للي درس تحضيري وانقبل طب بشري .. يدخل

[M!ss Mojy]

شوفي هذا الرد ليا ( واستحملوا فلسفتي لان حطيت الرد هذا في موضوع عن التفكير الايجابي )

في السنه الي فاتت يعني التحضيري كانت تعدي علينا ايام صعبة جدا

ايام تحسي نفسك خلاص محطمة .... ايام تحسي انو حلمك في التخصص ضاع هباء منثورا

وبحكيكم عن احد المواقف الي صارت لي في الترم الثاني وتحديدا في مادة الكيمياء

طبعا اختبار الكيمياء الدوري الاول كان جــــــــــــــــدا صعب والوقت كان مرره ضيق

يعني كان الاختبار توتر في توتر

وماقدرت احل زي العالم والناس مع انو كنت داخله الاختبار و انا فاهمة المنهج كلو ولله الحمد

المهم عدى الاختبار وطلعت الدرجات وكانت الدرجة بنسبة ليا غير مرضية

يمكن غيري يشوفها كويسه بس بالنسبه ليا وللبنات الي يبغوا تخصص الطب ماكانت الدرجه كويسه

المهم قلت انا لازم اشـــــــــــــــد حيلي واعوض الدرجه في الاختبار الدوري الثاني

وجا اليوم المنتظر يوم اختبار الدوري الثاني للكيمياء

وفي الصباح وانا اتجهز للجامعه وقفت كذا قدام المرايه

( طبعا اتآكدت انو مافي احد يشوفني عشان محد يشك اني تجننت ههههههههههه )

وجلست اتكلم بصوت عالي واقول :

( موجي انتي راح تدخلي الاختبار وتحلي كويس وتجيبي الفل مارك )

وجلست اقنع نفسي بهذا الشي وطول الطريق كمان جالسه اردد الجمله هذي

وفعلا دخلت الاختبار وانا متفااااائـــــــــــلة لدرجة ماتتوقعوها كاني داخله الاختبار وانا واثقه من الدرجة

بس يعني قبل الاختبار جاني شويا قلق وخوف وهذا شي طبيعي ههههههههههههه


ولله الحمد لمن نزلت الدرجات اخذت الفل مارك

يعني الي حابه اوصلكم هوا من الموقف هذا انو خلوا تفكيركم دائما ايجابي عشان تقدروا تحققوا الي تبغوه

وفي نفس الوقت تزيد ثقتكم بنفسكم لمن يكون تفكيركم ايجابي

وكما قال عليه افضل الصلاة والسلام ( تفائلوا بالخير تجدوه )

يعني كل الاشياء الي بتصير لك في واقعك هو انعكاس لما تفكر به

فتفكيركم زي المغناطيس اذا كان تفكير متفائل راح يجذب لكم المواقف السعيدة والانجازات والنجاح

اما اذا كان تفكيركم متشائم دائما فأبشروا بحياة تعيسة ملؤها الهم والغم