مشوار دراستي .. والمستقبل المجهول !!

[بيو كيميائية ^_^]

المشاركة الأصلية كتبت بواسطة anen alro7 يسلمووو ع المرور حبايبي .. بس انا رحت لدكتوره سهيلهـ وماحسيتها اوك في تعاملها يعني لما رحت لها كانت معصبه وقلت لها ابغى اراجع درجاتي قالت ليي ححطهم لك ع الباب يعني هي بس اخذت الدرجات من الاودس وكتبتهم ليي بالورقه .. ماخلتني اراجع ورقتي او حتى اشوفها فانا قلت بنفسي شكله ممنوع .. ... ما لي امل ولا بكليه صحيه ؟!!! الله المعين .. و يسلمو ع الصراحه حبيبتي .. خليتيني اعرف الحقيقه ..

ماأعرف بس هي دائمًا تعاملنا تمامـ يمكن كانت متضايقة هذك الوقت

وأنتِ ماتشوفي هي اللي تفتح الورق وتشوف وتخبرك بعدين

للأسف بس تقدري تسجلي في أم القرى وتدرسي طب إذا أنتِ ماتبي غيرهـ

بالتوفيق

[Aziza Yahya]

خلي عندك امل

و لاتفقديه

ولو تحبي شي وتتمنيه

حتوصليلو يعني حتوصلي بإذن ربنا

والتحطيم اللي تحسي فيه

كم وكم طالب وطالبه يحسو فيه

وخاصة الطالبات

لأنو الدراسه هيه كل شي في حياتهم وسلاحهم الوحيد في الحياه

شوفي انتِ شدي حيلك في الباقي لسا عندك الفاينل

واتوكلي على ربنا

استودعي الله في درجاتك

و صدقيني مستحيل تطير منك درجات بلغلط او بالقصد

وربنا ما يعوضك هيه سواء دحين او بعدين

ربنا اسمو العدل وانتِ لازم تكوني واثقه من دا الشي

اذا خلصتي السنه التحضيريه

شوفي ايش التخصصات المسموحه لك

وشوفي نفسك هل انا لسا ابغى ادرس طب .؟

لو جوابك لا ..

فكري في التخصصات اللي قدامك

ايش الشي اللي مكن تكوني فيه مبدعه وتقدري تواصلي فيه .؟

واستخيري ربنا واختاريه ..,

واذا لسا في بالك تدخلي طب ..

مين قال ماعندك فرصه ..؟؟

انا اقولك الفرص اللي عندك

1-التحويل ..
والتحويل للكليات الصحيه والطب يكون معدلك 4.50

ويمديكي خلال السنه الجايه يعني مستوويين ترفعي معدلك

خدي مواد عامه عربي وثقافه ترفع المعدل والمواد التانيه شدي حيلك فيها ترى ماتكون زي السنه التحضيريه

وبعدين خلاص كبرتي واتعودتي على نظام الجامعه كلنا ارتفعت معدلاتنا بعد السنه الاولى ..

2-برنامج المنح الحكوميه

يمديكي تدرسي في اي كليه او جامعه اهليه

على حساب الدوله بس الفرق مافي مكافئه واتوقع انو شي عادي مدام انو عادي عندك تدخل الطب الموازي ..

وهنا الرابط شيكي ع المعلومات اللي فيه ومتى يبدأ التسجيل ودا الكلام

http://grants.mohe.gov.sa/brief.aspx


3-نظام البعثات الخارجيه يمديكي تلتحقي فيه شروطو سهله وما يحتاج الا محرم و شوية عزم

4-ودا طويل شويه بس

انك تتخصصي كيمياء حيويه وبعد ماتاخدي البكالوريوس

يمديكي تكملي في اي دوله دراسة الطب ببكالوريوس الكيمياء الحيويه

..

اهوه قبل شويه ماكان عندك ولا فرصه
ودحين في عندك اربع فرص لو تبغي جد تدخلي طب

..

اهم شي سواء دخلتي طب او اخترتي شي غيروا

- اقتناعك التام بالشي اللي جالسه تسويه سواء وافق هواكِ او لا
-في شي اسمو "التكيف " يعني لو ما ارتحتِ للشي من البدايه اتعودي حبه حبه رح ترتاحي وتحبيه وتبدعي فيه
-الدنيا ما خلقت في يوم وربنا قادر على كدا بس عشان يدينا درس في التروي وعدم استعجال النتائج
-ربنا لمن قال لمريم عليها السلام "وهزي إليك بجذع النخلة تساقط عليك رطبا جنيا " ربنا قادر انو يسقط عليها الرطب بدون ماتسوي ولا حركه بس عشان يدينا درس في العمل والسعي لتحقيق اللي نبغاه ونتمناه حتى في اصعب الظروف


ربنا يوفقك وييسر أمرك ويكتب لك الخير

اختك

azoOoz

^_^

..
.

[دنـــا]

المشاركة الأصلية كتبت بواسطة بيو كيميائية ^_^ وعليكم السلام ليش ماراجعتي دكتورة سهيلة وتشوف لك ورقتك تراهـا مرة متعاونة أذكر السمستر اللي فات قالت لنا قصة وحدة من التحضيري في الدوري الأول جابت يمكن 26 شيء كذا المهم الدوري الثاني جابت 8 يمكن المهم مرة واطيه الدرجة راحت راجعت وطلع نفس الشيء قالت لها شوفي ورقة الأسئلة وشافت طلع نموذج الإجابة غير عن الأسئلة وجابت 28 شوفي الفرق و وبصراحة ياأختي أنتِ معدلك اثنين وشوي أتوقع وحتى لو أرتفع الآن ودخل الثلاثة للأسف ماراح تدخلي طب ولا أي كلية من كليات الصحية التخصصات المتاحة لمعدلك علوم إقتصاد منزلي ويمكن إقتصاد وإدارة (ماأدري كيف المعدلات اللي تاخذها) أنا ماأقول هذا الكلامـ لك عشان تتحطمي وتيأسي بس أتكلمـ معاكِ بواقعية ماأبيكِ تحلمي وتعيشي على حاجة مستحيل تصير وبعدين تنصدمي وأنتِ قلت تبين تعرفين ايش هي التخصصات فقلتها والحين ذاكري بس لايهمك التخصص وترا هذهـِ التخصصات حلوة بعد ولها مستقبل

انا مع بيو لان كلامها واقعي وفيه عين الصواب
وإن شاء الله ربي يوفقك وتدخلي الشي اللي فيه خير لك والدنيا ماوقفت على الطب
ولو كان عندك حلم في الطب وحلمك كبير تقدري تدخلي ام القرى
بس انا اشوف تفكري قبل هادا كله وتستخري

[anen alro7]

الف الف شكر لكم اخواني واخواتي ع الردود الطيبه والتفاعل مع موضوعي ومشكلتي ..

وشكر خاص لك اختي عزوز من جد كلامك اراحني كثيرا ..

يسلموو حبايبي ..

ربي مايحرمني منكم يا احلى اعضاء ..

[kado0osha]

أختي .. خلي أملك بربنا كبير وثقي به تماما فهو لن يضيعيك ..
أما بالنسبة ادا كان نفسك تدخلي الطب >> ترى كلنا لما كنا صغار هادي أمنيتنا بس طبعا بعد التحضيري تغير كل شي ..
كل وحدة مننا عرفت تحدد مصيرها من خلال معدلها ..ومافي شي بعيد على ربنا ابذلي قصارى جهدك في الفاينال وان شاء الله ينرفع المعدل ..
بس ترى دحين ما عد يفرق طب ولا غيرو لانو في تخصصات كثييييرة غير الطب رآآآآآئعة وممتعة ومجالها الوظيفي مطلوب أكثر من الطب ..
ومستقبلك مجهوول في وجهة نظرك .. لكن ربنا كاتب ومقدر لك هو من زمان ..
ولا تنسي الرضا بما قسك الله لك ..ولا تياسي

لا يسعني في نهاية كلامي الا ان اسال الله
لك التوفيق في حيااتك وان تحققي حلمك ..

تقبلي نصيحتي ولك ودي ..

[anen alro7]

يسلمو ع الكلالالالالالالالالالالام الطيب ..

وعسى ربي يوفقنا جميييييييييييييييييييعا ياربـ ..