وصفه مجربه لتكثيف الشعر

[الحـ العيوف ـلم]

السلام عليكم يا صبايا ياحلوين

عندي لكم وصفة نواه التمر لتكثيف الشعر وانا مجربتها000 وهالوصفه تعمل على أخفاء الفراغات الموجودة بالراس طبعاً الناس إلي شعرهم يتساقط بكثره
و الميزة الثانية ... أنه يعمل كسماد لتغذية بصيلة الشعرة
الكل منا يعرف نواه التمر((العبس))
تجمعين لك جمعه ماهي بقليله على حسب مساحة رأسك يعني ما سبعه حبات الى 15 حبه كحد أدني
تغسلينهم زين من لكوك سكر التمر وبعد كذا تحمسينهم لين ما يصير لونهم أسود أو لون بني غامق كلون النسكافه بعد كذا تدقينه بيد النجر((الهاون)) وتطحنينه بالطاحونه وتنخلينه لين ما يصير نااااااااااااااعم بعد كذا افركيه بفروه راسك فقط أما بالماء او بأي نوع من أنواع الزيوت ماعدا زيت الزيتون لانه حار على جذور الشعر ويمكن يجيب نتيجه عكسي وبعد كذا اغسليه 000داومي على هالشئ بالأسبوع مرتين أو مره على حسب نشاطك ولفتره من الزمن وعاد على حسب نمو شعرك بتظهر النتيجه ومن عندي تحريها من شهرين لين ست شهور وإذا لاحظتي طلوع الشعيرات على شعرك ذيك الساعه ما أقولك اتركي وصفتي لكن مع الوصفه حاولي تداومين كمان على الزيوت التي تطول الشعر وترعين شعرك من ذيك اللحظه 000وأتركوا عنكم الصبغات والمييش اللي من دخلت علينا وماشفنا خير انعدمت شعورنا000ذيك الشعور اللى كانت مضرب للأمثال وشعر الشعراء


كمان فيه وصفه ثانيه تجنن وتهبل تبان بساعتها عقب الطلوع من الحمام((طبعا اللى يبان نعومه الشعره وحيويتها أم كثافة الشعر راح يبان عقب حين))
وهي الحقيقه عبارة عن خلطه كمان تعتمد على نواة التمر وهي ُُُثلاث ملاعق سدر مطحون+ كاس ونصف مويه + ملعقة محلب + ملعقة نوى تمر مطحون
تغلى المقادير على النار ثم تترك لتبرد ثم توضع في قاروره وتضاف اليها ملعقه صغيره حبة سوداء وتوضع في الثلاجه وتستعمل مرتين في الأسبوع

هذي الخلطات مو بس ممكن يستفيد منها البنات كمان الشباب بس بشرط انه مايكون الصلع صفه وراثيه بالعيله من قبله لانه ما اعتقد هالوصفه تقدر تتدخل بأشياء بالوراثه زي كذا


وإذا لقيتوا نتيجه حلوه يابنات بشروني000بس الله يعين من شمس هالجامعه اللى ما تخلي الواحد يقدر يعتني بنفسه ويعدل من شكله ويحتفظ بكم صفه حلوه فيه