ماهي إجراءات سحب الملف ( إخلاء طرف )

[الأميرة ~]

السلام عليكم ورحمة الله وبركاته
كيف حالكم جميعاً ان شاء الله كويسين

أبغا أستفسر لو سمحتوا وش هي الإجراءات والخطوات اللازمة لسحب ملفي من الجامعه ؟ يعني فين أروح وفين أجي ؟
وهل يتم سحب الملف في يوم واحد ولا زم مشورة في الجامعة

+

عندي استفسار آخر أيضا
أنا طالبة سنة تحضيرية مسار علمي
سبق لي واعتذرت عن ثلاثه أترام
والآن أنا اواجه ظرف جدداً قاسي وأبغا أعتذر عن ترم رابع
رحت لعمادة القبول وقلتلهم أبغا أغتذر عن ترم ورفعوا طلبي
وعلى هذا الأسبوع انرفض الطلب
قالوا النظام يسمح بالإعتذار عن ثلاث أترام فقط وطلبي مرفوض ومستحيل
وقالولي روحي سوي اخلاء طرف

فإستفساري هو
بعد سحب ملفي وإخلاء الطرف هل بإمكاني التسجيل من جديد بعد ثلاث أشهر وأبدأ دراستي على الترم الثاني ولا لأ ؟
ولا لازم أسجل مع بداية السنه الجاية ؟ ( علماً اني من خريجات سنه 1431 - 1432 )
فهل راح يقبلوا تسجيلي على السنه الجاية

وهل من المفترض اني أعيد القدرات والتحصيلي ولا كيف ؟

انا الصراحة خايفة من سحب الملف جدددا وما عندي أي فكرة ايش أسوي
هل في حل آخر غير سحب الملف واني ما أداوم هذا الترم بس ؟


الله يسعدكم ويوفقكم جاوبوني بأسرع وقت
والله اني ضايقة ومحتاسة وفوق الظروف اللي عندي أحس دراستي راحت وسنوات عمري ضاعت
فالله يخليكم لا تبخلوا علي بـأجوبتكم ولو بشي بسيط من معرفتكم

والله يوفقكم وينجحكم ان شاء الله

[واحد مسكين]

الله يكون في عونك

اول شي اذا سحبتي ملفك مستحيل ترجعين تكملين دراستك من مكان ما وقفتي حتى لو انك في اخر تخرم في الجامعه اذا سحبتي ملفك خلاص كلوا يروح
ثاني شي ترا تهور انك تسحبي ملفك وترجعي مره ثاني لانو اول شي القبول في التحضيري القبول انتظام يشترط ان تكون شهادة الثانويه في نفس سنه التخرج او اللي قبلها
لكن
ممكن تنقبلين انتساب او تعليم عن بعد
انصحك بالتعليم عن بعد اذا ظروفك ما تسمح
واسف ع الاطاله والنكد لكن هاذي الحقيقه المررررررره
الواحد يدرس 12 سنه وفي الاخير يجيك قياس اللي دمر مستقبل شباب كثيييييير واذا سلمت من قياس ما تسلم من انظمه الجامعه العقيمه
والسلام

[منالH]

حبيبتي لو سويتي اخﻻء طرف ما راح تنقبلين انتظام

انا اشوف تحاولي تكوني أقوى من ظروفك و تكملي و راح تﻻقي في المنتدى ملخصات و أسئلة و فيديوهات تساعدك ان شاء الله
و لو مره ماتقدري اسحبي و كملي تعليم عن بعد احسن

و ابدا ﻻ تنقهري و تقولي عمري راح ، التعليم ماله عمر شوفيهم في الخمسين و فوق و يكملون دراستهم و مبسوطين و ناجحين ماتدرين وين خيرتك يمكن تأخيرك ذا ربي كاتب لك خير من وراه

اصبري و الله يوفقك و يسهل لك

[talal-m]

امممممم بالنسبة لاخلاء الطرف انا سجلت في ام القرى قبل عزوز المهم عزوز وقتها طلبت اخلاء طرف رحت مكه المهم انه اخلااء الطرف ذا كان فيه انه خلاص اذا سويت اخلااء طرف ما اقدر ارجع للجامعة نهائيا . ذا بالنسبة لـ ام القرى . جامعة عزوز يمكن تختلف وكمان اخلاء الطرف على طول ما ياخذ وقت.

الله يوفقك ويقويك ويكون في عونك واتمنى ما تسحبي :( حولي عن بعد زي ما يقولو

[dooda.lzooza]

حبيبتي انا اقلك عن تجربتي الشخصيه .. انا العام متخرجه من القنوي ودرست ترم واحد بس تحضيري و كنت حامل ورحت سويت اخلاء طرف طبعا تروحي العمادة ويعطونك ورقه لازم توقعيها الورقه فيها ثلاث توقيعات اول ترقيع من عندهم وبعدين الثاني من مبنى تاني تتوقع والتوقيع التالت برضو من بمبنى ثاني بس هما يدلومي و بعدين ترجعين للعماده وخلاص بيعتبروكي منسحبة وياخذو بطاقتك وكدا الممهم بعدين تسجلي السنه الجايا مو الترم التاني تسجلي من جديد تفتحي ملف ف موقع الجامعه و من اول وجديد انا فتحت و سجلت مره تانيه والحمدلله انقبلت انتظام وعلمي كمان عشان نسبتي عاليه م شالله بس طبعا الاولى حيقبولو اللي توهم متخرجين وبسسس واهوا انا ادرس دحين انتظام وعلمي ..

[الأميرة ~]

الله يسعدكم يارب على رودكم وتعاونكم معايا ~
مع اني زدت احباط اكثر ؛(

طيب هل ممكن انهم يقبلوني موازي السنة الجاية لو سحبت ملفي دحين ؟

[بحوور!]

ما أنصحك تسحبي ابدا رح تندمي كثير وشهادة الانتظام في توظيف أفضل من شهادة الانتساب وتعليم عن بعد ، وأخر شي أقوله استخيري الله الخير فيما اختره الله

و إخلاء طرف ما انصحك يا تكملي في الانتظام أو تقدري وهذا اخر اختيار تحولي تعليم عن بعد

أنا أنصحك تقرأ سورة البقرة و سورة يوسف ، وربي يوفقك وهمومك إن شاء الله ربي بيسرها ، لا تيأسي ابدا

عن أبي هريرة - رضي الله عنه - قال : قال النبي - صلى الله عليه وسلم - : يقول الله تعالى :
( أنا عند ظن عبدي بي ، وأنا معه إذا ذكرني ، فإن ذكرني في نفسه ذكرته في نفسي ، وإن ذكرني في ملإ ذكرته في ملإ خير منهم ،
وإن تقرب إلي بشبر تقربت إليه ذراعا، وإن تقرب إلي ذراعا تقربت إليه باعا ، وإن أتاني يمشي أتيته هرولة ) رواه البخاري ومسلم

[AlSAbEi]

الله يهدي بعض الاعضاء يفتون من راسهم.. شهادة الثانوية مدتها 3 سنوات والقدرات والتحصيلي واحد منهم سنتين والثاني 3 سنوات تأكدي من موقع قياس..

ولو سويتي اخلاء طرف تقدري تسجلي من جديد عادي بس تعيدي من الاول طبعا وبشرط تكون شهادة الثانوية ماعدت الثلاث سنوات..

وأفضل حل لك تروحي العمادة وتاخذي العلم من مصدره..

والله ييسر لك امورك ويفرجها عليك ..