Walking away from the sun :: SoulTalk

[Daniaa.]

اكتر حاجة اكرهها في بداية كل سنة وخصوصا ازا كانت في مكان جديد زي الجامعة دحين ..حكاية النيو فيسز دي ..
اوف..اوف..اوف..

اول كم اسبوع في اولى ثانوي ..كنت ماره بحالة نفسية سيئة .. والسبب المدرسة, النظام والمكان الجديد لانو كنت لحالي ما اعرف احد
وكانت تجيني الحالة دي مع كل بداية ترم ...الين سرت تالت واتعودت << بدري

كان نظام المدرسة نظام المقررات اللي تقريبا يشبه نظام الجامعة... الحلو في الموضوع انو من اول يوم ليا في المدرسة الين اخر يوم .. في نفس الكلاس و مع نفس البنات كل يوم في وجيه بعض .. تلاته سنوات ,, يعني ارتحت من هرجة النيو فيسز دي

انا ما احب اختلط بالناس كتير.. مو بس ما احب..صعب كمان يعني اخد فتره عبال ما اتعود على اي وجه جديد اقابلو ,, لو كان نفر واحد كم اسبوع ويمشي الحال ازا ما وصلت لشهر..

لكن لمن يكونو ناس كتير زي كلاسي اللي في الثانوي...الين اليوم دا وانا ما اقدر احتك بيهم او اكلمهم على انهم صحباتي وعشرة تلاته سنين...
يعني لو شفت وحده فيهم يدوبك اسلم عليها بس وامشي بحكم اني اعرفها... مافي كيفك وايش اخبارك وايش عاملة ...at all




فالله يعيين دحين ..كل مادة في كلاس وكل كلاس فيلو بنات جداد ونيييوو فيسززز

[Daniaa.]

غريبة المنتدى دا مو مسوي المتواجدوون الآن ..مو قصدي عللي اون لاين عارفه انو في
قصدي في صفحة الموضوع و الملف الشخصي ..اللي يجي تحت مكتوب اسم العضو الموجود في الصفحة وعدد الزوار

هوا احسن انو مو عاملين يعني..عشان بعض الناس اللي محطيين عينهم على كم عضو كدا..
متتبعينهم ..
اول ما يشوفوا مشاركة جديدة لهم او موضوع على طووووول يروحوا يشوفوا .. وكل شوية والتانية خاشيين الملف حقهم ..ههههه
فأحسن كدا عشان لا ينتبهوا ويقولوا اشبهم دول



بس زي مسلا في المدونه هنا .. حلو تكون عارف مين اللي بيقرا وازا في احد متابع

[Daniaa.]

الساعة الخامسة و النصف مساءً بيتوقيتي ..
غلبني التعب.. غفوت في انتظار صلاة المغرب ..
لم اشعر بنفسي..استيقظت لأجدها قد اصحبت الثامنة
" افكار : نمت ومني داريه عن نفسي ومحد فكر يصحيني :< "

توضأت لأصلي فرضي المغرب و العشاء...
بدأت بالصلاه.


لم اكن انا تلك التي تصلي..
" افكار : اشبي كدا ؟ "




احساس غريب !

[Daniaa.]

اثناء غفوتي تلك .. حلمت بهم
كنت مستمتعة في بدايته...استيقظت .. " كويس انو كان حلم "

[Daniaa.]

لاحظت في اعضاء المنتدى دا حاجات غريبة...مدري كل المنتديات الباقية كدا ولا لأ..
لأنو هدا اول منتدى اسجل فيه ..

ملتقى المنتظمين ..
الاعضاء القدام ما شاء الله مهم مقصرين ..منزلين مواضيع و موضحين كل شي تقريبا عن الجامعة والسنة التحضرية .. و الكلام دا

يجيك واحد عندو سؤال...يجي جري على طول موضوع جديد .. والمشكلة انو السؤال دا قد اتسأل قبل كدا عشرمية مره ...بس انو لو يدور شوية قبل ما يستعجل وينزل موضوع قديش كبرو عشان سؤال واحد ..وموجوده اجابتو كمان .
بعد شوية كدا..يجي واحد تاني وينزل موضوع..وبيسأل نفس السؤال !!!!!
لا اله الا الله


الاسبوع اللي فات ..لمن قفل الاودس قبل موعد الحزف والاضافة
يالطيييييف عالازمة اللي سووها ...ياهو ما يصير كدا..مافي صبر ابدا ايش هوا دا

عشرين الف واحد منزل موضوع و بيقول نفس الكلام...

الاودس مقفل
الاودس متى ناويين يفتحووه
الاودس..
الاودس..

ولمن فتح عاااد...عملو ازمة تانية ... حقون الحزف و الاضافة من جهه و المستجدين اللي نزلهم الانجلش 20 ساعة من جهه تانية ...

الحمدلله عدت على خير وما طق فيهم عرق .. ولكن ما زالت اثار الازمة موجودة..الاودس ياحرام ضرب ودخّل ستين في سبعين



نجي للاقسام التانية..

مايقهرني الا لمن احد يجي يقول مقولة..حكمة ولا مثل..
يجي اللي بعدو يقول نفس المثل
واللي بعدو كمان
واللي بعدو ..
ولا يجي يردلك بحديث .. احيانا احس مالو صلة بالموضوع


ولمن نزلوا الموضوع يبغوهم يرجعوا الوناسة ..
ناس جايية تتفلسف..مسويه انو يعننها ..
تقولك ما اشوف لي فايدة.. ايش تبغوبو و مدري ايشكلو ومن دا الكلام ..
ويجو يضاربوا وطولة لسان



شي يرفع الضغط من جد !

[Daniaa.]

مره مو حلو كدا...لمن يكون في ناس تحبك وتبغى تكون معاك.. بس انت للأسف ما تبادلهم نفس الاحساس
بس عشان لا تكسر بنفسهم تتضطر انك تقعد معاهم.. بس جوت نفسك كدا ما تبغى

ولأني أؤمن بمقولة " ماتَفعل يُفعل بك ولو بعد حين" بشدة ..
احاول بقد ما اقدر انو انتبه لتصرفاتي مع الناس.. وانو قبل ما اجي اعمل شي اقيسو على نفسي واشوف ردة فعلي ايش حتكون .
فما ادري ازا المقولة دي تنطبق عالكلام اللي فوق...
بس مره حاسة بالزنب وتأنيب الضمير.. ودايما ماتجيني افكار ازا في ناس بيحسوا كدا ناحيتي ولا لأ .

[Daniaa.]

انا اعرف انو الواحد ينام عشان يريح جسمو ودماغو .. و انو المفروض اول ما الواحد يحط راسو عالمخدة.. يوقف عن التفكير .

بس بعض الناس لأ...اول ما يجو يحطوا راسهم..تبدأ الافكار سواء الجيدة او السيئة تنهال عليهم من كل حدب و صوب .. مدري من فين.
يعني وقت ما يكون من جد محتاج الفكره دي.. ماتجي ابدا..
بس اول ما يجي يبى ينام .. تولع اللمبة ..



ياريت لو يكون في زر.. وقت ما يكون الواحد طفشان او تعبان ومايبى يفكر يعمل لمخو شت داون
خصوصا وقت النوم... اللي هوا اهم حاجة في الحياة