انا طالب سنه تحضيريه علمي وش تنصحوني !!!

[الخلوق]

وعليكم السلام ورحمة الله وبركاته
أخوي:- أول شي أنت أكيد ما طلبت هذا النصح إلا وشكلك إن شاء الله مجتهد فأبعطيك هذي النصائح أسأل الله أن يفيدك بها:-
1-لا تأخذ كلام طلاب وامش في الجامعة وأنت ساد أذنك ، إذا سمعت المعلومة من الدكتور نفسه خذها ،ولا تسمع كلام الطلاب المثبطين مثل اللي يقول: (يا أخي لا تذاكر من الملخص الفلاني ما يفيد في الاختبار أنا أعرف فلان ذاكر منه السنة الماضية يقول ما يفيد) ومن هذا الكلام لا تأخذ إلا اللي تقتنع فيه وأنا أبقول لك أفضل الملخصات والكتب المساعدة .
2-طريقة الدراسة في الجامعة تختلف عن الثانوي ..مثلا:- المذاكرة في الثانوي أنت تذاكر من نفس الكتاب في الجامعة لا مو شرط ،ممكن تذاكر من الكتاب بس الكتاب معلوماته كثيرة ولا هي واضحة وبعد بالانجليزي ،هناك أساتذة خصوصين ينزلون ملخصات في المكتبة تشرح المنهج وهم متابعين مع الدكتور يعني يعرفون هذي السنة وش الجزئية والأبواب اللي بتأخذونها ويمكن بعضهم يزيد شي بسيط مو معك بس أنت بتكون عندك ورقة فيها جزئية المادة اللي بتأخذونها تطلبونها من الدكتور وهويجيبها لكم أو ينزلها في المكتبة .
3- في الجامعة اعرف كيف تختار صاحبك،خلك انسان قوي الشخصية ،مو أي واحد يجيك تصاحبه،اعرف كيف تنقي صاحبك زين زين.
4-الجامعة مسؤولية يعني أنت المسؤول عن نفسك ما يعرفك مدير ولا دكتور ،مثلا:في الغياب الدكتور ما يقول وين فلان يغيب كثير اتصلوا عليه إلا إذا كان الدكتور حبيب ،الدكتور يحظر اذا كنت غايب يغيب ،وأنت لك عدد محدد من الغيابات 25% من ساعات المادة إذا تجاوزت هذا العدد تعد محروم تأخذdn يعني ما تدخل الاختبار النهائي ،يعني الراسب في المادة أحسن من المحروم فيها الراسب يقدر يأخذ ترم صيفي.
5-الحين أبجي معاك للمواد وأبعطيك أفضل الملخصات على حسب تجربتي:-
-في مادة الكيمياء :ملخص الأستاذ يوسف زويل (لكن المذكرة مهي كاملة إلا إذا كملها السنة الجاية مدري) ،الجزئ اللي مهب موجود في المذكرة هو الكيمياء العضوية تذاكره من كتاب اسمه (مختصر الكيمياء) وهو بالعربي وممكن تذاكر منه أي شي هذا الكتاب ساعدني كثير في الفهم ،وتذاكر من الكتاب الأساسي للمادة التعاريف والملاحظات هي تجي في الكتاب مربعات ملونة يكون فيها تعاريف وملاحظات هي اللي تذاكرها من الكتاب الأساسي ترا يجي منها في الاختبار.

-في مادة الأحياء :-ذاكر من التست بانك فقط ، أنا واحد سمع كلام الدكتور وذاكر من الكتاب والشرائح اللي يعطينا الدكتور وضيع وقته صراحة عليها ،ومن ثم حملت المادة وأخذتها صيفي ،لكن يوم جا الصيف وطنشت الدكتور ولا سمعت كلامه ،وذاكرت بس من التست بانك أخذت درجة فوق 85 الحمد لله.

-في مادة الرياضيات:-ذاكر من مذكرات أشرف بركات.

-في مادة الإحصاء:- ذاكر من مذكرات أشرف بركات (وإن كانت كثيرة ،لكن الشرح مهو كثير اللي مكثرها مسائل).

-في مادة الفيزياء :- ذاكر من مذكرة أشرف بركات.

-في مادة الانجليزي:- لك طريقتك في المذاكرة ما أقدر أقول لك شي لأن حنا كانت إختباراتنا موحدة يعني كل المستويات اختبارها واحد ، لكن أنتم إختلفتو عننا راح يختبر كل مستوى من كتابه ،وعلى هذا ممكن تطلب بعض الكليات مستويات محددة ...مثلا:-ممكن تقول كلية الهندسة نبغا طلاب من المستوى الثالث وفوق...فشد حيلك في اختبار تحديد المستوى .....وعلى فكرة الكلام اللي أقوله كلام الدكتور مو كلامي.

-والمواد الثانية بالعربي حاسب ومهارات اتصال تذاكر من الكتاب وإن شاء الله ما عليك خوف.

....وترا هذا الكلام اللي اقوله عن الملخصات شي من تجربة شخصية وارتحت لها ،وفيه ملخصات وكتب ثانية قد تكون أفضل من اللي قلت لك ممكن ترجع لها لكن أنا قلت لك اللي أعرفه......

أتمنى إني أفدتك................وشكرا...........