بليز انا مبتدئه عندي استفسارات بالاكسس حق فيستا ممكن تساعدوني بحكم خبرتكم

[الابتهالات]

السلام عليكم ورحمه الله وبركاته

انا اختكم من اداره و اقتصاد
وعندي h.w بالاكسس حق الفيستا بالتحديد وواجهت مشاكل خلتني ماعرف اكمل الحل
فقلت مالي غير الله ثم انتو فديتكم اعضاء هذه الكليه الموقره
وسوري اذا حتعبكم بس بجد محتاجه هذي المعلومات مرررره
استفساري هو : انا عملت جدول قاعده البيانات المهم ..
في طريقة عرض التصميم فيه حقل اسمه مسمى الوظيفه الوصف حقه :20 حرف - القيمة الافتراضيه = مدرس -ويكون مطلوب .
بصراحه الوصف حق هذا الحقل مافهمته!! بليز ساعدوني كيف اسويه ؟؟
استفساري الثاني : انه الجدول لما احطه بوضع ادخال البيانات يطلعلي من اليسار الى اليمين !!!! و انا ابغى اجيبه بالعكس من اليمين الى اليسار و ماني عارفه فين الخيار حق دا الشي ؟؟ بليز قولولي فينه .؟؟

هذا المشاكل اللي واجهتني لغاية دحين و ان شاء مااوجه غيرها

مشكورييييييين مقدما

[حبوب الحبوب]

أهلا بيكي أختي

مرفق ملف ان شاء الله يفيدك

أما بالنسبة لاتجاه العربي اعتقدد لازم يكون الأكسس عربي عشان يكون بطريقة العرض اللي تبغيها

بالتوفيق

[الابتهالات]

مشكووووووووووووووور اخوي حبوب الحبوب جزاك الله الف خير بجد ماقصرت ساعدتني على حل هالنقطه..



بالنسبة للاكسس اللي انا استخدمه عربي !!! لكن يعرض الجدول من اليسار لليمين و انا ابغى اجيبه من اليمين وافتكر الاستاذه قالتلنا فيه رمز او طريقه تجيبه من اليمين بس للأسف مو فاكرتها اللي عنده فكره ياريت يفيدني لانه مطلوب في الواجب انه اجعلي اتجاه ورقه العمل من اليمين الى اليسار ؟؟

وسؤال ثاني كيف اغير لون خط الشبكه ؟؟ بصراحه دورت للخيار دا وماعرفت ؟؟؟

[حبوب الحبوب]

العفو أختي الحمد لله

بالنسبة لتغيير الإتجاه أول شي تروحي لخصائص النموذج العامة وتقدري تحصلي عليها بالضغط ضغطتين على طرف النموذج (مربع صغير في طرف النموذج على اليسار ) كما هو موضح في الملف المرفق

لما تدخلي على خصائص النموذج توجهي إلى Format موجودة في الجهة الخاصة بالخصائص أعلى ومن ثم توجهي إلى Orientation وغيريها إلى right to left .

بس اهم حاجة يجب انك تحذفي الحقول من النموذج وتعيدي وضعها مرة أخرى عشان يتم تطبيق التغيير .
بالنسبة لتغيير لون الشبكة والله حاولت أفعلها ما قدرت بس هي موجودة في الجزء الخاص بالتصميم Design وبعدين في شريط الأدوات تلاقي Grid و تختاري اللون .. بس حاولت أفعلها ما قدرت

بحاول وان شاء الله أكون أفدتك

[الابتهالات]

مشكوووووووووووووور اخوي والله ما قصرت
عرفت اسوي الجدول من اليمين الحمدلله
بجد بجد ماقصرت والصور اللي حطيتها بجد مررره توضح الله يوفقك دنيا واخره
لون الشبكه خلاص عرفته تسلم اخوي
وبالنسبه للنوذج ماجربت طريقتك دحين بجربها لكن افتكر الاستاذه قالت طريقه ثانيه انه نحدد ع اسم الحقل و نسحبه في الجهه الثانيه لين يصير في اليمين بدال اليسار
بس المشكله ماعرفت ماهو راضي ينسحب اسم الحقل لوحده !!!!! عشان يصير قبل الخانه اللي قدامه اللي هي نعبي فيها

[الابتهالات]

بكره ح امتحن

[حبوب الحبوب]

الله يبارك فيك ويسمع منك وشكرا على الدعوات الحلوة

على فكرة الطريقة اللي انت تقصديها ما أنصحك تستخدميها لأنها طريقة عقيمة لانك اذا استخدمتها وحاولت تستخدمي لوحة المفاتيح بدل الماوس عشان تتنقلي بين الحقول بتلاقي الحركة مش مضبوطة

عموما اذا تبغي تسويها بالطريقة اللي تقصديها أقولك عليها :
طبعا انت عارفة ان الحقل مكون من مربعين مربع لعنوان الحقل ومربع ثاني يتعبى فيه الحقل بالمعلومات ، لو تلاحظي فوق كل مربع على الجنب مربع صغير
حركي الماوس باتجاه دا المربع الصغير اللي في الطرف واضغطي واسحبي للجهة الثانية بكل بساطة

وان شاء الله تضبط معاكي .. بس الطريقة دي زي ما قلتلك مش بروفيشينال

واتمنالك التوفيق في كل امتحاناتك أن شاء الله

[الابتهالات]

ضبطت الحركه بس لما اختار نموذج فارغ اما باستخدام المعالج مستحيل الحقول ترضى تتحرك

[الابتهالات]

يسلمو حبوب الحبوب استفدت كثير منك والله
واليوم الامتحان كان حلو لكن لا يخلو من بعض الاشياء اللي لسه ماتأكدت منها للآن
ومشكووووووووووووووووور ع تعاونك وروحك الطيبهِ

[حبوب الحبوب]

العفو أختي لا شكر على واجب !!
آسف على التأخير في الرد ..
عموما الحمد لله على التوفيق وإن شاء الله تتم الامتحانات عليكي وعلى الجميع بكل التوفيق