هذا اللي صار معي في اختبار معيدة علم النفس (( حسبي الله ونعم الوكيل ))

[آناستاشيا]

بسم الله الرحمن الرحيم

السلام عليكم و رحمة الله و بركاته

أختكم في الله دخلت اختبار المفاضله لمعيده علم النفس

كان كل شيء تمام إلى أن دخلت قاعة الأختبار اللي كان مدرج
كان ترتيب مقعدي الثاني وكان بجانبي ممر
جلست قدمي يعني في المقعد الأول بنت <-- طبعاً الموقف إلى الآن مافيه شيء

كان مراقبات الاختبار 3 أستاذات مصريات
وحده فقط اللي أعرفها يعني كانت في لمن كنت أدرس علم نفس في الجامعه
و الاستاذتين الثانيتين كانوا جدد
وحده من الأستاذات الجدد جات قبل توزيع الأوراق عند البنت اللي قدامي وجلست تتكلم معاها كانها تعرفها ..
و تقولها بمعنى الكلام (( جاهزه للامتحان ؟؟)) يعني تطمئن عليها ..
بصراحه أنا استغربت و بغيت أشتكي لأني شكيت أنو تعرفها من طريقة الكلام

بس قلت لا يا بنت أن بعض الظن أثم ...يمكن ما بينهم شيء ...
طبعاً سلمونا الأوراق ...
و بدينا حل ...
الحمد لله كانت الأسئله جداً سهله ...
و حليت و لله الحمد كويس
الساعه عشر و أربع دقايق بالضبط خلصت حل ما شاء الله تبارك
قلت للاستاذه أني أبغى أخرج ...
قالت لي عشر و نص الخروج أقعدي راجعي ...
بصراحه ما رجعت قلت شوي أراجع و قعدت أتفرج في القاعه ..
<--- ملقوفه
شوي كذا الأستاذه اللي كانت تكلم البنت اللي قدامي
جات لنفس البنت يعني اللي قدامي
و جلست تناقشها في أجوبتها و تأشر بيدها على إجابات و تقولها لا تشخمطين كثير
أنا في لاحظتها قدمت و تكيت على طاولتي وبحلقت عيني في الأستاذه (( بمعنى أنتي ايش قاعده تسوين ؟))
قامت الاستاذه سألتني : خلصتي امتحان ؟
قلتها / ايوه
رجعت سألتني خلصت متحان ؟
قلتها ايوه
قالت ماشاء الله ...
و جت عند ورقتي وقفت و قالت لي : طب خلينا أشوف أذا أجاباتك صح
طبعاً أنا كنت --->

فتحت الصفحه الأولى : و طلت فيها و قالت : ما شاء الله و أشرت بيدها بمعنى كويس

فتحت الصفحه الثانيه و الثالثه اللي كانت اختياري و هي تهز رأسها بعمنى كويس
و سألتني : أنتي علم نفس <-- عليها سؤال ذكي يعني وحده مقدمه على اختبار معيده علم نفس يعني ايش يكون تخصصها ؟
قتلها بكل تقه : ايوه
المهم فتحت الصفحه اللي بعدها اللي كان فيها سؤال :
كان عمر أحمد الزمني 10 سنوات و عمره العقلي 12 سنه فكم يكون نسبة ذكائه ؟
أنا جاوبت طبعاً 120 من الخيارات اللي هو كان الخيار ج
قالت لي : لا و أشرت على د يعني على نسبة 83
قتلها كيف
قالت أوص لا تفضحينا بعدين يعرفون أني أغششك
و راحت ...!!

أنا اشرت على د و مسحت أجابتي من ج
بس ما كنت مقتنعه
طلعت جوالي و قعدت أحسب
العمر العقلي قسمة العمر الزمني على 100
يعني 12÷10 ×100= 120
يعني أجابتي صح ...طيب كيف الأستاذه تقولي صححيها ..
قلت أمكن أن ملخبطه يمكن هيا العمر الزمني ÷ العمر العقلي ×100
يعني 10÷12×100= 83
طيب يا ربي أيت صح ..
أنا ولا الأستاذه ...
و قعدت أفكر و أفكر و أفكر ..
أنا مقتنعه بإجاباتي و منطقياً الطفل ذكي
يعني مستحيل الأجابه تكون 83 لأنها تعني أني منخفض الذكاء
بس هو عمره العقلي أكثر من عمره الزمني
يعني ذكي ..
طيب الأستاذه ليش قالت لي أغير الأجابه ...
معقوله عشان كفشتها و هي تغشش البنت اللي قدامي
لالالالالا مو معقوله ...
طيب أنا مقتنعه بإجابتي و حاسه أنو الأستاذه سوت في منكح ..
و جلست فتره و انا أفكر ..
إلى أن استقريت على أنو أخلي الأجابه اللي أشرت عليها ألأستاذه ...
<-- طبعاُ من غبائي ..
يعني قلت يمكن أنا غلطانه في ترتيب المعادله
مع أنو عقلي يقول الطفل ذكي
و حسي يقول أنو الأستاذه خدعتني

و رجعت البيت ...
و فتحت على القاعده
و لقيت أنو إجابتي كانت صح ..
و أنو الأجابه اللي اشرت عليها الأستاذه و بعدين أن ااخترتها بناء على كلام الأستاذه
كانت خطأ

بصراحه انقهرت ...
مره انقهرت يعني ليش تسوي فيني كذا ..
أنا ما همني اذا زدت درجه في الأختبار أو لا
بس انقهرت لأني ما سمعت كلام عقلي ..
و صدقت أنسانه كانت جالسه تغشش وحده قدامي ...

حسبي الله ونعم الوكيل ...

أنا أعرف استاذات كثيرات في علم النفس و يعرفوني
و كانوا جداً نزيهات ..
بس لكل قاعده شواذ ...

الله يعوضني عواض خير

[miss lulu]

ان شاء الله ربي يعوضك خير


من جد موقف مره ينرفـــــــــــــــــــــــــز



لو انا كنت مكانك راح جد اتجنن في التفكير هيا اللي صح ولا انــــــــــا



ويعطيك الف عافيه ع ذكرك للموقف درس كلنا ان شاء الله نتعلم منو


مره تانية يارب يعوضك خير


ولا تنسي " حسبي الله ونعم الوكيل " تكيفك عن أي دعاء


واللهم أجرني في مصيبتي وأخلف لي خيراً منهـــــــــــــا


ويارب يوفقك ويسهلك كل امورك

[smile flower]

ان شاء الله تكوني مقبولة وما تضرك هذي الدرجة
موفقة ان شاء الله

[مكتوم777]

طيب يمكن تبغى تشوف انتي عندك ثقة بنفسك وإلا لا

[آناستاشيا]

أختي مكله بلا مملكه ...
عذراً بس راح أدرج رسالتك هنا و راح أرد عليها من هنا لأني ما أقدر أرد عليك بالرسائل

مساء الخير .. انا كمان كنت معاكي في القاعة .. بدي اسألك البنت الي كانت تغششها الأستاذة لون بلوزتها فوشي ولى أخضر لبني ؟؟ لأنه شكيت بذول الاثنين لأنهم موظفات في الشؤون في قسم الاستشارات النفسية .

بصراحه ناسيه لون البلوزه بس اللي متذكرته أنها كانت سمينه ...
بس كم رقم قاعتك لأني بتأكد ؟
و هل لاحظتي تغشيش ...؟!!

تقدرين تردين هنا أو في الرسائل الخاصه ..

بس أعذريني أنا ما أقدر أرد بالرسائل لسع ما تفعلت عندي

[غدا نلتقي]

ما أقول إلا حسبنا الله ونعم الوكيل ..

[ملكة بلا مملكه]

في الغرفة الي كانوا فيها 3 دكتورات مصريات (201 )..لاحظت موضوع الوشوشة بس ماضل بالي معاهم لأني كنت مصدومة بالأسئلة وشايلة هم كل غلطة ... الله لايضيع لنا تعب يارب ...

[R&R&R]

الله لا يضيع لكم تعب ويرزقكم الرزق الحلال

[الحالمة 2010]

تصدقوا حتى انا لاحظت هذا الشي انه الاستاذة تغشش البنت و جالست اغالط نفسي لانه كنت جالسة جمبها قدام
حسبي الله و نعم الوكيل فيهم

[shada_Ak]

سألتني : أنتي علم نفس <-- عليها سؤال ذكي يعني وحده مقدمه على اختبار معيده علم نفس يعني ايش يكون تخصصها ؟ قتلها بكل تقه : ايوه

من السؤال دا الفروض ما تاخدي بكلامها

يلا معوضه خير يارب في السؤال

والله يكتبلك القبول