الكل يدخل.... ابغى اسحب ملفي وارجع....

[rubi]

السلام عليكم


حابة اخد رايكم في شي

وما خاب من استشار

انا من دفعة 09 وليا سنتين احول ارفع معدلي

ارتفع نهاية اول سنة بس مو لدرجة اني احول انتظام

دي السنة حاولت ارفعو وعالترم التاني *اللي هوا دا *
للاسف نزل نتيجة خطا مني في اضافة المواد والساعات وبدات مزاكرة بدرري بالتالي على ليلة الاختبار انسدت نفسي عن المزاكرة مرة

المهم نزل المعدل بطريقة محبطة جدا جدا جدا

خصوصا طريقة تصحيح الاستازة نجاح سلامة لمادة ادارة المبيعات اخدتها كمادة اختيارية لرفع المعدل

وحليت والاسالة سهلة

وافاجا بان الدرجة ........ 60

الحمدلله على كل حال

فا انا افكر اني اسحب ملفي وارجع تاني تحضيري وطبعا حيكون سهل بالنسبالي بعد ما اخدت المواد الصعبة دحين

وبعدها باذن الله احول انتظام

سؤالي
ايش رايكم في اللي كتبتو فوق؟
اسحب ملفي ولا اكمل وانا معدلي واطي واتخرج ومكتوب عالشهادة انتسااااااااب وماقدر انقبل فاي وظيفة
عشان كلمة الانتساب دي


بانتظار الردود بكل انواعها





روبي

[عآآآدل]

عليكم السلالالالام


أول شي أنتي معديه سنتين يعن باقي لك سنتين وهذي نصف المشوار تقريبا

اذا بديتي من جديد يعني أول شي بتتأخرين سنتين لأنك بتبدين من الجديد .. الشي الثاني قيمة السنتين الي بتعيدينها كل ترم 3 الاف ريال يعني سنتين بـ 12 ألف ريال أنا من رأيي لو تستفيدين من هالمبلغ بمدرسات خصوصيات للمواد الصعبه في رفع المعدل بيكون أفضل لك من البدء من نقطة الصفر


وجهة نظر

[الــوان الـــطيف]

والله اختي من وجهة نظري انك تكملي وتتوكلي على الله
ومين اللي قالك ان شهادة الانتساب منبوذه ؟؟؟

واستخيري ماخاب من استخار

[rubi]

المشاركة الأصلية كتبت بواسطة الــوان الـــطيف والله اختي من وجهة نظري انك تكملي وتتوكلي على الله ومين اللي قالك ان شهادة الانتساب منبوذه ؟؟؟ واستخيري ماخاب من استخار

ليش اكمل برايك

يعني ايش الاحسن

المتخرجة من جامعة ومعدلها واطي وانتساب بس عمرها الطبيعي

ولا الكبيرة عن عمرها 3 سنين ومتخرجة انتظام ومعدل يشرف

[اقتصادي غلبان]

والله يا اختي على قولتهم you have a point
يعني وجهة نظرك مقنعه بالنسبه لي (وقد تكون غير مقنعه لاشخاص اخرين) في حكاية تفضيل التأخير سنتين في سبيل انك تكوني انتظام ولو كنت مكانك راح افكر نفس تفكيرك وبقول كل تأخيره فيها خيره لكن بشرط اني اكون اخذت عهد على نفسي بأني اشد حيلي في كل المواد واجيب معدل كويس واحول انتظام مو بس اعيد وبعدها تتكرر نفس الغلطه
اهم شي استخيري قبل كل شي واسألي في الجامعه عن هالوضع وهل ممكن يقبلون فيه قبل تقدمين على اي خطوه وتذكري انك بتقدمين على خطوه جريئه ومو سهله ابداً
اخوك اقتصادي

[كِل التفاصيل]

لااااااااا ثم لاااااااااااا ثم لاااااااااااااااااا اللي بتفكري فيه


دام عندك 4 سميسترات يعني يمديكي ترفعي معدلك فيها


او خليها على 5 سميسترات يعني خودي كل ترم 5 او4 مواد عشان ترفعي معدلك



وبعد ماتتخرجي روحي قدمي على بعثه <<طبعا على حسب ظروفك او رضا اهلك




شو رايك بكلاااميي..^^

[rubi]

المشاركة الأصلية كتبت بواسطة كِل التفاصيل لااااااااا ثم لاااااااااااا ثم لاااااااااااااااااا اللي بتفكري فيه دام عندك 4 سميسترات يعني يمديكي ترفعي معدلك فيها او خليها على 5 سميسترات يعني خودي كل ترم 5 او4 مواد عشان ترفعي معدلك وبعد ماتتخرجي روحي قدمي على بعثه <<طبعا على حسب ظروفك او رضا اهلك شو رايك بكلاااميي..^^

حبيبتي
انا ايقنت ان الاستازات ما يصححو اوراق بنات الانتساب بضمير

وتوزيع الدرجات زي الــ,,,,,,,,

غير كداانا شفت شخصيا ناس انتساب في اخر سمستر يبغوا يضيفو مواد عشان خلاص يتخرجو

ما يسمحولهم ويخلوهم يدفعو لسمستر تاني على مادتين

اتخيلي

فالنهاية الحكاية مو فلوس
حكاية مستقبل

وانا شاااااكرة ليكي ردك من جد

بالنسبة للماستر مادري ازا في للانتساب واغلب الكلام اللي سمعتو انو مافي

كمان مهما حاولت ارفع معدلي دا ماتوقع حاوصل للمعدل اللي قد تعبي

انتظر مزيد من اراء الاعضاء اللي اعتبرهم اخواني واخواتي بجد

[حماده909]

لا تفكري تسحبي ولا شي

واصلي وحاولي ترفعى وتجتهدي
يعنى اللى في البدايات ودهم يصولوا مستواكي الرابع
( بالعربي افصلي الريوس ) مادري حتفهميها ولا لا
يعنى بس على طول لاتفكرى ترجعي وراء
وبعدين ابغى اعرف كم المعدل اذا مافي احراج
وراح اقولها على الملأ قصتى مع المعدل كيف كان وصار الحمد لله
بس اعرف انتى كم معدلك عشان اقيس على الوضع اللي كنت فيه

[rubi]

طيب انت موجود دحين؟ عشانو اقولو واحذف المشاركة

[حماده909]

موجود