طالبة انتساب مستوى ثالث .. احتاج مساعدتكم =(

[Dodo66]

السلآم عليكم

انا مستوى ثالث في ادارة الخدمات الصحيه انتساب

جدولي لما نزل 6 مواد
ما غيرت فيه شي

الاداره العامه
علوم سياسيه
القانون
اقتصاد جزئي
محاسبه
ثقافه اسلاميه 201


ما اعرف حسيتها كثيره شويه :(
مع اني نفسي اخذها كلها لانها مبادئ

للي عندهم خبره ايش تنصحوني؟؟

اتوكل على الله واخذها كلها ولا احذف ماده؟؟

واذا احذف .. ايش هيا المادة اللي ممكن اخذها بعدين وما تأثر عالسمستر الجاي؟؟


لاني بكل صراحه تورطت مع مادة الادارة العامه مع الدكتوره خديجة ضباب ونفسي احذفها
الله يهديها سريعه بالشرح ولما نسألها ما ترد على احد.. وكلنا مضيعين معاها :(

وما يمديني اغير الشعب كلها فل
حتى اني حذفت الثقافه عشان اشوف شعبه فاضيه بالادره ع نفس الوقت بس برضو مافي :(



ياليت تساعدوني

واكون شاكره لكم..

[back2]

وعليكم السلام ورحمة الله وبركاته

أخت Dodo66 جدولك حسب الخطة المرسومة من القسم مافيه مشكلة عندك
وإحساسك إنها كثيرة تراها 6 مواد ( 17 ) ساعة فقط يعني ولا شي

وأنتي ماشاء الله عليك تقدرين تأخذين 18 ساعة كاملة وهذا أفضل لك .
أما بالنسبة لكلامك بتحذف مادة علشان ما أعجبتك الدكتوره ... هذا الكلام م/ش في صالحك أبداً .وم/ب منطقي .
لكن إقتراح بسيط ..
لو تحذف مادة مبادئ العلوم السياسية PS 101 وتعوضين عنها مادة اللغة العربية ARAB201 لأن مبادئ العلوم السياسة ليس لها متطلبات في الأترام الجاية وتنزلينها على راحتك في أي ترم .
وشدي حيلك وبالتوفيق للجميع ؛؛؛؛؛


ودمتم بود ومحبة ؛؛؛؛؛؛؛؛؛؛؛؛؛

[نايف الاسلمي]

انا ارى حذف ماده القانون لانها معقده باستااذها

[جمهور الشمس]

انا رائي مثل راي اخوي باكيت 2 يعني احذفي العلوم السياسية ل الترم الجاي واضيفي مادة التحرير الكتابي إلي هو العربي 2 .
اما حكاية تحذفين القانون هذا قرار خاطئ مع احترامي للاخ / نايف
خذي هذي النصيحة وما راح تخسرين بس لا تنسي

دعواتك لنا

[نــــادر]

انا من رائي ونصيحة الاخوان لي انك تحذفين الاقتصاد الجزئي

لان عندك محاسبة وتضيفين اي مادة ثانية وبالتوفيق لك

[Dodo66]

مشكورين اخواني على نصيحتكم ما قصرتوا والله

بس حاولت اضيف العربي قبل كذا لكن ما نزلت لي الشعب

[دكتوره منال]

هلا اختي دودو

انا زيك مستوى ثالث ..

معليش بدي اساألك محاظرات السنترا متى بدأت ؟؟

الاسبوع هذا ايل راح ولا كيف ؟؟

كم لها بادئه ؟؟

[Dodo66]

بدأت من يوم الاحد دكتوره منال
بما انو كان السبت اليوم الوطني

=)

[روضة]

اختي اهم شي لا تحذفين pad101 لانها الأساس
انا الحين مستوى رابع و لما كنت مستوى ثالث حاولت اضيفها و حاولت :(
كنت يوميا ادخل الاودس احاول اضيف بدون فايدة
و الحين تعقدت الامور شوي بسببها
بالنسبة للتحرير الكتابي مادة سهلة مرررررة حاولي تضيفينها مثلما نصحوك الاخوان
اذا خايفة من الضغط خففي عن نفسك من الحين بأنك تتابعين اول باول
مع الوقت قرري هل انتي مضغوطة او لا
هم أدسم مادتين عندك الاقتصاد و المحاسبة >> لازم تتابعين معاهم اول باول

أتمنى اني افدتك و عذرا عالاطالة