~~ شــــــتــــــات ~~ ♥ مُصرهـ علـى قــراري ♥..

[مصره على قراري]

خلصت الحلقه
وبيجي غيرها
ونعيش ونموت
ولا شفنا شي من هالقرارات نتفذ .,!

مانبي فلوس ولا بذخ مع انو نقدر على هالشي كدوله من اغنى دول العالم


نبي كرامه

نبي هالمعاق اذا بغى يطلع من بيته لأي مكان
ماتهدر كرامته

وهو يطلب من فلان وفلان يساعدونه

حل المشكله مو مستحيل

لو مستحيل ماتجاوزتها الدول الثانيه

تعبنا واحنا نقول حسو فينا

عاملونا زين

عاملون على انا بشر مثلنا مثلكم

فئه غاليه على قلوبنا
ويوم عالمي للمعاقين

يجي هالمسؤول طاق البشت
ياخذله صورتين مع كم طفل معاق وقضينا

ما نبي صور شبعنا من هالاسلوب

يجون شباب معاقين لباب الوزير يطلبونه تفعيل قرار السيارات

وينذلون عند الابواب لا يرحمون حالهم ولا يرد هالكائن عليهم

ادارة الشؤون الاجتماعيه

تدخل كأنك تشحذ منهم
وان شافوك بشكل زين
قال وشوله مقدم على الأعانه خلها لغيرك

هي من جيبكم يوم تقولون كذا .,!

لازم اهبل بعمري عشان استحق اعانتكم الي ماتتجاوز 800 ريال .,!

اسماء معاقين تنزل على هالقرارت

وتصرف لهم كل هالخدمات

بس ما يشفون منها شي

وان ما طاردوا ورى السالفه يظلون يسحبون على اساميهم
فلوس من الدوله
ولا يوصلهم شي

تروح بجيوب الي جيوبهم تتسع لنهب البلد كله

مستشفى يابشر

مركز تأهيل شامل للمعاقين

المنزلق حقه لو سليم مشى عليه طاح وتكسر .,!!

يعني معاق قدرته الحركيه معدومه

سيطرته على عجلات الكرسي ضعيفه

بيقدر يسيطر على الكرسي مع هالمنزلق .,؟!

حالات بالعشرات كانت توصلنا اصابات كلها من هالمنزلق

هذي منزلقاتكم الي تتكلمون عنها .,؟! هذي تجهيزاتكم .,؟!

الشوارع - الاسواق - المرافق العامه

حتى بيت الله

حارمين هالفئه منه

والله المعاق يفكر مليون مره قبل ما يطلع من بيتهم

ويتصل على كذا شخص عشان يلقى واحد منهم يوافق يطلع معه

لهالمكان

بكندا تجربتي الشخصيه

اروح كل مكان المولات المكتبات المنتزهات

مستعده ادفع 100 الف ريال

لشخص يطلعلي عائق بأحد المرافق هناك المعاق مايقدر يتجاوزه

كرت مخصص لكل معاق
مكتوب عليه الاسم ودرجة الاعاقه

وكل كرت بلون

حتى المتروا

المواصلات العامه كلها

كنت اروح واجي لوحدي

ولا كنت اطلب من اي شخص يساعدني بأقل شي

حتى بالمواصلات الخاصه

كان هالكرت الي احمله يشمل تخفيض الاجره

كل الاماكن العامه في اشخاص متقنين لغة الاشاره

المنيو بالمطاعم بطريقة برايل للمكفوفين


هناك لما تقول هالمعاق كاسر حاجز الاعاقه ومتأقلم مع المجتمع

تقول هالجمله وانت واثق منها 100%

لكن هنا حتى لو حاولنا نكسر هالحاجز بينا وبين نفسنا

الجو ما يساعد

بكل تفصيل من يومنا نحس انو احنا عاله على غيرنا

وانّا اقل منهم

حتى لو بينا غير كذاا

نبي كرامتنا ترجعلنا


بس مدري متى بنعيش بكرامه