استفسار عن جدول ومحاضرات تخصص انقليزي ( عنوان معدل )

[عبير منشي]

أولاً لا حول ولا قوة إلا بالله..
كل يوم اعرف أكثر من اليوم اللي قبله ليش جامعاتنا في ذيل قائمة تصنيف الجامعات على مستوى العالم أو حتى الخليج !

يا ناس.. ليش الجامعة تفتح منتديات اذا ماعندهم امكانية يجاوبوا الناس اللي يشق عليهم المشوار لمقر الجامعة أكثر من مرة ؟ مو مفروض يكون فيه من المشرفين او الادارة احد منسوب في الجامعة عشان يقدر يفيدنا وياخذ لنا أخبار مؤكدة عن امور نحتاجها ؟

انا اسبوعين رايحة جاية متمرمطة من مكة لجدة عشان موضوع الانتظام وبالأخير اترفضت وباخذ حقي من المديرة يوم القيامة ماابغى اطوّل كلام عن هالموضوع دحين.

الزبدة عندي كم سؤال كانتساب اصابعي نملت وانا اسأل فمنتدى الجامعة الرسمي ولا حياة لمن أنادي و هنا كمان اشوف اسئلة مشابهة لطالبات ومافي اجابات غير اي كلام !

والله تعبت من الروحة و ماعندي فلوس ليموزينات اكثر من كده ضاعت 1300 ريال فأسبوعين حق تكاسي حتى لو بروح مضطرة استنى اسبوعين الين يتوفر معايه مبلغ للتكاسي و المحاضرات حسب الاشاعات المتبادرة لنا بدون تأكيد لا من جهة رسمية ولا تقويم ولا أي أحد ... انها بتبدأ الاربعاء هذا !!

المهم أسئلتي :

1- متى تبدأ محاضرات الانتساب للمستوى الثالث طالبات كلية الاداب انقليزي؟

2- هل امتحان تحديد المستوى اللي امتحنوه طالبات الانتساب المتقدمات لتخصص انقليزي قبل اسبوع اجباري للكل حتى اللي معدلاتهم ممتازة ؟ أنا مادخلته لأن معدلي فوق أربعة. و جايبة في الانقليزي الترمين 98 و 94
كده مقبولة ولا اتكنسل قبولي ؟

3- في الاودس ايش معنى كلمة تسجيل اللي اشوفكم تتكلموا عنها ؟ تسجيل في الفصل الدراسي ولا تسجيل الحذف والاضافة ولاّ ايش بالضبط؟

4- فين راح يكون اختبارنا النهائي نحن طالبات الانتساب تخصص لغة انقليزية؟ في المقر الرئيسي للجامعة بالسليمانية أم الفيصلية أم أين ؟

5- ان كانت الإشاعات بأن المحاضرات تبدأ الاربعاء يعني بكرة 3-11 و احنا للآن ما نزلت لنا جداول ولا راحت عبارة تعليق الوضع من صفحاتنا في الاودس ولا سجلنا بسببها رغم اننا سددنا و رغم الفوضى المريعة في النظام لأن فيه ناس ما سددوا و مع ذلك نزلت لهم جداول !!

فكيف حيكون وضعنا؟ تفوتنا المحاضرات مو مشكلة لأنها مسجلة. لكن المشكلة اننا ممكن ننحرم من الترم لأن هالسنة غير عن التحضيرية هالسنة تحتاج تسجيل عند الاساتذة و حذف و اضافة فلما تبدأ المحاضرات بعد بكرة معناها راح الترم علينا أو في أسوأ الأحوال نحتاج إلى رحلة مرمطة جديدة في مبنى العمادة لتزبيط الوضع بعد ما فاتنا برغم عدم ذكرهم لمواعيد المحاضرات في التقويم ؟!

6- فيه كتالوج أو دليل مفردات أو أياً كان اسمه خاص برموز و أسماء و ارقام المرجعية لمواد قسم الانقليزي ؟ لأني تعبت وانا افرفر المنتدى وادور بين الصفحات القّط أي معلومة عن رموز المواد. ومو محصلة شي فمنتدى الانقليزي بهالخصوص.