هاااام لطلاب وطالبات الانتساب ( بخصوص الرسوم 3000 )

[الله يكون بالعووون]

قصتي بالتفصيل والحمدلله على كل حال



السلام عليكم ورحمة الله وبركاته

اولا :جزاك الله كل خير عني وعن جميع الطلاب والله يغفرلك ولوالديك

ثانيا: راح اوضحلك وضعي الشخصي وتضرري كل ترم مع مسألة الرسوم العالية للجامعة هذا غير سعر الكتب والمواصلات والحمدلله اني من جده البنات اللي اعرفهم من خارج جده متضررين اكثر مننا لأنهم يدفعو سعر التذاكر والسكن في جده والاكل والشرب والله المستعان

انا ولله الحمد من اسره ميسورة الحال امي معلمة وابي متقاعد ولي من الاخوة 7 وبالرغم من هذا كل ترم وقت السداد ماندري من وين نلم المبلغ والله احسها صعبة مع غلاء المعيشة يعني الواحد يآكل ولا يسدد فواتير ولا يروح مستشفى ولا يسدد رسوم الجامعة؟؟؟

طبعا تزوجت من 8 شهور وقلت بما اننا شخصين راح نقدر نسدد رسوم الجامعة بالراحة لكن اكتشفت العكس ’الترم اللي فات سددنا الرسوم من الفلوس اللي جاتنا هدايا بعد الزواج وهذا الترم زوجي استلف المبلغ من اخته بس عشان اكمل جامعتي والحمدلله باقيلي هذي السنه واتخرج (يعني هذا الترم والترم الجاي على خير)
ما قلتلك وضعنا المالي انا وزوجي

طبعا زوجي راتبه 5 آلاف ومع القرض بعض الاحيان ينزل الراتب 4000 ومرات 3 وشوي وهذا الشهر وربي نزل الراتب 2700 بسسسسسسسسسسس اللهم لا اعتراض
انا لي 3 شهور اشتغل في مدرسة مدخلة بيانات والراتب 1600 زوجي كان رافض اني اشتغل بس اقنعته وقلتله انه الشغل راح يساعدني في ترم التخرج في الجامعة وابغا اكسب خبره ورضي الله يرضى عليه,, وانا وربي اشتغل عشان نقدر على الاقل نسدد فاتورة التليفون ونقضي من السوبرماركت,,, مع العلم اننا ساكنين في بيت اهله يعني كيف لو كنا ندفع ايجار بالرغم من هذا كله وربي احس اني احسن من غيري كثير ولله الحمد

وحده من صديقاتي راتب زوجها تقريبا 4 وعندها طفلين وعندهم ايجار الترم اللي فات قدمت اعتذار لأنه ما عندهم , ايجار,مصاريف مدارس عيالها اكلهم ,شربهم ,,,,الخ

انا حاسه اني طولت عليك بس والله حابة افضفض ويارب تقريرك يوصل لأحد يحس فينا وفي معاناة ناس كثير والله يكتبلك الخير وين مارحت ويكتبلنا الخير من بعد الله على يدك

دمت بود

[محمد الخشرمي]

قوله صلى الله عليه وسلم:(( مثل المؤمنين في توادهم وتراحمهم وتعاطفهم كمثل الجسد، إذا اشتكى منه عضو، تداعى له سائر الجسد بالحمى والسهر))

الله يجزاك الف خير لسعيك في تحقيق حديث الرسول عليه الصلاة والسلام .
اسأل الله العلي العظيم لك ولي والديك الاجر والثواب والمغفرة ، وانا من اشد المناصرين والمعجبين بموضوعك والله ولي التوفيق.