اضراب طلاب وطالبات الانتساب من مدينة الرياض

[الدلوعة]

اولا: السلام عليكم ورحمة الله وبركاته


شباب وبنات الرياض


بخصوص اختبارات الاترام الجايه والمعاناة اللي عانيناها هالترم وسالفة الامطار اللي بغينا نغرق فيها الاشوي والاترام اللي قبل


وش رايكم نضرب عن اختبارات الترم الجاي لين يطلعون لنا قرار اختبارات المناطق بصراحه جامعة الملك فيصل مو احسن مننا مسوين اختبارات الانتساب في كل مناطق المملكة


احنا جالسين نخسر على هالاختبارات اكثر من اللازم يعني الواحد يوصل اخر سنه له وهو خاسر رسوم + سكن + سيارة + اكل وشرب تقريبا اكثر من 30 الف ريال لا والف لا ياجامعة الملك عبد العزيز.
بهالمبلغ الواحد يقدر يشتري له شهادة من برا لا وبعد معها شهادة ماجستير هدية ، بصراحة الوضع ماينسكت عليه جالسين ندفع كل هالخساير غير ان رسومها صايرة اكثر الجامعات رسوم في السعودية 3500 على ايش لا محاضرات منقولة ولا شي ولا حتى انهم يكتبون وش ملخص الدورة التأهيلية ، والا هم محتاجين هالمبلغ عشان الجامعة طال عمرها تصلح مبانيها وتبني مباني جديدة .
بعدين فيه كثير حالات سفرتها لجدة مو سهله ابد ابد يعني الناس عندها التزامات عمل والتزامات عائلية يعني اللي عندهم اطفال ويدرسون قولولي وش يسووى فيهم يتركون عيالهم اللي يدرسون بالرياض ويروحون هم جدة ؟؟



بعدين اللي قاهرني انهم قدرو يخلون اختبارات المناطق بس للسنة التاهيلية !!!!! ليه يعنى ااحنا عيال البطة السوداء والا عيال البطة السوداء ؟؟؟ انا مفروض اني متخرجه يعني مخلصه اكثر من 4 سنوات وداخله في الخامسة وباقي لي السادسة والحسابة بتحسب هالخساير لـ 6 سنوات

نبي اختبارات مناطق للكـــــــــــــــــــــــــــــــــــــــــــــــ ـــل

من يحط يده بيدي ونرفع فيها خطاب رسمي لمدير الجامعة ، وإلا عاد يتحمل هو مصاريفنا والا يرجعون لنا فلوسنا وندرس في ديرتنا
لا عادها الله من دراسة ماتسوى علينا

[بندر1]

كلاااااااااااااااااااااااام في الصميم ...

يعلم الله انني هذا الفصل ( المنكوب ) ان لي ثلاثة اسابيع بجده ...

وخسائر لايعلمها الا الله ...

وطلعت من المولد بلا حمص ...

اختبرت ماده وحده فقط .. وخسارة 8500 ريال .مدرس خصوصي .. سكن .. مصاريف ..كلها راحت على الفاضي ...

مذاكره قبل الاختبارات باسبوع وانا في جده واخرتها ... خوف ... وهلع ... وتشتت معلومات ...

الله يعيننا بس .. على هالجامعه ...

[عاشق الشام]

عز الله انكم صدقتوا واحنا إن شاء الله معاكم والله مو حاله( صرفية جامعة +تذاكر طيران+ ايجار شقق لمدة اسوعين ويمكن تزود يوم او يومين معها+ملخصات الجامعة الي الواحد لا يقل على 30 ريال +اذا مثلاً ما عندك سياره تروح تستأجر عشان تروح وتجي ولا تاكسي وغيرها +ولا تنسون يا حلوين مصاريف المغسله غسيل وكوي وملحقاتهما+اذا برضوا تبغى مدرس خصوصي مشان يفهمك الماده لاننا نجي دائماً على عماها +مصاريف البنزين )
يعني يا عميد جامعة المؤسس مو حاله الي قاعد يصير شوفولنا حل وبسرعة
ومشكورة اختي دلوعه الي طرحتي موضوع مهم كنا غافلين عنه بأتجاه الجامعة

[خالد المالكي]

طيب اش رايكم نجتمع الشباب عند برج المملكه والبنات عند برج الفيصليه ونسوي مضاهرات

ونخلي السنه التحضيريه خطه أ عند الصحاري مول وخطه ب عند بانوراما

اقول خلوكم في الواقع ولا تحلمو كثير

اختي كلامك صحيح وكل الطلاب يعرفون هذا الشي خصوصا الي من الرياض

وانا من المتأثرين بصراحه

لكن لو جينا على الواقع سؤال واحد واريد له اجابه

هل اذا سوينا مثل ما تكرمتي في موضوعك اعلاه راح يجيب نتيجه والجامعه بتعطي اهميه للموضوع ؟؟؟؟؟

ارجو الجواب على هذا

واشكرك على حماسك لبى الرياض ^_*

[الأسطوره]

ألا غدرت بنو أعلى قديما
وأنعم إنها ودق المزاد
ومن يشرب بماء العبل يغدر
على ما كان من حمى وراد
وكنتم أعبدا أولاد غيل
بني آمرن على الفساد
لقد أسمعت لو ناديت حيا
ولكن لا حياة لمن تنادي
ولو نار نفخت بها أضاءت
ولكن أنت تنفخ في رماد

[ALBADR]

لا بالعكس الاختبارات بجده حلوه مانبي اختبارات بالمناطق نبي نغير جو :)

[نواف س ن]

والله انا معك في كل كلمة قلتيهااا

لكن وين الي بيسمع

والله محد معطينااا بااال

الزم ما عليهم انهم ادفع واختبر بعدين ورنا عرض كتافك وعلى هالموال


ما اقول الا الله يعديها على خير ونتخرج

[ثامر البراق]

كل الشكر

وبما أننا طلاب جامعيين فلابد أن نرتقي بطرحنا ونقوم بإختيار الأسلوب الصحيح لمثل هذه المشاركات ,, فكلمة الإضراب ( ليست بقاموسنا كسعوديين )
كما أن مثل هذه المواضيع مكرره في الوقت الحالي ..

بالتوفيق للجميع

يغلق