون من نفس قسم الكيمياء الحيويه..

معلومات عن القسم من خلال دراستي
فيه متعه وماهو سهل فيه صعوبه يحتاج منك جهد ومذاكره اول بأول
مواد الاحياء هيا اصعب شيء في القسم
معامله حلوه ومره سهله

ويوجد في السنوات الماضيه فصل صيفي بس هذه السنه الغوه للبنات لإصلاحات في المباني ويمكن السنه الجايه يكون موجود.
هو فصل دراسي في الصيف للي حاب يدرس هذا تعريفه

[M!Ss AmoOoLa]

المشاركة الأصلية كتبت بواسطة nada90 الله يجزيكي كل الخير ياااااااااااارب شكرا لردك واهتمامك .. الله يوفقك ويبارك فيكي _ ويجعله في ميزان حسناتك بس عندى سؤال _ ايش هيا شروط ( مرتبة الشرف ) ؟؟؟

يعني شهادة تفوق مهم لازم تعرفي هذه المعلومات

اقتباس من احد ردود يلدرم:

انواع مراتب الشرف عند التخرج

من 4.25 الى 4.49 التقدير جيد جداً مع مرتبة الشرف الثانية

من 4.5 الى 4.74 التقدير ممتاز مع مرتبة الشرف الثانية

من 4.75 الى 5 التقدير ممتاز مع مرتبة الشرف الأولى


من شروط الحصول على مرتبة الشرف أن لا يسبق للطالب الرسوب في أي مادة خلال فترة الدراسة


الان نتكلم على التقديرات بشكل عام لجميع الطلاب والطالبات

من 2 الى 2.74 مقبول

من 2.75 الى 3.74 جيد

من 3.75 الى 4.49 جيد جدا

من 4.50 الى 5 امتياز

[Nada90]

شكرا لردك _ وجزاكي الله الف خير

عن جد كنت محتاجة هذه المعلومات ... الله يوفقك ويسعدك يارب

بس مرتبة الشرف بس تعتمد على معدلى في أخر سنة + انى مااكون رسبت في اي سنة ؟؟؟ واللا تعتمد كمان على معدلى في السنوات كلها؟؟؟

[R-Kh]

المشاركة الأصلية كتبت بواسطة Nada90 الله يجزيكي كل الخير ياااااااااااارب شكرا لردك واهتمامك .. الله يوفقك ويبارك فيكي _ ويجعله في ميزان حسناتك بس عندى سؤال _ ايش هيا شروط ( مرتبة الشرف ) ؟؟؟

العفو ولو دا واجبنا
...
مراتب الشرف
من 4.75 وما فوق ممتاز مع مرتبة الشرف الأولى
من 4.5 إلى 4.74 ممتاز مع مرتبة الشرف الثانية
من 4.25 إلى 4.49 جيد جدا مع مرتبة الشرف الثانيه
http://www.kau.edu.sa/aasiri2/GPA-Calculations.htm
..
:)

[R-Kh]

بس مرتبة الشرف بس تعتمد على معدلى في أخر سنة + انى مااكون رسبت في اي سنة ؟؟؟ واللا تعتمد كمان على معدلى في السنوات كلها

تعتمد على معدلك التراكمي لآخر ترم ( يعني كل معدلاتك الفصليه مع بعضها)
..
:)

[M!Ss AmoOoLa]

بس مرتبة الشرف بس تعتمد على معدلى في أخر سنة + انى مااكون رسبت في اي سنة ؟؟؟ واللا تعتمد كمان على معدلى في السنوات كلها؟؟؟

ع السنوات كلها

[Nada90]

طيب انا دحين معدلى 3.38 في الفصلين للسنة التحضيرية ..

يعني في امل اني اخد مرتبة الشرف لو شديت حيلى في السنوات الجاية ؟؟؟