خبصنا وجبنا العيد يايلدرم

[يلدرم]

السلام عليكم

قبل اكثر من ثلاثة شهور كنا مع بعض في المنتدى وكان الجميع في عز قلقه بسبب انتظار نتائج القبول

واذكر كنت اقول لكم مقولتي المشهورة

( فترة القبول مثل الزكام مرحله وتعدي )

وبعد نزولها اترسمت الفرحة على البعض وغضب البعض من الجامعة

كانت هناك تصفيه للاعداد الكبيرة المتقدمه وهذا شئ طبيعي في اي مجال

بدأ الطلبة سنتهم التحضيرية بكل تفائل وانبسطوا بالجامعة ومافيها من تكوين صداقات جديده ونظام خروجها ودخولها لكن فجأه صدموا باسلوب بعض الدكاترة والاختبارات

الجامعة بحر كبير والدكتور او الدكتورة غير ملزم اصلا بأي شئ غير يعطيك محتوى المنهج وانت وشطارتك يعنى لازم تتعلم تسبح ولا راح تغرق و اذاغرقت راح تغرق لوحدك بس

لا يجي واحد يقول الدكتور بيأخد فلوس من الدولة ووو

هذا واقع في كثير من الدول مو عندنا بس
راح تمروا بدكاترة زي العسل سواء شرح ممتاز وتعامل حلو يحسسك بإن ابوك معاك في الجامعة

وممكن درجات حلوه كمان

اما العكس فأنتو راح تكتشفوه بنفسكم

انا مررت بتجربتكم قبل سنين وجا بعدي اتنين من اخواني ومروا بنفس ظروفكم

صح ماعندهم سنة تحضيرية ولكن الشخص من بدري يايدخل الكلية اللي يبغاها ياكلية اخرى ليست في مستوى طموحه ويجلس يدرس سنة عشان يجيب معدل عالي ويحول كليته وتواجهه ظروف الدراسة ووممكن يحول وممكن لا

واذا دخل الكلية اللي سمع انها ممتازه وكل الناس تمدحها وعند بداية الدراسة يقول انتو قلتو ادخلها

اخوايا الصغير دخل كليتي وفي نص الترم الاول كان مجنن البيت كله الا يحول كلية .... ( كل اصحابه هناك وجداولهم وناسه ومايجي الظهر الا هو في البيت مو زي طلاب الهندسة كرف من 8 الصباح لحد العصرية
ويرجعو ووراهم بلاوي فوق راسهم لازم يغلقوها

الان في سنة تانية والحمدلله اتعدل الوضع واتعود على الضغوط ويكلمني عن التخصصات وايش هو يبغى يدرس

الجامعة كلها صعوبات وكل واحد راح يمر بظروف الله يعلم بيها لكن لازم يتحمل

انا أسألكم هل المناهج الدراسية صعبة؟ هل فيه مادة عمركم مادرستوا مبادئها؟

انا اذكر مواد سنة العلوم الطبيعية للعام الماضي وكانت سنة تحضيرية بشكل مصغر نوعا ما

رياضيات 100 وفيزياء 100 ومهارات اتصال 101 وثقافة101

دي كلها يدرسوها اخواننا الصغار في الثانوي كلها مواد عامة

انا كتبت الموضوع دا مو بس عشانك ولا عشانها

انا كتبته عشان اهليكم اللي ينتظروا منكم النتائج بفارغ الصبر

التخبيص في مادة او مادتين مو نهاية المشوار
اهاليكم ينتظروا نجاحكم

واذا على الطب او غيرها من الكليات اللي يبغوها الطلبة فأنا ليا اقارب من الجنسين جابوا اعلى النسب في الثانوية ومادخلوها لأن الموضوع نصيب

الجامعة مرحله من مراحل العمر والله أحلى مرحله مريت بيها فيها فرح وحزن فيها راحة وضغط فيها اتعرفت على اعز اصحابي وفيها عرفت مين انا

انا رقمي الجامعي يبدأ ب03 <<<< ايش الغبار اللي طلع دا
والان بعد التخرج الحمدلله راضي عن الشئ اللي سويته

اصحابي كلهم اتخرجو زي هندسة وطب وحاسبات واقتصاد

الكل بيشتغل وكل واحد أخد رزقه واتعرضنا لنفس ظروفكم ونفس الدكاترة اختبرنا عندهم
المطلوب الان المذاكرة وعدم الاحباط

اللي يبغى يشارك الله يحيه واللي مايبغى يشارك برضو الله يحييه ورجاء ماابغى تجريح في أي احد والموضوع لمناقشة الاشياء اللي تساهم في ازاله الاحباط والتفرغ للاجتهاد

ياريت اي احد يشارك يذكر اذا عنده اخ او اخت سبقوه في الجامعة

قفله:

المشاركة الأصلية كتبت بواسطة عـ.~.ـريكـ‘هـ وين النظام وربي البترول تحس إنك بني آدم وانت تدرس مافي الخرابيط والتفاهات حقت الجامعه هذي

طيب لا تدف
جامعتنا احسن جامعة في العالم

[kojak]

الصراحة يلدرم

البترول أحسن مليون مرة من عزوووووووووز

بس عاد ما جانا قبول إيش نسوي

[يلدرم]

المشاركة الأصلية كتبت بواسطة kojak الصراحة يلدرم البترول أحسن مليون مرة من عزوووووووووز بس عاد ما جانا قبول إيش نسوي

احسن في أي بالضبط؟

اذا على الوظائف

انا ليا اصحابي في افضل الشركات ارامكو وسابك وغيرها

وفيها سنة تحضيرية

[M!Ss AmoOoLa]

موووووضوعك مره حلووو

ريح قلبي الله يريح قلبك

يلدرم يا 03هع ترى الجآمعه يمكن في وقتكم كانت اسهل
يعني انا اخوي كان هندسه قبلك بسنه يعني 02خخ المهم ماعمره اشتكى من الجآمعه وكان مبسووط
اختي الكبيره كانت بايوك والله كانت فالتهااااااا وماتذاكر وكانت تجيب درجآآآت عاليه
وفي الأخير معدلها عالي مشاءالله

[عـ.~.ـريكـ‘هـ]

أفااااا يلدرم قاعدلي ع الكلمة ها إيش حا لو ما ابغى ادخل ميكانيكا زيك هههههههههههههههه

انا كنت قصدي لما كتبت كذ1 إنو ماتحس نفسك ضايع يعني تحس إنك في جامعه صح مثلا لما كنا نختبر أحياء ؟؟؟؟ ومحنا عارفين فين القاعه وقعدت ادور ربع ساعه ؟؟؟؟؟ ماعجبني الوضع بس في الأخير صارت تعجبني

بس ما انكر إني حبيت الجامعه هذي أكثر من امي < هههههههههههه بالله

[يلدرم]

المشاركة الأصلية كتبت بواسطة غروور موووووضوعك مره حلووو ريح قلبي الله يريح قلبك يلدرم يا 03هع ترى الجآمعه يمكن في وقتكم كانت اسهل يعني انا اخوي كان هندسه قبلك بسنه يعني 02خخ المهم ماعمره اشتكى من الجآمعه وكان مبسووط اختي الكبيره كانت بايوك والله كانت فالتهااااااا وماتذاكر وكانت تجيب درجآآآت عاليه وفي الأخير معدلها عالي مشاءالله

والله الدوافير ماشاء الله متواجدين في كل وقت ولا علاقه للدفرنه بالجامعة وشوفي عندنا اعضاء من الشطار ماشاء الله اتخرجوا بمعدلات وشهادات امتياز

اما انا والله اتشخمطت شخمطه مو طبيعية في الجامعة بس الحمدلله معدلي طيب

وبرغم كدا احبها والله وصراحة اضايق لمن احد يقول عنها الفاظ مهي جيدة

هيا فتحت عيوني على الدنيا وصرت ادخل على عميد عمادة ولا وكيل او حتى رئيس قسمي ومااخاف من شئ بس كل شئ بالأدب يجي

كفاية سنة كامله جلست فيها بس عشان مشروع التخرج فقط مع دكتوري الباكستاني الله يذكره بالخير ويسامحه وجبت في المشروع +a

لا تخليني اقول كم ابو جلمبو اخدت فيها

وبرغم كدا كنت ماأفوت ولا ترم صيفي حتى ايام كأس العالم الاخيرة كان عندي في الصيف تدريب في احدى الشركات من الصباح للعصر وبعد المغرب مسجل في مادة دراسيه واتفرج المباريات كمان

يووووووووووووه جات عليا أترام أسهر في الكلية لصلاة الفجر والأمن يكون قفل ابواب الكلية علينا ونتصل عليهم بتلفون الطوارئ ( طبعا مسموح لنا من ادارة الكلية الجلوس في الكلية لوقت متأخر) وارجع للبيت في شمال جدة وطريق الحرمين مافيه أحد , انام في البيت والدوام الساعة 8 الصباح يعنى هيا بالقوة ساعتين او ثلاثة ساعات نوم

طبعا أهلي ماكانو يعرفو بدا الشئ لأني كنت ماأحب أبين لهم خصوصا أمي

بس يوم من الايام انكفشت من ابويا

كان خارج يصلي الفجر وانا دوبي داخل البيت وفي اليوم التاني يقول اعترف فين كنت امس لحد الفجر؟

قول الحقيقة وماراح أزعل منك وكان يضحك ويقول لا تكون اتزوجت عرفي من ورانا

انا وامك درسنا في الجامعة وماكنا نجي اخر الليالي بس الحمدلله اعمامي مهندسيين وشرحو له

وماانكر اني جات فترات اضايق من الكلية وأقول في نفسي اللي دخلو التخصصات النظرية مرتاحين وانا تعبان نفسيا وجهد وتعب والله فيه اترام سببت ليا ارهاق جسدي لكن عندي هدف ولازم احققه

واللي يتعب يحس بحلاوة الشئ اللي حققه عند التخرج و كل شئ يبقى ذكرى فلا تتضايقوا كل اللي تمروا بيه شئ طبيعي جدا لحد يقول خلاص فشلت والدكاترة السبب

اخي اللي اصغر مني درس في كلية نظرية دخل الجامعة بعدي واتخرج قبلي بترم كان يقول ليا والله انا اتخرجت وماحسيت بطعم التخرج لاني ماتعبت زي تعبك

انا أخفيت عن اهلي موعد استلام وثيقة التخرج ورحت استلمتها ورجعت وكان ابويا وامي جالسين يتفرجوا تلفزيون وامي كانت بتغمس الشابورة في الشاهي
طبعا صراحة اكيد الواحد يكون مبسوط ومايقدر يخبي فرحته فمن بعيد شافني ابويا وبانت الابتسامة على وجهه وكأنه عرف اني جي ومعايا الوثيقة وسلمت عليه واعطيته الوثيقة وامي سابت الشابورة والشاهي وقامت حضنتني

ليا رجعه عن الاختبارات وصعوبتها ومواقفي مع الدكاترة

الكلمة اللي بالاحمر مافهمت معناها هل اختصار للكيمياء الحيوية ياغرور

[كيتا الكتكوته]

يلدرم الموضوع مرررره روعه
يا سيدي انا بابا رافض فكره سفري لجامعه بره المملكه مؤقتا
(وهوا بروفيسور في الجامعه دي)وشايف انها احسن جامعه في السعوديه
والجامعه مهي وحشه بس في دكاتره الله عالم بحالهم
والمشكله اننا بندرس 12 سنه عربي ولمن جينا على ابواب المستقبل كل شي سار صعب
مع كل المشاكل الي واجهتني انا مررره مبسوطه في الجامعه
تقبل مروري

[طقوس ..~]

اشكرك يا يلدرم بصراحه اسلوب وذوق ما شاء الله

الله يريحلك قلبك يا شيخ

خلاص هذا نصيبنا وانا تقريبا تعودت على الوضع

فى البدايه كنت مصدومه مرا مرا

عشان المجتمع غير وعشان المناهج صعبه وكلها انجليش

لكن خلاص لازم نرضى ونحمد الله ونشكره

انا عندى اختى صيدله تقريبا اخذت نفس اللى قاعدين ناخذه

لكن هما عطوهم كورس 6 اسابيع انجليش وبعدين بدؤو معاهم مناهج

فى اول سنه تعبت لكن بعدين ما شاء الله صارت شاااااااااااااااااطره مع انها ماتذاكر الا وقت الاختبارات

عموما ربى يحلها ان شاء الله

ويارب بس متى اتخرج

هع


يسلمووو

[M!Ss AmoOoLa]

أذكر العآم كنت مره متعقد من الدكتور البآكستاني لانه سافر ههههه
وكمان ليلة المناقشه كان عندي اختبار فيزياء 101 جلست ادعيلك وانا اذاكر==>عشان كذا اخذت a+
وشريط الإهدائات كلها دعواي لكـ

....

الكلمة اللي بالاحمر مافهمت معناها هل اختصار للكيمياء الحيوية ياغرور

أيووهـ

ليا رجعه عن الاختبارات وصعوبتها ومواقفي مع الدكاترة

ننتظر:)

[يلدرم]

المشاركة الأصلية كتبت بواسطة عـ.~.ـريكـ‘هـ أفااااا يلدرم قاعدلي ع الكلمة ها إيش حا لو ما ابغى ادخل ميكانيكا زيك هههههههههههههههه انا كنت قصدي لما كتبت كذ1 إنو ماتحس نفسك ضايع يعني تحس إنك في جامعه صح مثلا لما كنا نختبر أحياء ؟؟؟؟ ومحنا عارفين فين القاعه وقعدت ادور ربع ساعه ؟؟؟؟؟ ماعجبني الوضع بس في الأخير صارت تعجبني بس ما انكر إني حبيت الجامعه هذي أكثر من امي < هههههههههههه بالله

ياولدي فكر اول كيف تدخل الهندسة وبعدها ولا يهمك نساعدك لان في المنتدى 3 مشرفيين من طلاب الهندسة

المشاركة الأصلية كتبت بواسطة كيتا الكتكوته يلدرم الموضوع مرررره روعه يا سيدي انا بابا رافض فكره سفري لجامعه بره المملكه مؤقتا (وهوا بروفيسور في الجامعه دي)وشايف انها احسن جامعه في السعوديه والجامعه مهي وحشه بس في دكاتره الله عالم بحالهم والمشكله اننا بندرس 12 سنه عربي ولمن جينا على ابواب المستقبل كل شي سار صعب مع كل المشاكل الي واجهتني انا مررره مبسوطه في الجامعه تقبل مروري

حركات معانا بنت بروفيسور

طبعا البروفيسور مسماه استاذ دكتور وهو اعلى مرتبة في الدكتره

بعدين ايش تسافري بره البلد يابنتي

هو انت هنا فالحه عشان تطلعي بره<<<< راح ينضرب

بالنسبة لمشكله اللغة الانجليزية فمع التعواد راح تكون سهله ان شاء الله

التكرار يعلم الشطار